1 Rĩm-dãmbã 4
4
Rĩm a Salmo tʋmtʋmdbã
1Rĩm a Salmo rag n yaa Israyɛll nebã fãa rĩmã. 2Rĩm a Salmo kug-zĩidbã la woto: Yaa maan-kʋʋd a Azariya sẽn yaa a Sadok biigã, 3ne a Sɩsa kambã, a Elikorɛf ne a Akiya, bãmb dag n yaa seb-gʋndba, ne a Akiluud biig a Zozafate, sẽn yaa seb-bĩngda. 4La yaa a Zehozada biig a Benaya n yaa tãb-biisã naaba. A Sadok ne a Abiyataar n yaa maan-kʋʋdbã. 5A Natã biig a Azariya n yaa kombɛɛmbã taoor soaba. A Natã biig a Zabuud n dag n yaa rĩmã maan-kʋʋda, n yaa rĩmã meng zoa. 6A Akisaar n dag n yaa rĩmã sõgen-kãsenga. A Abda biig a Adoniram n dag n yaa tʋʋm-wɛglã taoor soaba.
7Rĩm a Salmo rag n tara kombɛɛmb piig la a yiib Israyɛll soolmã fãa pʋgẽ. Yaa bãmb n dag n get rĩmã ne a zakã rãmb rɩɩb yelle. La yʋʋmd pʋgẽ, bãmb ned kam fãa rag n tog n dɩlga rĩmã zakã kiuug a yembre.
8Ad kombɛɛmbã yʋyã: Yaa a Ʋʋr biigã n dag n so tẽng ning sẽn be Efrayiim tãmsã sʋkã.
9A Dekɛɛr biigã n dag n so Maka ne Saalbim, la Bɛt-Semees ne Elõ-Bɛt-Hanan tẽmsã.
10A Hesɛɛd biigã sẽn be Arubot tẽngã, n dag n so Soko ne Hefɛɛr tẽmsã zãnga. 11A Abinadaab biigã n dag n so Door tẽngã zĩis nins sẽn yaa kunkubã zãnga. A Salmo bi-pugl a Tafat n dag n yaa yẽnda paga.
12A Akiluud biig a Baana n dag n so Taanak ne Megido, la yẽnda n so Bɛt-Seyãn sẽn pẽ Sartan sẽn be Yiizreyɛll sɛɛgã fãa. Yẽnda soolmã sɩngda Bɛt-Seyãn n tall n tɩ tãag Abɛll-Mehola n tɩ tãag Zokmeyam zugẽ.
13A Gebɛɛr biigã sẽn be Ramot sẽn yaa Galaad tẽngã, n dag n so a Manaase biig a Yayɩɩr tẽn-bãoonegã sẽn be Galaadã. Leb n yaa yẽnda n dag n so Argoob soolmã sẽn be Basan tẽngã. Beenẽ yaa tẽn-bɛd pis-yoob sẽn gũbg ne lalse, ne noy sẽn pagd ne zũud kʋɩlen-kuyã.
14A Ido biig a Akinadaab n dag n so Mahanayim. 15A Akimaas n dag n so Neftali. Yẽnda me dag n peega a Salmo biig a Basmat n maan a paga.
16A Husayi biig a Baana n dag n so Asɛɛr ne Beyalot soolmã.
17A Paruwa biig a Zozafat n dag n so Isakaar soolmã.
18A Ela biig a Simeyi n dag n so Benzame soolmã.
19A Uuri biig a Gebɛɛr sẽn dag n be Galaad soolmã, n dag n so Amoor-dãmbã rĩm a Sihon, ne Basan rĩm a Oog soolmã. Dag n yaa komber a yembr bal n so soolem-kãnga.
20Zʋʋda ne Israyɛll nebã sõor dag n yaa wʋsg wa bĩisrã sẽn be ko-kãsengã noorã. Bãmb dag n dɩtame la b yũuda, la b maand sũ-noogo.
Currently Selected:
1 Rĩm-dãmbã 4: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
