Mi Coadima 4
4
Levi buolu tuona: Kehati puoliŋuani
1O Diedo den maadi Musa leni Alono ki yedi: 2«Yin coadi Levi buolu, yuu n tie Kehati puoliŋuani, yuakuli leni o cuubuliñoabu leni o diegu. 3Yin coadi yaaba n baa fidi ki soani li tuonli u Kadikaanu Gbandieli kuli nni, ki cili yaaba n pia bina piitaa, ki ban tuoni yaaba n pia bina piimuu.
4Kehati bijaba tuonli u Kadikaanu Gbandieli n tie, ban yaa kubi yaa tiadi n gagidi ki ŋani hali boncianla. 5Isidayeli yaaba yaa yen baa fii, ki cili li cenli, Alono leni o bijaba yen baa loagidi, yaa kpalidoaginkaabu n luagi u kaangagidiŋamu buliñoabu kani yeni, 6ki ŋoagini ku ŋantaadikpaku. Bi baa taa yaa gbangu n juagi, ki go maani ku po. Bi go baa taa yaa kpalibu n moani, ki suudi, ki ŋoagini ku. Li yaa puoli, bi baa taa ku dabugikaadi, ki bugi. 7Bi baa taa yaa cabili n moani ki suudi, ki ladi yaa dupen n gagidi o Diedo po, n yen maa yaa tabili po. Bi baa yuandi ki taa mu tadimu, mu tadiñokaamu, mu tadibuomu leni ban yen kuodi li bonñokaala yaa cuabimu nni. Yaa dupen n yen maa yogunu kuli yeni, baa maa likani. 8Bi baa taa yaa cabili n moani, ki ladi ti tiadi yeni po, ki taa yaa gbangu n juagi, ki poabini ti. Li yaa puoli, ban taa tabili dabugikaadi, ki soali. 9Bi baa taa yaa cabili n moani, ki suudi, ki ŋoagini u fidisantuankaanu, mu fidisanmu, mu babimu, mi fantanpienma tienkaani leni mi kpama n ye yaa tadimu nni. 10Bi baa taa u fidisantuankaanu yeni leni u tiadi kuli, ki tieni yaa gbangu n juagi yaa niinni, ki taa likuli ki maani ban yen maandi yaa daadi po, ki bugi yeni. 11Bi baa taa yaa cabili n moani, ki suudi, ki ŋoagini wula padibinbinli, ki go taa yaa gbangu n juagi, ki ŋoagini li ki pugini. Bi go baa taa li dabugikaadi ki soali. 12Bi baa taa u kaangagidiŋamu nni tuonsoantiadi kuli, ki tieni yaa cabili n moani, ki suudi yaa niinni. Bi baa poabini ti yaa gbangu n juagi yaa niinni, ki maani ban yen maandi ti yaa daadi po ki bugi yeni. 13Bi baa ñani yaa fantanpienma n ye li padibinbinli po, ki taa yaa cabili n moani, ki ladi li po. 14Bi baa yuandi ki taa li padibinbinli yeni kani tuonsoantiadi kuli, ki maani li po. Laa tiadi tie i fani, i nanjogidi, pelinba leni mu tadimu. Bi baa taa yaa gbangu n juagi, ki ŋoagini ti. Bi baa taa li dabugikaadi, ki soali. 15Alono leni o bijaba yaa ŋoagini yaa tiadi n gagidi ki ŋanbi ti ki gbeni, Kehati buolu baa nagini ki taa ti, ki bugi. Ama ban da sii yaa tiagu n gagidi ki ŋani kuli, kelima bi baa kpe. Lani n tie Kehati buolu n baa yaa pia yaa tuonli li gbandieli tuona nni. 16O kopadiciamo Alono bijua, Eleasari mo baa kubi mi fidisankpama, ban siagi yaa dugibila, mi pienma pada leni ban yen gagidi bi niba leni yaa kpama. O go baa yaa guu li gbandieli leni yaala n ye lienni leni u kaangagidiŋamu leni u tiabidi bidi.»
17O Diedo den maadi Musa leni Alono ki yedi: 18«Yin yaa faami mani Kehati cuubuliñoana yaaba po, ke ban da bodi Levi buoli siiga. 19Bi yaa nagini yaala n gagidi ki ŋani hali boncianla yaa yogunu, yin tieni bi po nanda: Yeni, bi baa ye, ki kan kpe. Alono leni o bijaba yen baa cua bi baa yo, ki waani ba, yuakuli n baa soani yaa tuonli leni wan baa tugi yaa tugili. 20Bi kan kua ki le ban poabini yaa tiadi ke ti gagidi ki ŋani yeni, kelima bi baa kpe.»
Gersoni puoliŋuani
21O Diedo den maadi leni Musa, ki yedi: 22«Ŋan ŋoadi ki coadi Levi buoli, yii n tie Gersoni puoliŋuani. Ŋan coadi yuakuli leni o cuubuliñoabu leni o diegu. 23Ŋan coadi yaaba n baa fidi ki soani tuonli kuli, u Kadikaanu Gbandieli nni, ki cili yaaba n pia bina piitaa, ki ban tuoni yaaba n pia bina piimuu. 24Ban baa yaa tuuni yaa tuona tie ane: 25Bi baa yaa kubi yaa kpalicianbu n liibi li gbandieli leni yaabu n tie pegbangu, ki ñaagi li leni yaa gbanjuagigu n ñaagi ku pegbangu yeni. Bani n go baa yaa kubi yaa kpalidoaginkaabu n juani u Kadikaanu Gbandieli buliñoabu kani, 26leni yaa kpaliti n lindi u luolu leni yaa kpalidoaginkaabu n juani bu buliñoajabu kani, ki duagi yaa luolu n lindi li gbandieli leni li padibinbinli. Bani n go baa yaa kubi, yaa kpaliti n lindi u luolu leni ban tugi yaa tiadi yeni kuli, yaa tiabidi bidi. Bi baa yaa tuuni lienni n pia yaa tuonli kuli. 27Alono leni o bijaba n baa yaa wangi bani Gersoni puoliŋuani n baa tuuni yaa tuona leni ban baa yaa tugi yaa tuga kuli. Bani n baa yaa wangi ba ban baa yaa tuuni yaala leni ban baa yaa tugi yaala. Yi baa guuni bane ban baa tugi yaala kuli. 28Lani n tie Gersoni puoliŋuani n baa yaa tuuni yaa tuona u Kadikaanu Gbandieli nni leni o kopadiciamo Alono bijua Itamari n baa yaa gobidi ba ke bi guu yaala.
Merari puoliŋuani
29Ŋan coadi Levi buolu, yuu n tie Merari puoliŋuani, yuakuli leni o cuubuliñoabu leni o diegu. 30Ŋan coadi yaaba n baa fidi ki soani tuonli kuli, u Kadikaanu Gbandieli nni, ki cili yaaba n pia bina piitaa, ki ban tuoni hali yaaba n pia bina piimuu. 31Ban baa yaa tuuni yaa tuona tie ane: Bi baa yaa tugi li gbandieli daadi, li kudoe, li dasaana li bunbuna, 32yaa dasaana n gaani ki lindi u luolu leni li bunbuna, li kpakpaana, li baabi, li tiadi kuli leni yaala n den ye bi tuonli po kuli. 33Lani n tie Merari puoliŋuani n baa tuuni yaa tuona u Kadikaanu Gbandieli nni, ke o kopadiciamo Alono bijua Itamari gobidi ba.»
Levi buolu, yaaba n tuuni yaa coali
34-48Musa, Alono leni li nitaanli yudanba den coadi Levi buolu kuli, ki ŋoadi yuakuli leni o cuubuliñoabu leni o diegu, nani o Diedo n den yedi maama. Lanwani, bi den coadi Kehati puoliŋuani. Bi den coadi yaaba n baa fidi ki soani tuonli kuli u Kadikaanu Gbandieli nni, ki cili yaaba n den pia bina piitaa, ki ban tuoni yaaba n den pia bina piimuu.
Bi den sua ke Kehati cuuli yaaba kuli, taani ki fii tudalie n kobilele n niba piimuu (2 750).
Gersoni cuuli yaaba mo kuli, den taani ki fii tudalie n kobiluoba n niba piitaa (2 630).
Merari cuuli yaaba moko kuli, den taani ki fii tudataa n niba kobilie (3 200).
Lanwani, bikuli den taani ki tie tudanii n kobimuu n niba piinii (8 580).
49Bi den coadi ba nani o Diedo n den yedi Musa maama, ki waani yuakuli n baa yaa tuuni yaa tuonli leni wan baa yaa tugi yaala. Bi den coadi ba nani o Diedo n den puogi Musa maama.
Currently Selected:
Mi Coadima 4: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
