2 Kibayã 16
16
Israyɛll rĩm a Basa zaba ne Zʋʋda rĩm a Aaza
(1Rĩm 15.16-22)
1A Aaza naamã reegr tɩ yʋʋm pis-tã la yoaablẽ, la Israyɛll rĩm a Basa yik zabr ne Zʋʋda, la yẽnda mee lalg n gũbg Rama, sẽn na n yɩlẽ n gɩdg Zʋʋda rĩm a Aaza t'a ra yi ye. 2Dẽ, a Aaza yãka wanzuri la sãnem Sẽn-Ka-Saab roogã laog bĩngr zĩigẽ, la rĩma zak laog bĩngr zĩigẽ n tʋm tɩ b tɩ kõ a Bɛn-Hadaad sẽn be Siiri wã. La a yeel-a yaa: 3«Kaool ning sẽn be maam ne yãmb sʋkã, la tõnd ba-rãmbã sʋkã yĩnga, ade, mam tʋma wanzuri wã ne sãnemã tɩ b wa kõ yãmbã. Moasã bɩ y kẽng n sãam kaool ning sẽn be yãmb ne Israyɛll rĩm a Basa sʋkã, t'a ra leb n wa zab ne maam ye.» 4A Bɛn-Hadaad kelga rĩm a Aaza, dẽ, yẽnda tʋma a tãb-biisã nanambs tɩ b tɩ zab ne Israyɛll tẽmsã. La bãmb tõoga Iyon, Dan, Abɛll-Mayim tẽmsã, la Neftali tẽmsã, a sẽn dag n bĩngd a bɩle zĩis ninsã. 5A Basa sẽn wʋm dẽ, a bas-a meebã a sẽn dag n met Rama wã. 6La woto, a Aaza kẽng n tɩ wʋka kuga la raadã fãa n wa Zʋʋda. La b tall-b lame n me Geeva la Mispa tẽmsã, n paas-b pãnga.
Wẽnnaam no-rɛɛs a Hanani goma ne rĩm a Aaza
7Yaa wakat-kãng la yãt a Hanani wa dĩmã a Aaza nengẽ n yeel-a yaa: «Fo basa Sẽn-Ka-Saabã teegre, n tɩ teeg Siiri rĩmã. Woto yĩng kɩtame tɩ Siiri tãb-biisã na n põsg f nugẽ. 8Kuus ne Libi tãb-biisã rag n naaga taab n yaa neb kʋʋngo, n tar wiidi la saar-dãmb ka tɛka. Fo sẽn dag n teeg Sẽn-Ka-Saabã yĩngã, b kɩtame tɩ fo tõog-ba. 9Bala, Sẽn-Ka-Saab geta dũniyã fãa gilli, n na n sõng neb nins sẽn nong bãmb ne b sũyã fãa wã. Yel-kãngã pʋgẽ, fo maana yalemdo, yaa rẽ n kɩt tɩ sẽn sɩng ne moasã, fo na n paama zaba.»
10A Aaza sũurã puuga ne yãtã, dẽ, yẽnda kɩtame tɩ b yõk-a n kẽes roogo, bala, gomdã dag n yika a sũurã wʋsgo. La sẽn sɩng ne wakat-kãnga, a Aaza namsa soolmã neb kẽere.
A Aaza kũum
(1Rĩm 15.23-24)
11A Aaza vɩɩmã kibar sɩngr n tɩ tãag a baoosgã fãa gʋlsa Israyɛll la a Zʋʋda dĩm-dãmba sebr pʋgẽ. 12A Aaza naamã yʋʋmd pis-tã la a wɛ soaba yʋʋmdã, a lʋɩ nao bãag sẽn yaa kɛgeng wʋsgo. La a bãagã pʋgẽ, a basa Sẽn-Ka-Saabã teegre, n teeg tɩt rãmba. 13A Aaza sẽn deeg a naamã tɩ yʋʋm pis-naas la a ye, la a ki yã. 14La b mum-a-la yaoog ning a meng sẽn dag n kɩt tɩ b tuk a Davɩɩd na-tẽngã pʋgẽ wã. B gãneg-a-la gãag sẽn pid ne parfẽ-rãmb sẽn tar yũ-noogo, la kaam buud toor-toor pʋgẽ n na seglg a kũumã. La b yõoga tɩdar me wʋsg a yĩnga.
Currently Selected:
2 Kibayã 16: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
