1 Sãmwɛlle 21

A Davɩɩd zoeeme n bas a Sayulli

1A Davɩɩd yikame n looge, la a Zonatã lebg n leba tẽngã pʋga.

2 # Mat 12.3,4, Mark 2.25,26, Luk 6.3 A Davɩɩd kẽnga Noob maan-kʋʋd a Ayimelɛk nengẽ. La a Ayimelɛk wudg n sega a Davɩɩd ne rabeem n sok-a yaa: «Yaa a wãn tɩ f wat f yembr tɩ ned ka tũud-fu?» 3A Davɩɩd leoka maan-kʋʋd a Ayimelɛk yaa: «Yaa rĩmã n tʋm maam, la b yeelame tɩ ned ka segd n bãng bũmb ning yĩng bãmb sẽn tʋm maamã, la noor ning b sẽn kõ maamã ye. Mam yãka sɛk zĩig n wilg m nebã tɩ d na n sega taab beenẽ. 4La moasã, bõe rɩɩb la yãmb tara? Kõ-y-m bur a nu wall y sẽn tar bala.» 5Maan-kʋʋdã leoka a Davɩɩd yaa: «Mam ka tar bur-zaalg ye. Yaa Wẽnnaam doogã bur bal n be kaanẽ. Y kom-bɩɩsã sã n ka lagem ne pagb bɩ y rɩke.» 6A Davɩɩd leoka maan-kʋʋdã yaa: «B gɩdga tõnd tɩ d ra lagem paga, wa mam sẽn minim n maand zabr kẽnd wakatã. Dẽ, sã n yaa tɩ kom-bɩɩsã yɩlgda b teedã kẽn-zaall daar yĩnga, bõe yĩng tɩ b ka na n yɩlg b teedã rũndã daarã n yɩɩda?» 7#Mk 24.5-9Woto, maan-kʋʋdã rɩka bur ning sẽn dag n be Wẽnnaam doogẽ wã n kõ a Davɩɩde, bũmb a to sẽn dag n ka be wã yĩnga. Yaa bur ning sẽn dag n be Sẽn-Ka-Saab taoore, tɩ b yiisd-a daar fãa n ledgd ne bur-tʋʋlgã bal n dag n be.

8La mikame tɩ badaare, a Sayull tʋmtʋmd n dag n be Sẽn-Ka-Saab taoor beenẽ. Yẽnda rag n yaa Edom ned t'a yʋʋr boondẽ t'a Doɛɛge, n yaa a Sayull pe-kɩɩmbã naaba.

9A Davɩɩd soka a Ayimelɛk yaa: «Yãmb ka tar kãnd bɩ zabr sʋʋg n kõ-ma? Mam ka tõog n yals n dɩk m zabr sʋʋgã wall m zab-teedã ye. Bala, rĩmã sẽn tʋm maam tɩ m tɩ maan bũmb ningã rag n yaa yãgb yelle.» 10#1Sãm 17.51Maan-kʋʋdã yeela a Davɩɩd yaa: «Ad Filistẽ ned a Golyate, rao ning fo sẽn dag n kʋ Ela tɩɩsã long pʋgẽ wã sʋʋga. B vil-a-la ne fuug t'a be maan-kʋʋr fuugã poore. F sã n dat-a lame bɩ f rɩke, tɩ m ka tar a to kaanẽ ye.» A Davɩɩd yeelame: «Sʋʋg ka leb n be n yɩɩd sʋ-kãngã ye. Rɩk-y-yã-a n kõ-ma.»

11Badaar bala, a Davɩɩd yikame n zoe n zãag ne a Sayulli. La yẽnda taa Gat rĩm a Akiis nengẽ. 12#1Sãm 18.7, 29.5A Akiis tʋmtʋmdbã yeel-a lame: «Rẽ yĩnga, ka Israyɛll dĩm a Davɩɩd la woto sɩda? Ka yẽnda yĩng la nebã sẽn saood n yɩɩndẽ n yetẽ tɩ:

‹A Sayull kʋʋ neb tusri,

t'a Davɩɩd kʋ neb tus piigã wɛ?›»

13Gom-kãens kẽesa a Davɩɩd rabeem, la yẽnda rag n zoeta Gat rĩm a Akiis wʋsgo. 14A Davɩɩd maana a meng wa gãeeng bãmb taoore, n wʋkd teed n sõod zagsã noyã, la a bas a kolkoodã tɩ sedgd ne a toɛɛngã. 15A Akiis yeela a tʋmtʋmdbã yaa: «Yãmb ka ne tɩ rao-kãngã yaa gãeeng sɩda? La yaa a wãn tɩ y tar-a n wat mam nengẽ? 16Rẽ yĩnga yaa gãeems n ka be kaanẽ bɩ? Bɩ yaa bõe tɩ y wat ne nin-kãngã t'a wa maand a gãeemdã mam taoore? Ned a woto kõn kẽ mam zakẽ wã ye.»

Currently Selected:

1 Sãmwɛlle 21: MPBU

Highlight

Copy

Compare