2 Kibayã 10
10
ZƲƲDA RĨM-DÃMB KIBARE
Israyɛll zãma wã tigma Sɩkɛm
(1Rĩm 12.1-25)
1A Roboaam kẽnga Sɩkɛm, bala, yaa beenẽ la Israyɛll zãma wã kẽng n na n tɩ kõ-a naamã. 2A Nebat biig a Zeroboaam sẽn wa n na n wʋm bõn-kãngã, t'a rag n bee Ezɩpt tẽnga. Yẽnda rag n zoe n kẽnga beenẽ n na n paam n põs rĩm a Salmo. Dẽ, yẽnda yii Ezɩpt tẽngã n lebg n wa. 3Dẽ, b tʋmame tɩ b tɩ bool-a. La a Zeroboaam ne Israyɛll nebã kẽng n tɩ goma ne a Roboaam n yeel-a yaa:
4«Yãmb ba wã rag n namsda tõnd wʋsgo. Dẽ wã, tõnd kot-y lame tɩ y yols tõnd ne namsg ning y ba wã sẽn dag n namsd tõndã. Woto, tõnd na n yɩɩ yãmb tʋmtʋmdba.» 5Rĩm a Roboaam yeel-b lame yaa: «Kuil-y la y lebg n wa rasem a tãabo.» La nebã kuilame.
6Woto, rĩm a Roboaam soka nin-kẽemb nins sẽn dag n zĩnd ne yẽnda ba a Salmo wã yaa: «Ne yãmba, y sagenda maam tɩ m leok nin-bãmbã tɩ bõe?» 7Dẽ, nin-kẽembã yeela a Roboaam yaa: «Yãmb sã n sak n maan wa nin-bãmbã sẽn yeelã, la y gom ne b gom-noodo, bãmb na n kell n yɩɩ yãmb tʋmtʋmdb wakat fãa yĩnga.»
8La rĩm a Roboaam ka geelg nin-kẽembã saglsã ye, yẽnda bas n kẽng n tɩ kosa kom-bɩɩs nins sẽn be-b ne yẽnda n dag n yaa yẽnda reed-n-taasã saglse. 9Dẽ, rĩm a Roboaam soka kom-bɩɩsã yaa: «Nin-bãmbã kota maam tɩ m yols-b ne namsg ning m ba sẽn dag namsd-bã. Dẽ wã, yãmb sagenda maam tɩ m leok-b tɩ bõe?»
10Kom-bɩɩsã sẽn yaa a Roboaam reed-n-taasã yeela a Roboaam yaa: «Nin-bãmbã ka yeelame tɩ y yols bãmb ne namsg ning y ba sẽn dag n namsd bãmbã la? Beneere ad yãmb sẽn na n leok-b to-to: yeel-y-b tɩ yãmb nug-bi-kɛmblã yɩɩda y ba gere. 11La sẽn paase, yeel-y-b tɩ y ba sã n dag namsa bãmba, yãmb na n paasa bãmb namsgã tɩ yɩɩg rẽndã. La y ba sã n dag n sɩbga bãmb ne kalwaase, yãmb na n sɩbg-b-la ne namse.»
12Rasem a tãab daarã sẽn ta, a Zeroboaam ne Israyɛll nebã fãa lebg n waa rĩm a Roboaam nengẽ, wa rĩmã sẽn dag n yeel tɩ: «Lebg-y n wa-y mam nengẽ rasem a tãab sẽn watã.» 13La a Roboaam basa nin-kẽembã sẽn sagl yẽnda wã, n gom ne nebã gom kegemse. 14Dẽ, a Roboaam reega a kom-bɩɩsã sẽn yaa yẽnda reed-n-taasã sagls n yeel nebã yaa: «M ba rag n namsa yãmba, la mam na n paasa yãmb namsgã tɩ yɩɩg rẽndã, m ba rag n sɩbga yãmb ne kalwaase, la mam na n sɩbga yãmb ne namse.»
15Woto, rĩmã ka kelg nin-buiidã ye. Bala, yaa Sẽn-Ka-Saab n dag n rat tɩ yɩ a woto, tɩ bũmb ning bãmb sẽn dag n kɩt tɩ Sɩlo rao a Ayiya togs a Nebat biig a Zeroboaamã tõe n paam pidsgu.
Israyɛll soolem welgre
(1Rĩm 12.16-19)
16 #
2Sãm 20.1
La Israyɛll nebã fãa sẽn yãnd tɩ rĩmã ka kelg bãmbã.
Nebã leoka rĩmã n yeel-a yaa:
«Bõe lagem-n-taar n be tõnd ne a Davɩɩd sʋka.
Bõe pʋɩɩr la d tar ne a Davɩɩde,
tõnd ka tar pʋɩɩr ne a Izayi biigã ye.
Israyɛll nebã, lebg-y n kuil-y-yã!
Moasã, Davɩɩd yagense, bɩ f ges f roog yelle!
Dẽ, Israyɛll nebã fãa lebgame n kuili.» 17La a Roboaam dɩɩ naamã tẽms nins sẽn da be Zʋʋda tẽn-peelmã pʋgẽ wã bala. 18Dẽ, rĩm a Roboaam tʋma a Adoram sẽn dag n get tʋʋm-wɛglã yellã Israyɛll nebã nengẽ, la Israyɛll nebã naaga taab n lob a Adoram ne kug n kʋ. La rĩm a Roboaam tõog n kẽ saar pʋg n zoe n kẽng Zeruzalɛm. 19Yɩɩ woto n kɩt tɩ Israyɛll nebã, kell n kɩɩs a Davɩɩd doogã neb hal n tãag rũndã.
Currently Selected:
2 Kibayã 10: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
