1 Sãmwɛlle 25

A Naball wilga a zɩ-beoog ne a Davɩɩde

1A Samwɛll kiime. La Israyɛll nebã fãa tigma taab n yãb-a, la b tɩ mum-a-la a yirã Rama. Rẽ zugẽ, a Davɩɩd yikame n kẽng Paarã we-raoogã pʋgẽ.

2Rao a ye n dag n be Mawõ, n kẽnd n tʋmd Karmelle. A rag n yaa nin-kãseng n tar piis tus a tãab ne bʋʋs tusri. La yẽnda rag n bee Karmell n wõrsd a piisi. 3Rao-kãng yʋʋr la a Naballe, t'a pagã yʋʋr la a Abigayɩlle. A Abigayɩll dag n yaa pʋg-sõng la pʋg-neere, la a sɩdã rag n yaa nin-toaag n maand tʋʋm-wẽnse. Yẽnda yaa a Kalɛɛb buudã neda. 4A Davɩɩd zĩnda we-raoogã pʋgẽ n wʋm t'a Naball wõrsda a piisi. 5Dẽ, a Davɩɩd tʋma kom-bɩɩs piig tɩ b kẽng a Naball nengẽ Karmell n tɩ pʋʋs-a n sok a keelem yẽnda yʋʋr yĩnga, 6la b yeel-a yaa: «Bɩ yãmb ne y yirã la bũmb nins yãmb sẽn so wã fãa zĩnd ne bãane! 7Mam wʋmame tɩ y wõrsda y piisi, yaa woto tɩ m yeel tɩ b wa wilg-y tɩ yãmb pe-kɩɩmbã zĩnda ne tõnd la tõnd ka nams-b ye. Wakat ning fãa bãmb sẽn zĩnd ne tõnd Karmellã, b bũmb ka menem ye. 8Sok-y yãmb tʋmtʋmdbã n ges tɩ b na n wilg-y lame tɩ yɩ a woto. La a Davɩɩd yeelame tɩ y ges b tʋmtʋmdbã yell neere, bala, tõnd waa tigr daare! Dẽ, d kotame tɩ y bao y nug bũmb n kõ tõnd sẽn yaa yãmb tʋmtʋmdbã, ne a Davɩɩd sẽn yaa yãmb biigã.»

9A Davɩɩd tʋmtʋmdbã sẽn ta a Naball nengẽ, b kell n togs-a-la goam nins fãa a Davɩɩd sẽn yeelã, la b bas n gũud a Naball leokre. 10A Naball leoka a Davɩɩd tʋmtʋmdbã yaa: «A Davɩɩd la ãnda? A Izayi biig la ãnda? Rũndã-rũndã wã, yembs wʋsg n zoet n basd b zu-soben-dãmba. 11Mam ka na n dɩk m dɩɩbã ne m koomã la m nemdã m sẽn segl n na n kõ m pe-wõrsdbã, n kõ neb m sẽn ka mi ye.» 12A Davɩɩd nebã lebg n leba a Davɩɩd nengẽ n tɩ togs-a goam nins fãa a Naball sẽn gomã. 13Woto, a Davɩɩd yeela a nebã fãa tɩ b rɩk b zabr sʋʋs n sẽbg#25.13 Wakat-kãnga, nebã rag n sẽbgda b zabr sʋʋgã b sɛɛga. Bãmb dag n ka bobd-a wa tõnd zamaanẽ nebã sẽn maandã ye. b seese. A Davɩɩd me rɩka a zabr sʋʋg n bobe. Neb kobs-naas n tũ a Davɩɩde, tɩ neb kobessi pa n na n gũ teedã.

A Abigayɩll sigsa a Davɩɩd sũuri

14A Naball tʋmtʋmd a yembr n tɩ yeel a Naball pag a Abigayɩll yaa: «A Davɩɩd tʋma neb tɩ b yi we-raoogã pʋgẽ n wa ning tõnd soaalã barka#25.14 Sã n yaa ne Ebre-rãmbã miningu, sãan sã n kẽng ned yiri, a ningda zakã soab ne a zakã barka. La yaa bãmb me pʋʋsem la a boto., la yẽnda leng-b lame. 15Nin-bãmb yaool n maana tõnd neer wʋsgo. B ned ba a ye ka maan tõnd wẽng ye. La wakat ning fãa tõnd sẽn zĩnd ne bãmb weoogẽ wã, b ned ka reeg tõnd bũmb ba a yembr ye. 16Wakat ning fãa tõnd sẽn zĩnd ne bãmb n gũ d rũmsã, b yɩɩ wa yãgr tõnd yĩng wĩndg la yʋngo. 17Moasã, bɩ y ges yãmb sẽn na n maan bũmb ninga, bala, b zoe n yãka yam n na n sãam tõnd soaalã ne a zakã rãmba. A Naball la sẽn yaa nin-yoog tɩ ned ka tõe n gom ne-b la!»

18Dẽ, a Abigayɩll yika tao-tao n yãk bur kobessi ne reezẽ rãam ko-waoos a yiibu, la piis a nu b sẽn segle, la ka-sẽedem peoog a nu ne reezẽ-gil-koeems koabga, la kankam-koeems-gil kobessi, n zɩlg bõense. 19A Abigayɩll yeela a tʋmtʋmdbã tɩ b rengdẽ taoor t'a watẽ. La yẽnda ka yeel a sɩd a Naball tɩ bũmb ye. 20Yẽnda zomba bõanga, n tũud tãngã kɩreng a ye n sigda, la a Davɩɩd ne a nebã rag n watame n tek n seg yẽnda sorã zugu. 21A Davɩɩd dag n yetame: «Mam sẽn gũ rao-kãngã paoongã fãa we-raoogẽ wã, t'a sẽn so wã bũmb ba a yembr ka menemã yaa zaalem bala. Mam maana yẽnda neere, la yẽnda lebsa maam wẽnga. 22Mam sã n bas a Naball yirã bi-ribl a ye meng tɩ ta beoogo, bɩ Wẽnnaam sɩbg maam ne sɩbg-kãsenga!»

23A Abigayɩll sẽn yãnda a Davɩɩde, a siga a bõangã zug tao-tao, n fõgen a neng tẽng a Davɩɩd taoore. 24Yẽnda wõgemda a Davɩɩd taoor n yeele: «M soaala, yaa maam n konge. M kotame tɩ y sak tɩ m gom ne-yã, la y kelg y tʋmtʋmd-poakã goamã. 25M kot-y lame tɩ y ra rɩk nin-yoog a Naball manesmã n ning y sũurẽ ye. Yẽnda kell n yaa wa a yʋʋrã: nabd bala. Mam ka yã neb nins yãmb sẽn tʋmã ye.

26La moasã, m soaala, mam wẽenda ne Sẽn-Ka-Saab sẽn vɩ wã, la ne yãmb me, tɩ yaa Sẽn-Ka-Saab n gɩdg yãmb tɩ y ra raag zɩɩm, n bao tɩ fãag y meng ye. Bɩ yãmb bɛɛbã ne neb nins sẽn dat-b yãmb ne wẽnga lebg wa a Naballe. 27Dẽ wã, m soaala, reeg-y kũun nins mam sẽn zã n wa n na n kõ yãmbã, n kõ kom-bɩɩs nins sẽn be ne yãmbã. 28M kot-y lame tɩ y kõ y tʋmtʋmd-poakã sugr a beegrã yĩnga, Sẽn-Ka-Saab na n kɩtame tɩ y roogã me, bala, yãmb zabda Sẽn-Ka-Saab yĩnga. Bɩ ned da yã wẽng yãmb pʋgẽ ye. 29Ned sã n yik n dat n sãam yãmba, yaa Sẽn-Ka-Saab sẽn yaa yãmb Wẽnnaamã n na n gũ yãmb vɩɩmã. La b na n lobga y bɛɛbã wa ned sẽn dɩk kugr n ning loaabgẽ n lobge. 30Sẽn-Ka-Saab sã n wa maan yãmb neer wa b sẽn yeelã, n kɩt tɩ y lebg Israyɛll dĩma, 31yãmb ka na n maan y bãngẽ, la y sũur kõn sãam y sẽn ka raag zɩɩm zaalmã yĩnga, la y sẽn ka bao tɩ fãag y mengã yĩng ye. La Sẽn-Ka-Saab sã n wa maan m soaalã neere, bɩ y tẽeg y tʋmtʋmd-poakã yelle.»

A Davɩɩd rɩka a Abigayɩll n maan a paga

32A Davɩɩd yeela a Abigayɩll yaa: «Bɩ Sẽn-Ka-Saab sẽn yaa Israyɛll Wẽnnaamã, sẽn tʋm-a foom tɩ f wa seg maam dũndã daarã paam pẽgre! 33Mam pẽgda fo yamã, bɩ f paam barka, fo sẽn gɩdg maam tɩ m ka raag ned zɩɩm n bao m meng fãagrã yĩnga. 34M wẽenda ne Sẽn-Ka-Saab sẽn yaa Israyɛll Wẽnnaamã sẽn vɩ wã, sẽn gɩdg-a maam tɩ m ka maan foom wẽngã, tɩ sã n ka fo sẽn wa tao-tao n wa seg maamã, ka ne sõorã pukri, bi-ribl ba a yembr ka na n kellẽ a Naball zakã pʋgẽ ye.» 35A Davɩɩd reega kũunã a Abigayɩll sẽn wa ne wã, la a yeel-a yaa: «Lebg n kuil ne bãane, bala, mam kelga f koɛɛgã, la m saka f sẽn kosã.»

36A Abigayɩll sẽn lebg n ta a Naball yiri, a mikame t'a maanda tigr wa rĩm tigri. A Naball sũurã rag n yaa noog hal wʋsgo. Yẽnda yũu reezẽ rãam t'a neng yilimdẽ. La a Abigayɩll ka togs-a baa fɩ, hal tɩ beoogã vẽege. 37La beoogã sẽn vẽeg tɩ reezẽ rãamã yi n bas a Naballã, a pagã togs-a-la bũmb nins fãa sẽn maanã. La a Naball pɛlengã yɩkame t'a sobg n gãe. 38La rasem piig rẽ zugẽ, Sẽn-Ka-Saab wẽ a Naball t'a ki.

39A Davɩɩd sẽn wʋm t'a Naball kiime, yẽnda yeelame: «Bɩ Sẽn-Ka-Saab paam pẽgre! Bala, bãmb doka mam sũur ne a Naballe, a sẽn paoog maamã yĩnga, la b gɩdg maam tɩ m ka maan wẽng ye! Sẽn-Ka-Saab kɩtame tɩ wẽng ning a Naball sẽn maanã leb-a.» Dẽ poore, a Davɩɩd tʋma neb tɩ b tɩ wilg a Abigayɩll t'a rat-a lame n maan a paga. 40A Davɩɩd tʋmtʋmdbã kẽnga a Abigayɩll nengẽ Karmell n tɩ yeele: «A Davɩɩd n tʋm tõnd tɩ d wa peeg-f n wa t'a maan a paga.» 41A Abigayɩll fõgna a neng tẽng n yeele: «Ad-ma, mam yaa yãmb tʋmtʋmd-poaka. Mam na n tũume n tɩ waasd m soaalã tʋmtʋmdb nao.» 42A Abigayɩll yika tao-tao n zomb bõanga, la yem-pogs a nu n tũ yẽnda. Bãmb tũ a Davɩɩd tʋmtʋmdbã, la a Abigayɩll tɩ lebga a Davɩɩd paga.

43A Davɩɩd peega Zizreyɛll tẽng bi-pugl a Ayinoam me n maan a paga, la bãmb b yiibã fãa lebga a Davɩɩd pagba. 44#2Sãm 3.14-16A Sayull dɩka a biig a Mikall sẽn dag n yaa a Davɩɩd pagã n kõ Galim ned a Layiis biig a Palti t'a maan a paga.

Currently Selected:

1 Sãmwɛlle 25: MPBU

Highlight

Copy

Compare