Mi Kpanjama 3
3
Mi yanfuoma leni li fangili U Tienu po
1N bijua, ŋan da sundi min bangi a yaala,
Ŋan kubi n ñoamabonbilikaana,
2Kelima li baa foagidi a miali
Leni a yemanma dana.
3Ŋan da ŋaa mi buama leni mi teginma,
Ki la laa bonliedila a tulu nni,
Ki bili la a pali nni.
4A yaa kubi laa bonla,
U Tienu leni bi niba pala baa yaa mani a po,
Fini leni bani baa yaa mani. #Luk 2.52.
5Bili a dugidi kuli o Diedo kani,
Ki da dugi a yanfuoma po ka.
6Dugi o Diedo po,
Ŋan baa tieni yaala kuli nni,
O baa pendi a sanu.
7Da yini a yuli yanfuodaano,
Ki yaa fangi o Diedo,
Ki foagidi leni mi biadima. #Lom 12.16.
8Lanwani, li baa faabi a leni ti yanyagidi,
Ki dingi a fala.
9Ŋan kpiagi o Diedo leni a bonpiakaala,
Ki pa o a kpaandi bonluonkakpiala.
10A yaa tiendi yeni, a buabuana baa gbie bonŋanla,
A daboba baa gbie leni duven hali ki landi landi.
11N bijua, o Diedo yaa tundi a tundifala,
Ŋan da fali o tundi.
O yaa funi leni a, lan da biidi a pali. #Jb 5.17.
12O Diedo tundi wan bua yua fala nne,
Nani o jamado n tundi o bibuadiga maama yeni. #Doa 3.19.
Mi yanfuoma leni mi yemanma
13Li pamanli ye leni yaa nilo n baa mi yanfuoma,
Ki baa ki tua yanfuodaano.
14Mi ñuadi cie ŋanjilifa,
Mi bonbaakaala cie wula.
15Mi pia ti kpiagidi ki cie u lanmoanu.
Bi niba n fidi ki kuani bi yama yaala yaa niinni kuli,
Liba ki pia fuoma ki pundi ma.
16Mi yanfuoma kubi li miafoagili mi jienu,
Mi ganu mo kubi ŋalimani leni ti kpiagidi.
17Mi sani ŋani cain,
I taginma mo pia mi yanduanma.
18Mi yanfuoma tie miali tibue yaaba n baa ma po,
Ki tie yemanma yaaba n pia ma kuli po.
19O Diedo tagi ki tinga leni mi yanfuome,
Ki go tagi tanpoli mo leni mani.
20O yaa banma po yo,
Ke ki tinga kuli kuli den pudi mi ñima,
Ke ti tawadi mo tua taaga ki mi.
U Tienu kubi o yanfuodaano
21N bijua, ŋan kubi mi yanfuoma leni li kpaagili bonŋanla,
Ki da tuo lan foagidi a kani.
22Li baa cuani a po li miamoanli leni mi yemanma.
23Lanwani, a baa yaa cuoni ke a jigi co,
Liba mo kan kadi ki lu ŋa.
24A yaa duani, jawaandi kan cuo ŋa,
A yaa dua, a guama baa yaa mani.
25Ŋan da jie bonludikabiadila,
Bi, nibiadiba yaa cua ki baa ŋa.
26O Diedo baa kubi a,
Ki ñani bontuudikaala kuli a sanu nni.
Ŋan bua a lielo
27Ŋan yaa pia u fidu,
Ŋan da yie ke a kan todi yua n luo.
28A lielo yaa bua bonla ke a pia la,
Ŋan da yedi o:
«Kuni ki nan faa ki cua ne, n baa teni a.»
29A lielo yaa ye leni a ke o yama dua,
Ŋan da jagi ke a baa tieni o yaala n bia.
30Ŋan da koani leni nilo fanma fanma po,
O yàá tieni a liba.
31Nunponli n da cuo ŋa o nibiado po.
Ŋan da togidi o tagu mo.
32O Diedo nani bi nibiadiba,
Ama o danli leni bi niteginkaaba.
33O Diedo solindi ye bi nibiadiba diedi po,
Ama o seligidi bi niteginkaaba yaa diedi.
34O ñuadi a ñuañuada,
Ama o puuni li yumiinli danba o ŋanbili. #Jak 4.6; 1Pie 5.5.
35Ti kpiagidi n tie bi yanfuodanba biinu,
Ama bi yanluodanba wani yaa biinu tie i fe yo.
Gulmancema Protestant Bible © Bible Society of Burkina Faso, 2013.