1 Kibayã 19

B paooga a Davɩɩd sẽn tʋm-b rãmbã

(2Sãm 10.1-5)

1Dẽ poore, Amo nebã rĩm a Nakaas kiime, t'a biigã led a zĩigẽ n lebg rĩmã. 2A Davɩɩd yeelame: «Mam na n maana a Nakaas biig a Hanun neere, bala, yẽnda ba wã rag n maana maam neere.» Dẽ, a Davɩɩd tʋma neb tɩ b kẽng a Hanun nengẽ n tɩ pʋʋs-a, a ba wã sẽn maan kaalmã yĩnga. Woto, a Davɩɩd zakã nebã ta a Hanun nengẽ Amo nebã tẽngẽ n na n pʋʋs-a, 3la Amo nebã na-biisã yeela a Hanun yaa: «Yãmb tẽedame tɩ yaa yãmb ba wã waoogr yĩng la a Davɩɩd sẽn tʋm nin-bãmbã tɩ b wa pʋʋs yãmbã bɩ? Yãmb ka tagsd t'a Davɩɩd nebã sẽn wa yãmb nengẽ wã yaa sẽn na n yɩl n ges tẽngã n bãng a yell sõama, n wa tõog n sãam-a sɩda?» 4Dẽ, a Hanun kɩtame tɩ b yõg a Davɩɩd nebã n põng b toeemsã, la b wõrs b futã n bas b seesã yɩnga, n yaool n bas-b tɩ b looge. 5B wa n togsa a Davɩɩd bũmb ning b sẽn maan nin-bãmbã wã, la yẽnda tʋma ned t'a kẽng n tɩ seg-ba, bala, nin-bãmbã sɩd dag n bee yãn-kẽeng pʋga. Rĩmã tʋmame tɩ b tɩ yeel-b yaa: «Pa-y Zeeriko hal tɩ y toeemsã yi, tɩ y yaool n wa.»

Zabr ne Amo nebã la Siiri nebã

(2Sãm 10.6-19)

6Amo nebã yãame tɩ b beega a Davɩɩde. Dẽ, a Hanun ne Amo nebã baoo wanzuri ligd-koeems tusri, n tʋm tɩ b tɩ bao saar-dãmb ne wed-rʋʋdb Siiri nebã sẽn be Mezopotami wã nengẽ, la sẽn be-b Maaka ne Soba wã nengẽ me. 7Woto, b baoo zabr saar-dãmb tus pis-tã la a yiibu, n paas Maaka rĩmã ne a nebã, tɩ b kẽng n tɩ tilg b tãb-sik Medba sɛɛgẽ. Amo nebã yii b tẽmsẽ wã n tigim taab n na n tɩ zabe.

8A Davɩɩd sẽn wʋm bõn-kãnga, a tʋma a Zoaab ne a tãb-biis nins sẽn yaa gãndaadã gilli. 9Woto, Amo nebã boba b zab-teed n yi n yals tẽngã noore. Wakat-kãnga, rĩm-dãmb nins sẽn wa n na n sõng bãmb n zabã yalsa weoogã pʋga.

10A Zoaab yãame tɩ zabrã yaa zĩis a yiibu, poorẽ la a taoore. Dẽ, yẽnda yãka Israyɛll tãb-biis nins sẽn ya-b gãndaadã, tɩ b na n na n teedg n zab ne Siiri nebã, 11n yaool n bas tãb-biis a taabã ne a ba-biig a Abisayi, tɩ bãmb me na n teedg n zab ne Amo nebã. 12A Zoaab yeela a Abisayi yaa: «Siiri nebã sã n wa rat n tõog maam, bɩ f wa sõng-ma. La Amo nebã sã n wa rat n tõog foom, mam me na n wa sõnga foom. 13Keng f menga, d keng d meng n zab d nebã yĩnga, la d Wẽnnaamã tẽms yĩnga. La bɩ Sẽn-Ka-Saab maan b raabo!» 14Woto, a Zoaab ne a tãb-biisã kolgame n na n zab ne Siiri nebã, la Siiri nebã zoeeme n na n põs bãmba. 15Amo nebã sẽn yã tɩ Siiri nebã zoeeme, bãmb me zoeeme, sẽn na yɩl n põs a Zoaab ba-biig a Abisayi, la b kẽe tẽngã pʋga, la a Zoaab lebg n leba Zeruzalɛm.

16Siiri nebã sẽn yã tɩ Israyɛll nebã tõoga bãmba, b tʋma neb tɩ b tɩ tigim b nebã sẽn be Efrat kʋɩlgã rʋʋndã. A Hadadezɛɛr tãb-biis naab a Sofak n dag n lʋɩ bãmb taoore. 17La b tɩ togsa a Davɩɩd bõn-kãnga, la yẽnda tigma Israyɛll nebã fãa, n tall-b n dʋʋg Zʋrdẽ kʋɩlgã, n na n tɩ seg bãmba. A Davɩɩd ne a nebã sũu tãp n zab ne Siiri nebã, la Siiri nebã yika zabr ne bãmba. 18La yɩɩ tɩlɛ tɩ Siiri nebã zoe n na n põs Israyɛll nebã. A Davɩɩd ne a nebã kʋʋ bãmb wed-rʋʋdb tus a yopoe, la b tãb-biis nins sẽn kẽnd ne naoã bãmb tus pis-naase. A kʋʋ bãmb tãb-biis naab a Sofake. 19Nanambs nins sẽn dag n yaa a Hadadezɛɛr yembsã sẽn wa n mik tɩ Israyɛll nebã tõogda bãmba, b yõga zood ne a Davɩɩde, n lebg a Davɩɩd yembse. Siiri nebã me ka leb n dat n sõng Amo nebã n zab ye.

Currently Selected:

1 Kibayã 19: MPBU

Highlight

Copy

Compare