Sakari 2
2
Li bonlekaliela: a yina leni bi maaba
1Li bonlekaala nni, n den laa yinanaa. 2N den buali maleki yua n maadi leni nni yeni: «Yaa yina n tie ne mo bundi be?» O den guani ki yedi nni: «Laa yinnaada tie yaa nilanbuoli n den pia u paalu, ki fidi ki yadi Juda leni Isidayeli diema yaaba leni Jerusalemi dogu yaaba.»
3Li yaa puoli, o Diedo den waani nni maabinaa. 4N den buali o: «Bi cua ki tiendi be?» O den guani ki yedi: «Bi cua ki baa jieni ki go bolini yaa nilanbuoli n den fii ki sedi ki yadi Juda diema yaaba, hali maama ke ba niyendo ki den ye yua n baa fidi ki mua jama.»
Li bonlekataala: u baabibiigiko
5Li bonlekaala nni, n den laa joa ke o se ki kubi u baabibiigiko. 6N den buali o: «A caa le?» O den guani ki yedi nni ke o caa ki baa n biigi Jerusalemi dogu foaginu leni u pianu.
7Lane, Maleki yua n den maadi leni nni yeni, den cuoni ki cuubi malekitoa ke omo cuoni ki togidi o. 8O den yedi o: «Sani ki yedi o jawaalo yua n kubi u baabibiigiko yeni, ke bi kan maa bilini ki lindi Jerusalemi, kelima yaa niba leni yaa yandi n baa yaa ye lienni yeni baa yaa yabi boncianla.» 9O Diedo yedi: «Mini n ba baa yaa ye likani, ki doagidi n kpiagidi, ki teni n fantama n lindi ki cebini u dogu yeni, nani u bilinu yeni.»
U Tienu maadi leni yaaba n ye ti yonbidi
10O Diedo yedi o niba:
«Min den yadi yinba yaaba i kaani kuli yeni,
Sani mani moala,
Sani ki ña mani nujienu po diema.#2.10 Nujienu po diema yeni tie Babilonni dieme. Yaa sanu n den ña Palesitini ki caa lipo den ye nujiene.
11Yinba Jerusalemi yaaba,
Ban den gedini yinba yaaba
Ti yonbidi Babilonni yeni, sani mani ki ña lipo.»
12Li Miali Diedo U Paalu Kuli Daano,
Yua n soani nni leni o bali paalu,
Maadi yaa nilanbuoli n den fagi yi yeni po,
Ki yedi ke yua n sii yi kuli,
Tuu wani U Tienu nunbu nne.
13O yedi: «N baa fii i nilanbuoli yeni po,
Ki teni ban den cuo yaaba yeni mo
N fagi bi yaa piama.»
Laa bonla yaa tieni,
Yi baa bandi ke Li Miali Diedo,
U Paaciamu Kuli Daano n soani nni moamoani.
14O Diedo yedi:
«Yiini mani ki mangi yi pala,
Yinba Jerusalemi yaaba,
Kelima n kpendi ki baa yaa ye yi siiga.
15Lanyogunu i nilanbuoli boncianla
Baa sani ki tabini mini Li Miali Diedo,
Ki tua n niba.
N baa yaa ye yi siiga.»
Lani kuli yaa tieni, yi baa bandi
Ke o Diedo U Paalu Kuli Daano
N soani nni yi kani.
16O Diedo baa guani ki diedi Juda diema,
Man tua o yaama cele,
Wan den gagidi ki ŋanbi
Yaa tinga yeni yaa niinni.
O baa guani ki gandi Jerusalemi dogu,
Wun tua o dogu.
17Yuakuli n cuo o ñoabu o Diedo nintuali,
Kelima o baa fii ki ña o yekaanu
Yuu n gagidi ki ŋani yaa niinni.
Currently Selected:
Sakari 2: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
