Mi Coadima 24
24
1 Balaam den sua ke o Diedo bua wan gaali Isidayeli yaaba. Lani yaa po, waa den piadi ke o baa guudi U Tienu n baa yedi o yaala#24.1 Bi tianba nua ke Balaam naa den lingi ki go baa bu baagu ka., nani mi kpiama yeni. Ama o den pegidi o nunga ki teli mi fanpienma po. 2Balaam den yaadi ki diidi, ki laa ke Isidayeli yaaba ye bi nagili nni, buolu kuli leni u kaanu. U Tienu Fuoma den jiidi o po. 3Balaam den maadi wan pia yaa maama, ki yedi:
«Mini, Beori bijua Balaam n yedi yaala tie line,
Mini, yaa joa yaa nuni n ŋubidi, ki nua bonŋanla n yedi yaala tie line,
4Mini yua n laadi U Paaciamu Daano n doagidi yaa bonlekaala,
Mini yua n yaa gbaani ki pugi, n nuni yen ŋubidi,
Min yedi yaala tie line:
5Yinba Jakob puoliŋuani, yi gbandiena ŋani hali bonŋanla!
Yinba Isidayeli puoliŋuani, yi yekaani ŋani lede n ne!
6Yi yekaani tandi ki ban caa nani i kpeni yeni,
Nani yaa tikuani n ye u kpenu kani,
Nani o Diedo n ŋuu alowesi tiidi yii yeni,
Nani sediri tiidi yii n baali mi ñima yeni.
7Isidayeli yaaba ñintiadi gbie ki wuliti,
Ke mi ñima yeni po teni ke li bonbulikaala pudi bonŋanla.
Bi bado yeli baa kpedi ki cie Agagi yeli,
Bi diema mo baa yaa pia u paalu.
8U Tienu den teni ke bi ñani Ejipiti
Leni o moanua gbanmanu.
Bi baa je yaa nibuoli n tie bi yibalinba,
Bi baa mudi bi kpaba, ki poagili ba leni bi piemi.
9Bi yen bali ki cuoni, ki duani nani i yangbanli yeni,
Ŋme n baa fidi ki fiini ba?
Li seli n yaa ye leni yua n gaali yi,
Ti solindi mo n yaa ye leni yua n soli yi.» #Cil 12.3; 49.9.
10 Balaki pali den beni Balaam po hali boncianla. Balaki den pua ki ledi o nii, ki yedi Balaam: «N yini a ne, ke ŋan soli n po n yibalinba, ama, mi taataama n ne, ke a gaaliti ba. 11Moala ŋan lebidi ki kuni a denpo! N den yedi ke n baa jigini a, ama, o Diedo nan yie ke a kan baa jigidi.»
Balaam pua saawali Isidayeli po
12Balaam den guani ki yedi Balaki: «Naani mii den waani ŋan den soani yaa tonda n kani yeni, 13ke ba Balaki yaa puni nni o diegu, ke ku gbie ŋanjilifa leni wula, n kan fidi ki tieni n yaa yanjagili, lin wa bi lin yabi. N den waani ba ke n kan fidi ki yie o Diedo ñoamabonli. N li baa yaa togidi o Diedo n baa yedi nni yaale. 14To, moala n baa lebidi ki kuni n buolu po. Cua ne, min tuodi ki waani a, laa nibuolu n baa ti faa ki soani a niba yaa tuona.»
15Balaam den maadi wan pia yaa maama, ki yedi:
«Mini Beori bijua Balaam n yedi yaala tie line,
Mini yaa joa yaa nuni n ŋubidi ki nua bonŋanla n yedi yaala tie line,
16Mini yua n gba U Tienu maama,
Mini yua n bani Tanpoli Badiciamo jaga,
Mini yua n laadi wani U Paaciamu Daano n doagidi n po yaa bonlekaala,
Mini yua n yaa gbaani ki pugi, n nuni yen ŋubidi,
Min yedi yaala tie line:
17N nua yaala n baa tieni, ama laa tie moala po,
N diidi ki laa bonŋanla, ama li da foagi.
Ki ŋmabiga ñani Jakob puoliŋuani siiga,
Yua n kubi u badigbiamu fii bani Isidayeli yaaba siiga.
O pua ki poagili Moabi yaaba,
O baa bolini Seti puoliŋuani kuli.
18O baa diedi Edomi,
O baa diedi o yibalinba Seyiiri yaaba yeni.
Isidayeli yaaba gbie leni mi jama.
19Yua n baa ña Jakob puoliŋuani nni yeni,
Baa tua badiciamo, ki yaa die.
O baa bolini yaa niba n sieni i dogi nni.»
Balaam pua saawali Isidayeli yibalinba bodima po
20Balaam den laa Amaleki buolu, ki den maadi pali nni maama, ki yedi:
«Amaleki buolu tie yaa buolu n pia u paalu ki cie.
Ama u juodima tie mi bodima.»
21O den laa Kena yaaba ki maadi pali nni maama, ki yedi:
«Yin ye yaa kaanu pia u fidu boncianla,
Yi tiali mo maa ku tangu po.
22Ama u mu baa buoni Kayini#24.22 Kayini tie Kena yaaba yaa yaaja, bi den tie maabe bani Kena yaaba yeni. Diidi Mi Cilima 15.19. yaaba,
Asuri#24.22 Asuri: Lani n tie Asiiri yua, bi Asiiri yaaba yaaja. Diidi Mi Cilima 10.11. yaaba yaa cua ki cuo yi ti yonbidi yaa yogunu.»
23Balaam go den yedi:
«U Tienu yaa tieni laa bonla, ŋme n baa ciadi?
24Bi niba baa ña Kitim leni ti ñinbiadi ki cua,
Bi baa faligi Asiiri yaaba leni Heberi puoliŋuani.
Ama laa niba moko yaa juodima baa tua bodima.»
25Balaam den fii ki guani ki kuni o denpo, ke Balaki mo taa o yaa sanu ki ban caa o yaa kaanu.
Currently Selected:
Mi Coadima 24: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
