1 Kibayã 28
28
A Davɩɩd yãka a Salmo t'a led yẽnda zĩigẽ
1A Davɩɩd tigma Israyɛll nanambsã fãa Zeruzalɛm: yaa buudã kãsem-dãmba, ne sulã nanambs nins fãa sẽn dag n tʋmd rĩmã yĩngã, la tãb-biis tusr-tusr ne tãb-biis koabg-koabg nanambsã, n paas neb nins sẽn dag n get rĩmã laog fãa ne rĩmã rũmsã la a kom-dibli wã yellã, la a zakã zu-soben-dãmbã ne gãndaadã ne gãnda-sãeemsã fãa gilli. 2#2Sãm 7.1-16, 1Kib 17.1-14Rĩm a Davɩɩd yik n yalsame yeele: «M saam-biis la m nebã, kelg-y-yã! Mam dag n data ne m sũur fãa, n me roog sẽn yaa vʋʋsg zĩig Sẽn-Ka-Saab kaoolã koglgã yĩnga, tɩ yɩ tõnd Wẽnnaamã nao roagendga, la m dag n segendame n na n me-a. 3La Wẽnnaam yeela maam yaa: ‹Ka na n yɩ foom n na n me roog mam yʋʋrã yĩng ye. Bala, fo yaa ned sẽn zab zaba, la fo raaga zɩɩm wʋsgo.› 4Sẽn-Ka-Saab sẽn yaa Israyɛll Wẽnnaamã yãka maam m buudã fãa sʋka, tɩ m tõe n yɩ Israyɛll rĩm wakat fãa yĩnga. Bala, bãmb yãka a Zʋʋda t'a yaa naaba, la b yãka maam Zʋʋda buudã sʋka. La mam ba wã kom-dibli sʋka, taa bãmb yam tɩ b yãk maam tɩ m yɩ Israyɛll nebã fãa rĩmã. 5Sẽn-Ka-Saab kõo maam kom-dibli wʋsgo, la bãmb fãa sʋka, yaa mam biig a Salmo la b yãk t'a na n zĩnd Sẽn-Ka-Saab soolmã zaoorẽ, n yɩ Israyɛll rĩmã. 6Bãmb yeela maam yaa: ‹Yaa fo biig a Salmo n na n me m doogã ne m zagsã. Bala, mam yãka yẽnda t'a na n yɩ m biiga, la mam na n yɩɩ yẽnda ba. 7Yẽnda sã n kell n sak mam tõodã ne m noyã wa a sẽn maand rũndã wã, mam na n kɩtame tɩ yẽnda naamã tall pãng wakat fãa yĩnga.› » 8Moasã, Israyɛll nebã fãa sẽn yaa Sẽn-Ka-Saab nebã taoore, la tõnd Wẽnnaamã taoore, bɩ y sak Sẽn-Ka-Saab sẽn yaa yãmb Wẽnnaamã tõod fãa. Woto, yãmb na n sooga tẽn-kãngã sẽn yaa tẽn-noogã, la a na n yɩɩ yãmb yagensã sẽn na n wa led yãmb zĩigẽ wã pʋɩɩre, wakat sẽn ka sɛt yĩnga. 9La foom m biig a Salmo, bɩ f bao tɩ bãng f ba wã Wẽnnaam. Maan bãmb tʋʋmdã ne f sũur fãa zãnga, maan-a ne yamleoogo. Bala, Sẽn-Ka-Saab feesda ned kam fãa sũuri, la a tagsgo. Fo sã n bao bãmba, b na n basame tɩ f yã bãmba. La fo sã n bas bãmba, bãmb me na n basa foom wakat sẽn ka sɛt yĩnga. 10Gese, moasã, Sẽn-Ka-Saab yãka foom, tɩ f tõe n me roog sẽn yaa zĩ-sõngo. Paam daood n tʋme.
A Davɩɩd rɩka Wẽnd doogã naand n kõ a Salmo
11A Davɩɩd rɩka yɩng roogã ne a meng rotã naande, la laogã bĩngr dot ne yĩngr do-gãasã, la pʋgẽ dotã ne yel-wẽnã sugr kũun doogã naande, n kõ a biig a Salmo. 12A kõ-a-la bũmb nins fãa sẽn kẽed ne Sẽn-Ka-Saab zakã meebã naande, ne Sẽn-Ka-Saab laogã la teed nins sẽn welg toor Sẽn-Ka-Saab yĩngã bĩngr dotã naand me. 13A Davɩɩd leb n kõ a Salmo maan-kʋʋdbã ne Leevi nebã sõor sebre, la tʋʋm nins fãa sẽn tog n maan Sẽn-Ka-Saab roogã, ne teed nins fãa b sẽn tog n tall n tʋm Sẽn-Ka-Saab roogã pʋgẽ wã fãa. 14A Davɩɩd wilga a Salmo sãnemã sẽn sekd teed nins fãa sẽn tog n maan ne sãnemã zɩslem, la wanzuri wã sẽn sekd teed nins fãa sẽn tog n maan ne wanzuri wã zɩslem me. 15A leb n wilga a Salmo sãnem fɩtl dogendsã ne b sãnem fɩtl-dãmbã zɩslem sẽn tog n yɩ to-to, la a wilg fɩtl doagendg fãa ne a fɩtl-dãmbã zɩslem sẽn tog n yɩ to-to. A leb n wilg-a-la wanzuri fɩtl dogendsã ne b wanzuri fɩtl-dãmbã zɩslem sẽn tog n yɩ to-to me, la a wilg fɩtl doagendg fãa ne a fɩtl-dãmbã zɩslem sẽn tog n yɩ to-to, wa sẽn zems fɩtl doagendg fãa ne a tʋʋmde. 16A Davɩɩd wilga a Salmo sãnemã b sẽn na n tall n maan kaset burã taabl-dãmbã zɩslem, la wanzuri wã b sẽn na n tall n maan wanzuri taabl-dãmbã zɩslem, 17la sãnem halaalã b sẽn na n tall n maan nemd kõsdsã, ne zɩɩm mesb laasã la lagdã, ne sãnem la wanzuri sĩmsã zɩslem, 18n paas sãnem halaalã b sẽn na n tall n maan wisdã tẽn-kugrã zɩslem. A kõ-a-la saarã ne sãnem serubẽ-rãmbã sẽn tẽeg b pɩgsã n lud Sẽn-Ka-Saab kaoolã koglgã naand sẽn tog n yɩ to-to. 19A Davɩɩd yeelame yaa: «Yaa Sẽn-Ka-Saab meng n gʋls ne b nugu, n bilg maam bõn-kãensã fãa, la m sẽn tog n maan bũmb fãa wa sẽn zems a naande.»
20A Davɩɩd yeela a Salmo yaa: «M biiga, keng f meng n paam daood n tʋme. Ra zoe rabeem ye, ra yɛɛs ye. Bala, Wẽnnaam Sẽn-Ka-Saab sẽn yaa mam Wẽnnaamã na n zĩnda ne foom. Bãmb ka na n zãag b meng ne foom, bãmb ka na n bas foom, hal tɩ Sẽn-Ka-Saab roogã meeb tʋʋmd fãa wa sɛ. 21Ade, maan-kʋʋdbã ne b sula, la Leevi buudã ne b sul sẽn na n maand tʋʋmã buud fãa Wẽnnaam doogã pʋgã la woto. Roogã meeb tʋʋmd fãa yĩnga, tʋʋm-mitb sẽn kõ b meng ne yamleoog tʋʋmã buud toay-toayã yĩngã na n bee fo sɛɛgẽ. Nanambsã ne nebã fãa me bee ka n na n maan bũmb nins fãa fo sẽn na n yeel-b tɩ b maane.»
Currently Selected:
1 Kibayã 28: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
