1 Sãmwɛlle 11
11
A Sayull tõoga Amo nebã
1Amo ned a Nahaas kẽnga ne a nebã n tɩ tilg b tãb-sikã Yabɛɛs sẽn be Galaadã n na n zab ne-a. Yabɛɛs nebã fãa yeela a Nahaas t'a maan kaool ne bãmb n soog-ba. 2La Amo ned a Nahaas leok-b lame: «Yãmb sã n dat tɩ mam maan kaool ne yãmba, rẽndame tɩ mam deng n feoog yãmb ned kam fãa rɩtg nifri, n ning Israyɛll nebã fãa yãnde.» 3Yabɛɛs nebã kãsem-dãmb yeelame: «Bɩ y kõ-d weer dasem a yopoe, tɩ d tʋm neb tɩ b togs Israyɛll nebã fãa, la ned sã n ka be n na n fãag tõndo, d na yaool n sak yãmb sẽn datã.» 4Neb nins b sẽn tʋmã sẽn ta Gɩbeya a Sayull sẽn beẽ wã n togs koe-kãngã tɩ nebã wʋma, b fãa zẽka b koees n yãbe. 5La mikame t'a Sayull dag n yi a pʋʋgẽ ne a nag-koods n watẽ, la a sokame tɩ yaa bõe n tar nebã tɩ b yãbda. La b togs-a-la Yabɛɛs nebã sẽn yeelã. 6A Sayull sẽn wʋm gom-kãense, Wẽnnaam Sɩɩgã kẽe yẽnda, la a sũurã yika hal wʋsgo. 7Yẽnda yãka niig a yiib n kʋ n beese, n kɩs neb nins sẽn wa ne koɛɛgã tɩ b tɩ kɩs Israyɛll soolmã fãa, n yeel tɩ ned ning fãa sẽn ka na n tũ a Sayull ne a Sãmwɛll n kẽng zabrã, b na n maana a soab niigã me a woto. La Sẽn-Ka-Saab rabeem yõka Israyɛll nebã, la b lagma taab n yik wa nin-yende. 8A Sayull tigma Israyɛll nebã Bezɛke. Bãmb sõorã taa tus kobs-tã, tɩ Zʋʋda nebã sõor dag n yaa tus pis-tã. 9Bãmb yeela neb nins sẽn yi Yabɛɛs n wa ne koɛɛgã tɩ b lebg n leb Yabɛɛs sẽn be Galaadã n tɩ yeel nebã, tɩ b na n paama fãagr beoog yibeoogo, wĩndgã sã n wa zẽkdẽ. La b sẽn tɩ taas Yabɛɛs nebã koɛɛgã, b maana sũ-noog wʋsgo. 10La Yabɛɛs nebã yeela Amo nebã tɩ beoogo, bãmb na n sakame n wa tɩ b maan bãmb wa b sẽn date. 11Vẽkembeoogo, a Sayull welga a nebã sags a tãabo. La bãmb kẽe Amo-rãmbã tãb-sikẽ tõd-beoogo, n kʋ-b hal tɩ ta wĩntoogo. Neb bilf nins sẽn põsã sãeegame tɩ ned ka leb n tũ a to ye.
12Nebã yeela a Sãmwɛll yaa: «Yaa ãndã rãmb la sẽn dag n yet t'a Sayull ka na n yɩ tõnd dĩmã? Tall-y-b n wa tɩ d kʋ.» 13La a Sayull yeelame: «Ayo! B ka na n kʋ ned rũndã daarã ye. Bala, rũndã, Sẽn-Ka-Saab waa ne fãagr Israyɛll tẽngã pʋgẽ.»
14Dẽ, a Sãmwɛll yeela nebã yaa: «Wa-y tɩ d kẽng Gilgall n tɩ yeel t'a Sayull la tõnd dat t'a yɩ d rĩmã.» 15Nebã fãa kẽnga Gilgall n tɩ kõ a Sayull naamã Sẽn-Ka-Saab taoor beenẽ. Bãmb maana zems-n-taar maand Sẽn-Ka-Saab taoore, la a Sayull ne nebã fãa maana sũ-no-kãseng beenẽ.
Currently Selected:
1 Sãmwɛlle 11: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
