1 Rĩm-dãmbã 7

Rĩm a Salmo na-yirã meebo

1La sã n yaa ne rĩm a Salmo meng na-yirã, a me-a lame n sɛ yʋʋm piig la a tãab pʋgẽ. 2A Salmo reng n mee roog ning sẽn boond tɩ ‹Libã tɩɩs roogã.› La ro-kãng woglmã yaa kãntɩɩg koabga, t'a yalmã yaa kãntɩɩg pis-nu, t'a zãntlmã yaa kãntɩɩg pis-tã. B tilga roogã ne sɛɛdr tɩɩs ra-lugds ruls a naase, la b yaool n dɩk sɛɛdr tɩɩs ra-paadsã, n palg b zutu. 3La ra-bãmb ra palga ra-lugdsã zutu. Ra-paadsã sõor dag n yaa bãmb pis-naas la a nu, la b pʋɩ-b-la ruls a tãabo, tɩ rulg fãa yaa ra-paads piig la a nu. Roogã yĩngrã paga ne sɛɛdr tɩɩs raado. 4La roogã kɩremsã fãa, b maana võy n tong ruls a tãabo, la võor fãa rag n teesa a to. 5Rignoyã ne võ-yalemsã fãa maaname tɩ yaa mags-magse, la bãmb me rag n tota taaba. La võ-yalemsã rag n tonga taab zĩis a tãabo.

6Rĩm a Salmo kɩtame tɩ b me roog a to ne ra-lugdsi, t'a woglmã yaa kãntɩɩg pis-nu t'a yalmã yaa kãntɩɩg pis-tã. La ro-kãng rag n bee roog ning sẽn boond tɩ ‹Libã tɩɩs roogã› neng taoore. La rĩmã ninga ra-lugds roogã noor n maan zãnde. 7Rĩm a Salmo mee roog n ning bʋʋd geer beenẽ, tɩ yaa bʋ-kaoor doogo. La roogã tẽngã n tɩ tãag a yĩngrã, b gãneg-a-la ne sɛɛdr tɩɩs ra-pegdo. 8#1Rĩm 3.1Rĩm a Salmo mee roog a to sẽn wẽnd ‹Libã tɩɩs roogã›, la ro-kãng rag n bee zak a to pʋgẽ, bʋʋdã roog poore. La a mee ro-kãng buud n kõ Faarõ bi-puglã sẽn dag n yaa yẽnda pagã.

9La ro-bãmba fãa, sẽn sɩng ne b tẽngrã n tãag b yĩngrã, b talla kug-bɛd sẽn pees tɩ yaa neeba, n me ro-kãense, la ro-yɩngã ne zag-kãsengã pʋgã. 10Kug nins b sẽn tall n yẽbg roogã rag n yaa kug-neeba, n yaa bɛda. Kug kẽer woglem yaa kãntɩɩg piig-piiga, tɩ kẽer yaa kãntɩɩg a nii-nii. 11La pipi kugã zutu, b rogla kug-bɛd a taab sẽn pees tɩ yaa neeba, n paas ne sɛɛdr tɩɩs raado. 12B mee zag-kãsengã lalg ne kug-bɛd ruls a tãab sẽn dogl taaba, ne sɛɛdr tɩɩs raad rulg a yembre, tɩ kell n yaa wa zak ning sẽn be pʋgẽ n gũbg Sẽn-Ka-Saab roogã ne a noorẽ doogã sẽn me to-to wã.

A Hiram tʋʋmde Sẽn-Ka-Saab roogã yĩnga

13Rĩm a Salmo tʋmame tɩ b kẽng Tɩɩr n tɩ bool a Hiram. 14A Hiram ma wã rag n yaa pʋg-kõore, n yaa Neftali buudu. La a ba wã yaa Tɩɩr neda. A Hiram dag n yaa yõaka n mi zũud tʋʋmde, la a tara yam la minim ne bãngr wʋsgo. La a rag n tõe n talla zũud n maan bũmb wʋsgo. Rẽ kɩtame tɩ rĩm a Salmo tʋm tɩ b kẽng Tɩɩr n tɩ bool-a t'a wa tʋm zũudã tʋʋm fãa.

15La a Hiram maana zũud ra-lugds a yiibu. Pipi ra-lugdgã woglem yaa kãntɩɩg piig la a nii, la ra-lugdg a yiibẽ soabã taglem yaa wĩir woglem sẽn tat kãntɩɩg piig la a yiib n tõe n vilimd-a n sege. 16A Hiram rõoga zũud pugli a yiib n dogl ra-lugdsã zutu. La pugl fãa zãntlem dag n taa kãntɩɩg a nu. 17A Hiram leb n maana nag-teed a taab ne zũud n ning pugli wã zutu. Yaa gãmba sẽn yaa neeba. La pugl fãa rag n tara nag-teed a yopoe. 18Yẽnda leb n naana te-neeb sẽn wẽnd gernaad tɩɩg biis ruls a yiib n ning n gilg gãmbã wã n lud pugli a yiibã sẽn be ra-lugdsã zutã. 19Pugli a yiib n dag n be ra-lugdsã sẽn be yɩng roogã noorã zutu. Pugli wã zãntlem yaa kãntɩɩg a naase, la b ra wẽnda tɩ-puudu. 20Pugli wã sẽn be ra-lugds a yiibã zutã, b rag n gilg-b-la ne gernaad tɩɩg biis kobessi, la b ra bee yĩngr n pẽ sẽn tʋʋgẽ wã. 21A Hiram lugla ra-lugds a yiib Wẽnd doogã noore. La yẽnda pʋda nug-rɩtg soabã tɩ Yakĩn,#7.21 Yakĩn: sẽn dat n togs tɩ ‹Wẽnnaam n kõt pãnga, wall a soab sẽn yalsd kãenkãe.› la a pʋd nug-goabg soabã tɩ Boaaze.#7.21 Boaaze: sẽn dat n togs tɩ ‹pãng bee Wẽnnaam nengẽ.› 22Ra-lugds a yiibã zut rag n maaname tɩ wẽnd tɩ-puudu. Yɩɩ woto la b maan ra-lugdsã n sɛ.

Zũud sĩn-bedrã maanego

23A Hiram yẽnega zũud n maan sĩn-bedre. La sĩn-bedrã noorã yalem yaa kãntɩɩg piiga. La a rag n yaa gilga, a zãntlmã yaa kãntɩɩg a nu. La yaa wĩir woglem sẽn tat kãntɩɩg pis-tã n tõe n gilg-a n sege. 24B maana kãana, n ning-b n gilg sĩn-bedrã noor zãnga, la kãntɩɩg fãa yaa bãmb piig-piiga. La kãanã yaa ruls a yiibu. B naaga sĩn-bedrã ne kãanã n yõg tɩ kell n yaa bũmb a yembre. 25Sĩn-bedrã ra roga zũud lols piig la a yiib zugu. Lols a tãab nens ra teesa yaanga, t'a tãab tees nin-taoore, t'a tãab tees goabga, t'a tãab tees rɩtgo, tɩ sĩn-bedrã rog bãmb zugu, la lolsã fãa sees teega taab sĩn-bedrã tẽngre.

26Sĩn-bedrã taglem dag n taa nug-yakemde. La b maana a noorã tɩ wẽnd wũmbl noore, n yaa wa tɩ-puudu. Sĩn-bedrã dag n tõe n deega ko-yʋy tus a yiib koom.

Zuud terok-rãmbã maanego

27A Hiram maana zũud terok-rãmb piiga, la terok a yembr fãa woglem ne a yalem yaa kãntɩɩg a naas-naase, tɩ b zãntlmã yaa kãntɩɩg a tãab-tãabo. 28Ad b sẽn maan terok-rãmbã to-to: B rag n maana b wamsã ne zũud sẽn yaa paklse, la b rɩk b wamsã n sog ne tebendsã. 29B rag n gʋla gɩgma, lolse, la serubẽ-rãmb naana pɩgdsã sẽn dag n dog wamsã zugã zutu. La b maana nag-teed sẽn yaa tɩ-puud buud n ning gɩgma wã ne lolsã yĩngr ne b tẽngr tɩ luundẽ. 30Terok fãa rag n tara zũud nao gils a naase, b sẽn ning zũud tebends zutu. La terokã sogs a naasã zĩisẽ, b rag n ninga zũud gãts sĩngã tẽngre, la gãtsã rag n bee nag-teedã zugẽ. 31La sĩng fãa b sẽn dag n dɩk n sagl terok fãa pʋgẽ wã, noor ra tʋʋg n yii yɩng sẽn tat kãntɩɩg a yembre. La sĩng fãa noor dag n yaa gilga, t'a yaadmã rag n yaa kãntɩɩg a yembr la pʋɩ-sʋka. La b rag n gʋla nag-teed sĩng fãa noor zugu. La tebendsã rag n yaa magdo, b ka gils ye. 32Nao-gils a naasã rag n bee kud-paklsã tẽngre, tɩ gãtsã tong ne terokã n yõge. Naoor a yembr fãa zãntlem dag n yaa kãntɩɩg a yembr la pʋɩ-sʋka. 33B maana naoã tɩ yaa wa saar nao. B gãtsã ne b zãnt-rãmbã#7.33 Zãnt-rãmba: Yaa bũmb b sẽn maan ne raado, wall ne kutu tɩ yaa gilga, n ning teroko, weefo, sarɛta bɩ zirga. ne b reyõ-rãmbã,#7.33 Reyõ-rãmba: Yaa raad bɩ kud-bãanese, b sẽn dɩk n ning zãntã n tɩ sok ne gãtgã sẽn be zãntã sʋkã. n paas b moyo-rãmbã#7.33 Moyo-rãmba: Yaa bũmb ning sẽn be zãntã sʋkã, tɩ reyõ-rãmbã gãd n tɩ gaag ne zãntã. fãa maana ne kutu. 34Terok fãa rag n tara sogs a naas sẽn naag ne terokã meng n yõge. 35La terokã zugu, tẽgdg sẽn yaa gilg n dag n be be, t'a zãntlmã zems kãntɩɩg pʋɩ-sʋka. La terokã zugu, b naaga tebendsã ne a kud-paklsã n yõge. 36La b gʋla serubẽ-rãmba, gɩgma ne koms tɩɩs naana terokã zugu, ne a tebendsã zutu, la b gʋl tɩ-puud n gilg a zãngã. 37Yɩɩ a woto la a Hiram maan terok-rãmb piigã tɩ b wẽnd taaba: Kutã yaa bũmb a yembre, la b magbã ne b yalẽ wã fãa yaa yembre.

38 # Yik 30.17-21 A Hiram maana zũud sĩn-bi piiga. La sĩn-bil a yembr fãa tõe n deega ko-yʋy pis-naase. La a yembr fãa zãntlem tata kãntɩɩg a naase. La terok fãa zugu, sĩn-bil a ye n dog be. 39Yẽnda rɩka terok-rãmb a nu n ning Sẽn-Ka-Saab roogã rɩtgo, la a nu n ning roogã goabga. La a rɩka sĩn-bedrã n ning roogã rɩtgo, n tees wĩndg sẽn pukdẽ sẽnẽ.

40A Hiram maana laase, ne pɛll-dãmba#7.40 Pɛll-dãmba: Yaa teed b sẽn maan tɩ yaa paklse. B tõe n bool-b lame me tɩ kardo. ne zɩɩm mesb laase. A Hiram maana tʋʋm nins rĩm a Salmo sẽn yeel-a t'a maan Sẽn-Ka-Saab roogã yĩngã n sɛ. 41Yẽnda maana ra-lugds a yiibu, la a maan pugli n dogl ra-lugdsã zutu. La a maan gãmba a yiib n lud pugli wã sẽn be ra-lugdsã zutã. 42La yẽnda maana te-neeb sẽn wẽnd gernaade. 43La yẽnda maana sĩn-bi piigã n dogl terok-rãmb piigã zutu, 44la a maana sĩn-bedrã n dogl lols piig la a yiibã zutu, 45ne tompeglem laasã, ne pɛll-dãmbã la ne zɩɩm mesb laasã. Teed nins fãa a Hiram sẽn maan n kõ rĩm a Salmo Sẽn-Ka-Saab roogã yĩngã maana ne zũud halaale.

46Yaa Zʋrdẽ tẽn-nabdrã zug la rĩm a Salmo kɩt tɩ b yẽneg zũudã yak pʋg n maan te-bãmba. Zĩ-kãng bee Sʋkot ne Sartan sʋka. 47Rĩm a Salmo kɩtame tɩ b maan teedã fãa n ka bao n na n mak zũudã n bãng a zɩslem, teedã sẽn yaa wʋsgã yĩnga. 48#Yik 30.1-3, Yik 25.23-30Rĩm a Salmo leb n maana Sẽn-Ka-Saab roogã teed a taabã me. Yaa sãnem tẽn-kugrã, sãnem taabl ning b sẽn dogend kaset burã a zugã. 49#Yik 25.31-40B talla sãnem halaal n maan fɩtl dogends piiga, n ning a nu ro-taoorã sẽn yaa zĩig sẽn welg toor n yɩɩdã rĩgnoorã rɩtgo, la b ning a nu goabga, ne tɩ-puudã, la fɩtl-dãmbã ne b sãnem gãtsã, 50ne la-bãoonegã, la sʋʋsã, ne zɩɩm mesb laasã, ne tʋgdã, la wisd yõogr laasã sẽn maan ne sãnem halaalã, ne sãnem kʋɩlems wẽnemdedse, ro-taoorã sẽn yaa zĩig sẽn welg toor n yɩɩdã yĩnga, la ro-yɩngã kʋɩlemsã fãa yaa sãnem.

51 # 2Sãm 8.11, 1Kib 18.11 Yɩɩ woto la b maan tʋʋm nins fãa rĩm a Salmo sẽn kɩt tɩ b maan Sẽn-Ka-Saab roogã yĩngã n sɛ. Rĩm a Salmo rɩka wanzuri wã ne sãnemã la teed nins a ba a Davɩɩd sẽn dag n welg toor Sẽn-Ka-Saab yĩngã, n tall-b n wa bĩng Sẽn-Ka-Saab roogã laog bĩngr zĩigẽ.

Currently Selected:

1 Rĩm-dãmbã 7: MPBU

Highlight

Copy

Compare