Marki 15
15
Bi gedini Jesu Pilati bujiali kani
(Mat 27.1-2,11-14; Luk 23.1-5; Jan 18.28-38)
1Ku tiŋaapanpangu bi kopadicianba yudanba, a nikpela, li bali maama banda leni bi cancantieba den taani ki juogi. Bi den loli Jesu ki gedini o ki ban teni Pilati.
2Pilati den buali o: «A tie Jufinba bado bi?» Jesu den guani ki yedi o: «Fini n yedi yeni.» 3Bi kopadicianba yudanba den maadi Pilati ki kuli Jesu boncianla. 4Pilati go den buali o: «A kan guani ki yedi maamiba? Cengi ban maadi ki kuliti a yaala kuli.» 5Ama Jesu ki go den guani maamiba kuli. Li den paki Pilati.
Pilati jia ki kadi ke ban kpa Jesu
(Mat 27.15-26; Luk 23.13-25; Jan 18.38—19.16)
6Mi Pendima jaanma kuli, Pilati yen faabi kpaadiyenli ku niligu n mia o wan faabi yua. 7Li den sua ke yaaba n yie li bali danba, ki tieni mi janjanma ki kpa bi niba ye li kpaadidieli nni. Bi siiga nni yendo den yi Barabasi. 8Ku niligu den cua Pilati kani ki mia o ke wan tieni bi po nani wan maani ki tiendi maama. 9O den guani ki yedi ba: «Yi bua min faabi yi po Jufinba bado yeni bi?» 10O den bani ke bi kopadicianba yudanba den cuo Jesu ki cuani o li bujiali kani, kelima bi nunponbiadili po. 11Bi kopadicianba yudanba den tigini ku niligu ke ban mia Pilati, wan faabi bi po Barabasi. 12Pilati go den buali ba: «N nan baa tieni yin yi yua Jufinba bado yeni lede?» 13Bi go den tiani ki yedi: «Joani o li dapoanpoanli po!» 14Pilati den yedi ba: «Be yaa po? O tieni be ke li bia?» Bi go den tiani ki pugini: «Joani o li dapoanpoanli po!» 15Pilati den bua ki mangi ku niligu pali, lani yaa po o den faabi bi po Barabasi. O den teni ke bi pua Jesu i baliji, ki taa o ki teni bi toatieba ban ban joani o li dapoanpoanli po.
Loma yaaba toatieba ñuadi Jesu
(Mat 27.27-31; Jan 19.2-3)
16Bi toatieba den gedini Jesu ki ban kuani o guveneeri diegu nni, wan ja ti buudi naankani, ki yini bi cagili kuli. 17Bi den golini o bu kpalimoanbu, ki taa i konkoni ki piani nani ki badifogiliga yeni, ki cibini o. 18Lani, bi den fuondi o ki tua: «Ti fuondi a, fini Jufinba bado.» 19Bi den pua o yuli li kankagili, ki siini o po ti ñinsandi, ki gbaandi o nintuali ki pugi o. 20Ban den ñuadi ñuadi o yeni ki gbeni, bi den goliti bu kpalimoanbu yeni ki guani ki lani o o yaa tiadi, ki ñani o ki caani o ki baa n kpaa ki joani o li dapoanpoanli po.
Bi joani Jesu li dapoanpoanli po
(Mat 27.32-44; Luk 23.26-43; Jan 19.17-27)
21O joa den ye ke bi yi Simon, ki tie Sireni dogu yua, Alekisandri leni Rufusi baa, den ñani u kuanu po ki kpendi ki kadi leni ba. Bi den tieni o u paalu ke o bugi Jesu dapoanpoanli. #Lom 16.13. 22Bi den gedini Jesu ban yi yaa kaanu Goligota, lani n bua ki yedi: “ku Yukuokuogu kaanu.” 23Bi den bua ki teni o yaa duven n kali leni mili, ama waa den gaa. 24Bi den joani o li dapoanpoanli po, ki boagidi o tiayiekaadi, ki toani tiatia o tiayiekaadi po, ki baa le yuakuli n baa baa yaala. #Ps 22.19. 25Ban den joani o li dapoanpoanli po, li den tie u yienu n paagi yaa yogunu. 26Yaa diani n den waani ban jia o buudi ki kpa o yaala yaa po, den tie ine: “Jufinba bado.”
27Bi go den joani sanjiabilie a dapoanpoana po, yendo o jienu, oyua mo o ganu. [ 28Yeni, li den tieni nani i Diani n yedi maama: «Bi den nua o ke o taa yenma leni ti tuonbiadi danba.]» #Esa 53.12.
29Bi santagiba den sugidi o, ki fegini bi yula ki tua: «Hei, fini yua n baa mudi U Tienu diegu, ki go maa gu danataa siiga, #Ps 22.8; Ps 109.25; Mrk 14.58; Jan 2.19. 30gaa a yuli, ki jiidi li dapoanpoanli po.» 31Bi kopadicianba yudanba leni li bali maama banda moko den ñuadi o yeni bi siiga, ki tua: «O den gaa nitoaba, ki nan kan ji fidi ki gaa o yuli.» 32Bi go den tua: «U Tienu n Gandi Yua, wani Isidayeli bado, n jiidi li dapoanpoanli po moala ne, ke tin le ki daani o.» Ban den taani ki joani wani leni yaaba a dapoanpoana po moko den sugidi o.
Jesu kuuma
(Mat 27.45-56; Luk 23.44-49; Jan 19.28-30)
33Lan den pundi u yensiicocolu, li biigili den tieni ki tinga nni kuli, ki yaa caa hali li yenlebidili. 34Lanyogunu Jesu den tiani boncianla: «Eloyi, Eloyi, lama sabakitani.» Lani n tie: «N Tienu, n Tienu, be yaa po ke a ŋaa nni?» #Ps 22.2. 35Yaa niba n den ye likani, bi tianba n den gbadi, bi den yedi: «Diidi, o yi o saawalipualo Eli.» 36Bi siiga nni yendo den sani ki pagini u tuogu mi ñinmiligima nni, ki fini li kankagili ki yugidi ki teni o ke wan ño. O nilo yeni den yedi o lieba: «Cedi mani tin le Eli yaa baa cua ki jiini o.» #Ps 69.22. 37Jesu den tiani ke li pa, ki fuo, ki jiidi.
38U Tienu diegu kpalidoaginkaabu den padi siiga nni, ki cili tanpoli ki ban jiidi hali tinga nni, ki boagidi kaanilie. #Ñam 26.31-33. 39Minteela kobiga yudaano, yua n den se ki tiegi Jesu, n den laa ke o kpe yeni, o den yedi: «Moamoani, o joa na den li tie U Tienu Bijua yo.»
40Bi puoba moko den se foagima ki diidi. Li den pia bi siiga Mariyama, Magidala dogu yua leni Mariyama yua n tie Jaki, o jawaalo leni Jose naa leni Salome. #Luk 8.2-3. 41Jesu n den ye Galile, bi puoba yeni den ŋua o ki todi o o yema po. Puotoaba yaaba n yabi moko den ye likani. Bi den ciani Jesu ki cua Jerusalemi.
Jesu piinma
(Mat 27.57-61; Luk 23.50-56; Jan 19.38-42)
42Landaali den tie li boginli daali, lani n tie Jufinba n yen bogini yaala kuli mi fuodima daali po. Lani yaa po, ku yenjuagu, 43Alimate dogu yua Josefi, yua n tie bi cancantieba siiga yendo, ki pia ti kpiagidi, ki moko guu ke U Tienu diema yogunu n pundi, den paagi o pali ki gedi Pilati po, ki ban mia wan teni o Jesu o tinkpilo. 44Li den lidini Pilati leni Jesu n kpe maama tontoni. O den yini minteela kobiga yudaano ki buali o o yaa kpe ke li waagi? 45Minteela kobiga yudaano n den waani o lan tie maama, o den tuo ke Josefi taa o tinkpilo. 46Josefi den daa bu kpalipienbu ki gedi ki ban jiini o tinkpilo li dapoanpoanli po, ki bobini o bu kpalipienbu yeni, ki ban duani o li takuli nni, ban kpiedi yaali ku tangu nni. O den bindi ku tanpabigu ki biini li takuli ñoabu. 47Mariyama, Magidala dogu yua leni Jose naa Mariyama den diidi ban duani Jesu o tinkpilo naankani.
Currently Selected:
Marki 15: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
