1 Korẽnt‑rãmbã 1
1
Pʋʋsem
1Maam a Polle, sẽn paam-a boolg tɩ yɩ a Zeezi Kiris tẽn-tʋmda, wa sẽn zems ne Wẽnnaam daabã, ne ba-biig a Sostɛn n gʋlsd seb-kãngã, 2#Tʋʋm 18.1n na n tʋm Wẽnnaam tẽedbã sẽn be Korẽntã. Bãmb yaa neb sẽn welg toor Kiris maasem yĩnga, tɩ b tõe n yɩ pʋ-peelem dãmba. Sebrã yaa neb nins fãa sẽn pʋʋsd ne tõnd Zu-soab a Zeezi Kiris yʋʋre, baa b sẽn be zĩig ninga yĩnga. A Zeezi Kiris yaa bãmb Zu-soaba, la tõnd me Zu-soaba. 3Bɩ tõnd ba a Wẽnnaam ne Zu-soab a Zeezi Kiris ning yãmb zut barka, la b kõ yãmb laafɩ.
Bark pʋʋsem, Wẽnnaam Sɩɩg-sõng kũunã yĩnga
4Mam sã n tagsd yãmb yelle, mam pʋʋsda Wẽnnaam bark wakat fãa, b sẽn ning yãmb zut bark a Zeezi Kiris pʋgẽ wã yĩnga. 5Tɩ yãmb paam bũmb fãa wʋsgo, sã n yaa goamã wall bãngr fãa. 6Bala, Kiris kasetã kɩɩ yẽg yãmb pʋgẽ sõama. 7Woto, yãmb sẽn gũud tõnd Zu-soab a Zeezi pukrã, kũun baa a yembr ka paoog yãmb ye. 8Bãmb na n kɩtame tɩ y yals kãenkãe a woto hal tɩ wakat ta, tɩ rõadg kõn zĩnd yãmb zut tõnd Zu-soab a Zeezi Kiris daarã#1.8 Zu‑soab a Zeezi Kiris daarã: B boonda a Zeezi Kiris waoongã daar tɩ Zu‑soab Kiris daare. ye. 9Wẽnnaam, sẽn bool-a yãmb tɩ y paam lagem-n-taar ne bãmb Bi-ribl a Zeezi Kiris sẽn yaa tõnd fãagdã, bãmb yaa maan-sɩd soaba.
Dẽ yĩnga, Kiris welgame la?
10M ba-biisi, mam bõosda yãmb ne tõnd Zu-soab a Zeezi Kiris yʋʋre, tɩ y kɩt tɩ y goamã tũud taaba, tɩ welgr da zĩnd yãmb sʋk ye. Zems-y taab sõama ne yam a yembre, tagsg a yembr pʋgẽ. 11Bala, m ba-biisi, a Kolowe nebã wilga maam tɩ ka-wʋm-taab n be yãmb sʋka. 12#Tʋʋm 18.24Mam wʋmdame tɩ yãmb ned fãa yetame tɩ yẽnda yaa a Poll neda, wall a Apoloos neda, wall a Sefaas neda, wall Kiris neda. 13Kiris welgame la? Dẽ, b kaa a Poll da-pɩk zug yãmb yĩng la? Bɩ yaa ne a Poll yʋʋr la yãmb paam lisgu? 14#Tʋʋm 18.8, Tʋʋm 19.29, Rom 16.23Mam pʋʋsda Wẽnnaam barka, mam sẽn ka lis yãmb ned baa a yembre, sã n ka a Kirispuus la a Gayuusã. 15Woto, ned baa a yembr ka tõe n yeel tɩ b lisa yãmb ne mam yʋʋr ye. 16#1Kor 16.15Mam lisa a Ɛstefanas zaka rãmba, la mam ka mi m sã n lisa ned a to me ye.
Kiris yaa Wẽnnaam pãng la b yam
17Bala, Kiris ka tʋm maam tɩ m kẽng n lis neb ye, la yaa tɩ moon koe-noogã. Ka tɩ moon-a ne gom-minim, tɩ m ra wa n kɩt tɩ Kiris ra-pɩkã lebg bõn-yaalg ye. 18Bala, da-pɩkã koɛɛgã yaa yalemd ne neb nins sẽn sãamd-bã la ne tõnd dãmb sẽn paam fãagrã, a yaa pãng sẽn yit Wẽnnaam nengẽ. 19#Eza 29.14Rẽnda n kɩt tɩ b gʋls n yeele:
Mam na n sãama yam dãmba yam,
la m kɩt tɩ neb nins sẽn tar bãngr lebg zaalem.
20 #
Zoob 12.17, Eza 19.12, 33.18,
Eza 44.25
Yam soabã bee yɛ? Tõog karen-saambã bee yɛɛnẽ? Zamaan‑kãngã no-koɛɛm wẽedã bee yɛ? Dẽ yĩnga, Wẽnnaam ka kɩt tɩ dũni yam lebg yalemd sɩda? 21Bala, dũni wã sẽn ka tũnug Wẽnnaam yamã n bãng bãmbã, a meng yamã pʋgẽ wã yĩnga, a taa Wẽnnaam yam tɩ tall koe-moonegã yalemda n fãag neb nins sẽn tẽedã. 22Zʋɩf-rãmbã kotame tɩ b maan bõn-bãna, tɩ Gɛrk-rãmbã baood yam. 23La tõnd moonda Kiris ning b sẽn ka da-pɩk zugã. Koe-kãng yaool n yaa bõn-lakdg ne Zʋɩf-rãmbã, la a ya yalemd ne buud a taabã. 24La sã n yaa ne neb nins sẽn paam-b boolgã, tɩ b yaa Zʋɩf tɩ b yaa Gɛrke, koɛɛgã yaa pãng sẽn yit Wẽnnaam nengẽ, yam sẽn yit Wẽnnaam nengẽ. 25Bala, bũmb ning sẽn yaa yalemd ne Wẽnnaamã yaa yam n yɩɩd ninsaalbã, la bũmb ning sẽn yaa pãn-komsem ne Wẽnnaam tara pãng n yɩɩd ninsaalbã.
26M ba-biisi, ges-y yãmb sẽn dag n yaa bũmb nins wakat ning b sẽn bool yãmba, sẽn ya-b yam dãmb wa neb sẽn yetã ka waoog yãmb sʋk ye. Pãng rãmb ka waooga, naam roog neb me ka waooga. 27La Wẽnnaam yãka dũni bũmb nins sẽn yaa yalemdã n na n ning yam dãmb yãnde. Wẽnnaam yãka dũni bũmb nins sẽn yaa pãn-komsmã n na n ning pãens rãmbã yãnde. 28Wẽnnaam dɩka dũni bũmb nins sẽn ka yõodã, bũmb nins nebã sẽn ka nandã, bũmb nins sẽn ka be wa, n na n kɩt tɩ sẽn be-bã lebg zaalem, 29tɩ ned baa a yembr da waoog a meng Wẽnnaam taoor ye. 30Yaool n yaa Wẽnnaam n kɩt tɩ yãmb be a Zeezi Kiris pʋgẽ, Wẽnnaam kɩtame tɩ Kiris lebg tõnd yam, la d tɩrlem, la d welg-toore, la d fãagre, 31#Zer 9.23t'a wa b sẽn gʋlsã:
Bɩ ned ning sẽn waoogd a menga,
waoog a meng Zu-soabã pʋgẽ.
Currently Selected:
1 Korẽnt‑rãmbã 1: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
