1 Kibayã 11
11
A Davɩɩd lebga Israyɛll dĩma
(2Sãm 5.1-3)
1Israyɛll nebã fãa tigma taab a Davɩɩd nengẽ Ebrõ n yeel-a yaa: «Tõnd ne yãmb yaa bũmb a yembre. 2A Sayull sẽn dag n yaa rĩmã wakate, yaa yãmb n dag n luɩt Israyɛll nebã taoor wakat fãa tɩ b kẽnd n zabdẽ, la y lʋɩt b taoor tɩ b lebg n wa.» Sẽn-Ka-Saab sẽn yaa yãmb Wẽnnaamã yeela yãmb yaa: «Foom n na n yɩ Israyɛll sẽn yaa mam nebã pe-kɩɩma. Foom n na n lebg Israyɛll sẽn yaa mam nebã naaba.» 3Woto, Israyɛll kãsem-dãmbã fãa waa rĩm a Davɩɩd nengẽ Ebrõ, la a Davɩɩd maana kaool ne bãmb Sẽn-Ka-Saab taoor Ebrõ. Bãmb pʋdga a Davɩɩd zug rĩung kaam t'a lebg Israyɛll rĩmã, wa Sẽn-Ka-Saab sẽn dag n yeel a Sãmwɛll t'a togsã.
A Davɩɩd zab n deega Zeruzalɛm
(2Sãm 5.6-10)
4 #
Zoz 15.63, Bʋ 1.21 A Davɩɩd ne Israyɛll nebã fãa kẽname n na n tɩ kẽ Zeruzalɛm, sẽn dat n togs tɩ Zebuusi. Yaa beenẽ la Zebuus nebã rag n be. 5Zebuus nebã yeela a Davɩɩd yaa: «Yãmb ka na n kẽ ka ye!» La a Davɩɩd zab n deega Sɩyõ tẽngã pãng zĩiga, sẽn dat n togs t'a Davɩɩd tẽngã. 6A Davɩɩd dag n yeelame: «Ned ning sẽn na n yɩ-a pipi n tõog Zebuus nebã, yẽnda soab n na n lebg tãb-biisã naaba.» Dẽ, a Seruya biig a Zoaab n yɩ pipi n yik zabrã, la a lebga tãb-biisã naaba. 7A Davɩɩd zĩnda tẽngã pãng zĩigẽ. Yaa rẽ yĩng n kɩt tɩ b bool tẽn-kãng t'a Davɩɩd tẽnga. 8Yẽnda meeme n gilg tẽngã, sẽn sɩng ne Milo zĩigã ne zĩis nins sẽn pẽ be wã. A Zoaab n lebs n me tẽngã zĩis a taabã. 9A Davɩɩd dag n paamda pãng n paasdẽ, la Saasẽ-Pãng-Soabã rag n bee ne yẽnda.
A Davɩɩd gãndaadã
(2Sãm 23.8-39, 1Kib 27.2-15)
10Ad a Davɩɩd gãndaadã nanambse. Bãmb dag n naaga Israyɛll nebã fãa n sõng yẽnda a naamã baoob wakat t'a lebg rĩmã, wa sẽn zems Sẽn-Ka-Saab sẽn dag n gom Israyɛll wɛɛngẽ wã. 11A Davɩɩd gãndaadã la woto:
Yaa a Hakmoni biig a Yasobeyam sẽn yaa gũudbã naabã. Yaa a Yasobeyam n dag n dɩk a kãnd n kʋ neb kobs-tã wakat a yembrã.
12Sẽn pʋgd yaa Akoka tẽng rao a Dodo biig a Eleyazaar sẽn yaa gãndaad a tãabã sʋk ned a yembrã. 13Yẽnda n dag n be ne a Davɩɩd Pas-Damim sẽn yaa zĩig ning Filistẽ-dãmbã sẽn tigim taab zabrã yĩngã. Oorz pʋʋg n dag n be zĩ-kãngã. Israyɛll nebã rag n zoetame n na n põs Filistẽ-dãmbã. 14A Eleyazaar ne a nebã yalsa pʋʋgã tẽn-sʋk n zab n deeg-a, la b tõoga Filistẽ-dãmbã. Sẽn-Ka-Saab kɩtame tɩ bãmb paam tõog-kãsenga.
15Nanambs pis-tã wã sʋk neb a tãab kẽnga a Davɩɩd nengẽ pĩisã sẽn be Adulam tãngã bokẽ wã sʋka, la rẽ tɩ Filistẽ-dãmbã rag n tilga b tãb-sikã Refayim tãn-longẽ wã. 16Wakat-kãng t'a Davɩɩd bee tãmsã pẽgsẽ. Filistẽ-dãmbã rag n tara b tãb-biis zĩig Betlehɛm. 17Ko-yũud wa n yõka a Davɩɩd t'a yeele: Ãnda n na n kẽng ko-baoor ning sẽn be Betlehɛm tẽngã noorã n tɩ yõng koom n wa kõ-m tɩ m yũ? 18Dẽ, nanambs a tãabã pɩʋʋga Filistẽ-dãmbã tãb-sikã n tɩ yõng koom ko-baoor ning sẽn be Betlehɛm tẽngã noorã, n wa kõ a Davɩɩde. La a Davɩɩd ka sak n yũ koomã ye. A rɩk-a lame n daag tẽng Sẽn-Ka-Saab yĩnga. 19A Davɩɩd yeelame: Abada! Bɩ mam Wẽnnaamã ra sak tɩ mam maan bũmb a woto ye! Nin-kãensã gẽnega b yõor n tɩ yõng koomã n wa kõ maam. Dẽ wã, mam sã n yũ ko-kãngã, a na n yɩɩ wa mam sẽn yũud bãmb zɩɩm. Woto, a Davɩɩd ka sak n yũ koomã ye. Neb a tãabã sẽn maan la woto.
20A Zoaab yao a Abisayi n dag n yaa neb a tãabã taoor soaba. Yaa yẽnda n dag n dɩk a kãnd n kʋ neb kobs-tã daar a yembre, t'a yʋʋrã yi n yɩɩg neb a yiibã. 21Sull a yiibẽ soabã pʋgẽ, a Abisayi n paam waoogr neb a tãabã sʋka, la yẽnda n yɩ b naaba. La a ka ta neb a tãabã ye.
22A Zoyiyada biig a Benaya sẽn yaa Kabtseyɛll tẽng raoã rag n yaa nin-kãsenga. Yẽnda maana bõn-kãsems wʋsgo. Yẽnda n dag n kʋ Moaab gãndaad a yiibã. Leb n yaa yẽnda n sig tãng bokẽ n kʋ gɩgemd sapɩlem daarã. 23Yẽnda n leb n kʋ Ezɩpt tẽng rao a yembr woglem sẽn ta kãntɩɩg a nu wã. Ezɩpt raoã rag n zãada kãnd sẽn yaa bedr wa koeer-bõanga. Yẽnda sega Ezɩpt raoã ne dasaare, la yẽnda reega raoã kãnde, n wẽneg n kʋ-a. 24Dẽ, a Zoyiyada biig a Benaya sẽn maanã la woto, la gãndaad a tãabã sʋka, yẽnda yʋʋrã n dag n yi n yɩɩda. 25Nanambs pis-tã wã sʋka, yẽnda n paam waoogr n yɩɩda. La yẽnda ka ta gãndaad a tãabã ye. Dẽ, a Davɩɩd kɩtame t'a lebg a gũudbã naaba.
26Gãndaadã yʋy la woto:
A Zoaab ba-biig a Azayɛlle,
Betlehɛm dao a Dodo biig a Ɛlhana,
27Haroa tẽng rao a Samote,
Pelõ tẽng rao a Elɛtse,
28Tekoa tẽng rao a Ikɛɛs biig a Ira,
Anatot tẽng rao a Abiyezɛɛre,
29Husa tẽng rao a Sibekayi,
Akoka tẽng rao a Ilayi,
30Netofa tẽng rao a Maharayi,
Netofa rao a Baana biig a Helɛɛde,
31Gibeya sẽn yaa Benzame
nebã tẽng rao a Ribayi biig
a Itayi, Piratõ tẽng rao a Benaya,
32Gaas tẽng ko-soodẽ dao a Urayi,
Tẽn-nabd-koɛɛngẽ dao a Abɩyɛlle,
33Baharum dao a Azmavɛte,
Salbon rao a Eliyaaba,
34Giizõ rao a Bene-Asɛm,
Haraar dao a Sage biig a Zonatã,
35Haraar dao a Sakaar biig a Ahiyam,
a Uur biig a Elifalle,
36Mekera rao a Efɛɛre,
Pelõ rao a Ahiya,
37Karmell tẽng rao a Ɛtsron,
Ɛɛzbayi biig a Naarayi,
38A Natã ba-biig a Zowɛlle,
a Hagri biig a Mibhaare,
39Amo rao a Selɛke, Beerot
dao a Narayi sẽn dag n zãad a
Seruya biig a Zoaab zab-teedã.
40A Yetɛɛr buudã ned a Ira,
a Yetɛɛr buudã ned a Garɛɛbe,
41a Hɛt buudã ned a Uuri,
a Alayi biig a Zabaade,
42a Rubɛn buudã naabã,
la tãb-biis pis-tã wã naab
a Siiza biig a Adina,
43a Maaka biig a Hanan,
Mitni buudã ned a Zozafate,
44Astarot tẽng rao a Uziya,
Arowɛɛr dao a Otam kom-dibli
a Sama ne a Yeyiyɛlle,
45A Simri biig a Yediyayɛlle,
ne a ba-biig a Yoha sẽn yaa
Tids tẽng rao nedã,
46Mahava tẽng rao a Eliyɛlle,
a Ɛlnaam kom-dibli a Yeribayi
ne a Yosaviya, Moaab tẽng rao a Yitma,
47N paas a Eliyɛll ne a
Obɛɛd la a Yaasiyɛll-Metsobaya.
Currently Selected:
1 Kibayã 11: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
