1 Korẽnt‑rãmbã 12
12
Sɩɩg-sõng kũunã
(Efɛ 4.4-16, Rom 12.3-8)
1M ba-biisi, mam ka rat tɩ yãmb zĩnd zɩɩlem pʋgẽ Sɩɩg-sõng kũunã yell wɛɛngẽ ye. 2Yãmb mii yãmb sẽn dag n ket n yaa nin-zaalse, tɩ yãmb sũyã loe ne wẽn-naands sẽn yaa mugsi, tɩ y ka tõe n lak ne-bã. 3Yaa rẽ yĩng tɩ mam yet yãmb tɩ ned ka be, Wẽnnaam Sɩɩgã sẽn na n tus-a t'a yeel tɩ kãab wẽng n be a Zeezi zug ye. La ned baa a yembr me ka tõe n yeel t'a Zeezi yaa Zu-soaba, sã n ka Sɩɩg-sõng n kɩt t'a yeel ye.
4 #
Rom 12.6-8
Kũunã yaa toay-toaya, la yaa Sɩɩg a yembr n kõte. 5Tʋʋmã sẽn tʋmd to-to wã yaa toay-toaya, la yaa Zu-soab a yembr yĩng la b tʋmda. 6Tʋʋmã yaa toay-toaya, la yaa Wẽnnaam a yembr n tʋmd fãa nebã fãa pʋse.
7Sɩɩgã belem pukda ned kam fãa vɩɩmẽ, nebã fãa sõngr yĩnga. 8Sɩd me, Wẽnnaam Sɩɩgã kõta ned a yembr yam gomde, n kõ ned a to bãngr gomde, la yaa Sɩɩg a yembr n maand rẽ. 9Sɩ-kãng kõta ned a to tẽebo, n kõ ned a to maagr kũuni, la yaa Sɩɩg a yembre. 10Wẽnnaam Sɩɩgã kõta ned a to bõn-bãn maaneg kũuni, n kõ ned a to pĩnd-n-bãngr gomde, n kõ ned a to pãn-tõog tɩ bãng sɩɩsã n welg taaba, n kõ ned a to gom-zẽn buud toay-toaya, la ned a to gom-zẽn deesgo. 11Yaa Sɩɩg a yembr tãa n maand bõn-kãensã fãa, n pʋɩt kũunã n kõt ned kam fãa wa b sẽn data.
12 #
Rom 12.4,5 Sɩd me, a wa yĩng sẽn yaa yembr n yaool n tar wil wʋsgã, la tɩ yĩngã wilã, baa ne b sẽn yaa wʋsgã b yaa yĩng a yembr balã, Kiris me yaa a woto bala. 13Bala, yaa Sɩɩg a yembr pʋgẽ la b lis tõnd fãa, Zʋɩf-rãmba, sẽn ka-b Zʋɩf-rãmba, yembse, burkĩmba, tɩ d tõe n lebg yĩng a yembre. La tõnd fãa yũu Sɩɩg a yembr n yiis d ko-yũudu.
14Woto, yĩng ka will a yembr bal ye, yaa wil wʋsgo. 15Naoor sã n yeel tɩ yẽnda sẽn ka nugã yĩnga, yẽnda ka yĩngã willi, rẽ ka kɩtd t'a ka yĩngã will ye. 16La tʋbr sã n yeel tɩ yẽnda sẽn ka nifã yĩnga, yẽ ka yĩngã willi, rẽ ka kɩtd t'a ka yĩngã will ye. 17Yĩngã tõr sã n dag n yaẽ nifu, tʋbr da na n bee yɛ? La fãa sã n dag n yaẽ tʋbre, yõor da na n bee yɛ? 18Ad Wẽnnaam ninga wilã yĩngã pʋgẽ wa b sẽn data. 19Yĩngã tõr sã n dag n yaẽ will a yembre, yĩngã meng da na n beẽ la yɛɛnẽ? 20Woto wã, yĩngã wil yaa wʋsgo, la yaa yĩng a yembre. 21Nif ka tõe n yeel nug t'a ka rat a sõngr ye, la zug ka tõe n yeel nao t'a ka rat b sõngr ye. 22Ayo, ka woto ye, yĩngã wil nins sẽn wẽnda b pãngã ka ta b taabã, n tar yõod yĩngã pʋgẽ. 23La wil nins tõnd sẽn get tɩ b ka be waoogr n ta b taabã, tõnd waoogd-b lame n yɩɩda. Woto, yĩngã wil nins sẽn ka togd ne gesgã, tõnd geta b yell sõama, 24la wil nins sẽn sakd gesgã ka baood tɩ d ges b yell woto ye. Wẽnnaam sẽn ning yĩngã wilã to-to wã, b kɩtame tɩ wil nins sẽn ka tar waoogrã na paam waoogre, 25tɩ welgr da wa n zĩnd yĩngã pʋgẽ ye, la tɩ wilã me na ges taab yelle. 26Yĩngã will a yembr sã n namsdẽ, wil a taabã fãa naaga yẽnda n namsdẽ. La a yembr sã n paam waoogre, b fãa naagda yẽnda n kɩdemdẽ.
27Yãmb yaa Kirisã yĩnga, la yãmb ned kam fãa yaa bãmb yĩngã wila. 28#Efɛ 4.11Wẽnnaam ninga neb b roogẽ wã: pipi rãmb yaa tẽn-tʋmdbã, tɩ Wẽnnaam no-rɛɛsdbã ya yiib rãmba, tɩ karen-saam-dãmbã ya tãab rãmba. Rẽ poore, bõn-bãn maaneg kũun n be, tɩ maagr kũuni, sõngr kũuni, lʋɩ neb taoor kũuni, gom-zẽn buud toay-toay kũun n pʋgda. 29Dẽ yĩnga, nebã fãa yaa tẽn-tʋmdb la? B fãa yaa Wẽnnaam no-rɛɛsdb la? B fãa yaa karen-saam-dãmb la? B fãa maanda bõn-bãn la? 30B fãa tara maagr kũun la? B fãa gomda gom-zẽn la? B fãa reesda gom-zẽn la?
31Bao-y kũun nins sẽn yaa sõama n yɩɩdã. La mam na n wilga yãmb sor sẽn yɩɩd a taaba fãa.
Currently Selected:
1 Korẽnt‑rãmbã 12: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
