1 Tɩmote 5
5
Zak a yembr neba
1Da leng nin-kẽem ne pãng ye, sagl-a wa a yaa f ba. Maan kom-bɩɩsã wa f ba-biisi, 2la f maan pʋg-yãansã wa f ma-rãmba, la ges pʋg-sadbã wa f tão‑pogse, ne sõmblem zãnga.
Sagls pʋg‑kõap yĩnga
3Waoog pʋg‑kõap nins sẽn sɩd yaa pʋg‑kõapa#5.3 Yaa pʋg‑kõap nins sẽn ka tar‑b ned sẽn na n ges b yellã yell la b sẽn gomdã. 4Pʋg‑kõor sã n tar kamb bɩ yagense, bɩ kom-kãens zãms tɩ reng n zoe b meng yirã rãmb nimbãanega, n lebs bãmb bũmb nins b sẽn dag n ges bãmb yell ne wã, bala, manesem-kãng nooma Wẽnnaam. 5La pʋg‑kõor ning sẽn yaa-a pʋg‑kõor meng-menga, n vɩ a yembre, a teegrã fãa bee ne Wẽnnaam, n modgd ne bõosg la pʋʋsgo, yʋng la wĩntoog fãa. 6La pʋg‑kõor ning sẽn vɩ yĩng sũ-noog pʋgẽ yaa kũum, baa ne a sẽn vɩ wã. 7Ad bũmb nins fo sẽn tog n wilg-b tɩ b maane, tɩ rõadg da zĩnd b zut ye. 8Ned sã n ka get a neb yelle, sẽn yɩɩd fãa yaa a zaka rãmba, yẽnda basa a tẽebã, la a yaa wẽng n yɩɩd ned ning sẽn ka-a tẽedã. 9Pʋg‑kõor b sẽn tõe n gʋls a yʋʋr pʋg‑kõapã sebr zug tog n tara yʋʋm sẽn tat pis-yoobe, la a yɩ rao a yembr tãa paga, 10tɩ nebã fãa miẽ t'a wuba kamba, n maan sãambã sãando, n pegs nin-sõamyã nao wã, la a sõng neb nins sẽn be yel-pakr pʋgẽ wã, la a bao tɩ maan tʋʋm-sõng buudã fãa. 11La f ra sak n gʋls pʋg‑kõap nins sẽn yaa pʋg-bi wã ye. Bala, b ratmã sã n lak ne Kirisã, b rata sɩdba, 12la rẽ yaa beegr ne bãmba, b sẽn sãam b pipi kaoolã yĩnga. 13Sẽn paase, b minimda kʋɩʋʋngo, n zãmsd yiy saabo. Ka b sẽn ka tʋmdã bal ye, b yɩta yel-kãnesdba, n kẽed goam sẽn ka pak-ba, la b gomd goam b sẽn ka tog n gom ye. 14Dẽ, mam datame tɩ pʋg‑kõap nins sẽn yaa-b pʋg-pẽbã kuil sɩdb n dog kamba, la b zã zagse, tɩ b ra wa n kõ bɛyã weer baa a yembr t'a gom wẽng ye. 15Bala, kẽer zoe n wẽnemdame n pʋg a Sʋtãana. 16Tẽed sã n tar pʋg‑kõor a zakẽ, bɩ a ges a yelle, tɩ da yɩ tɩlɛ tɩ wẽnd doogã tʋk a zɩɩb ye. Woto, b na tõog n ges b rãmb sẽn yaa pʋg‑kõap sɩd-sɩdã yelle.
Sagls kãsem-dãmb yĩnga
17Taoor dãmb nins sẽn get wẽnd doogã tʋʋm yell neerã tog n paama waoogr#5.17 Kẽer yetame tɩ b tog n paama yaood n yɩɩda. n yɩɩda, la sẽn yɩɩd fãa, yaa neb nins sẽn wɩngd ne koe-moonego la ne zãmsgã. 18#Tõ 25.4, Mat 10.10, Luk 10.7Bala, Wẽnnaam sebrã yetame tɩ:
Da ning naaf ning sẽn pãbd-a ki wã noor yʋk ye,
la tʋmtʋmd togda ne a yaoodo.
19 #
Tõ 17.6, 19.15 Ned sã n wa n dõd kãsma, sã n ka neb a yiib bɩ a tãab kaseto, da reeg ye. 20Neb nins sẽn maand yel-wẽnã, leng-b nebã fãa sʋka, tɩ neb a taabã me na zoe rabeem. 21Mam kota foom Wẽnnaam taoore, la a Zeezi Kiris taoore, la maleg-tũusdsã taoore, tɩ f tũ no-kãens n da tũus nebã, wall f bak neb kẽer n na n sõng ye. 22Da yãg n tigs nebã ne f nus n kẽes-b Wẽnnaam tʋʋmdẽ wã ye, la f ra naag ned a yel-wẽnd maanegẽ ye. Fo mengã, tall f meng ne sõmblem. 23Da yũudẽ koom yeyn-yeyn bal ye. Mi n yũ reezẽ rãam bilfu, f pʋ-zabrã ne f yĩn-pa-noomã sẽn wat wakat wʋsgã yĩnga. 24Neb kẽer yel-wẽn yaa vẽenese, baa sẽn deng b sẽn na bʋ b bʋʋdo. La ne neb kẽere, b yel-wẽnã ka pukda, sã n ka b bʋʋdã zugẽ ye. 25Woto me, tʋʋm‑sõamyã pukdame, la tʋʋm nins sẽn ka-b sõama wã me ka tõe n pa n ka puk ye.
Currently Selected:
1 Tɩmote 5: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
