Mise 7
7
Isidayeli yaaba kuli tieni yaala n bia
1Ŋain, n tie nani yaa nilo n fii
Ki baa n cie o tiidi bonluonkaala u jetaagu yogunu yeni.
Ama wan ban pundi waa laa wan baa ŋmani yaala.
Waa laa o yama n bi ye yaa kankankpiala nni,
Ba bonyenli bu tibu po.
2Bi niteginkaaba kuli bodi mi diema nni,
Ba niteginkayendo ki go ye bi niba siiga.
Bikuli lingi ki bua ki wuli mi soama.
Yuakuli dia o kpiilo ku diagu ki bua ki cuo o.
3Bi niba kuli nuni maa mi biadima tienma po.
Bi yudanba kan tieni puu se bi gaa li suuli.
Bi bujiaba moko dia bi niba a suuna.
A nikpiaga doagidi bi niapiali.
4Bi siiga yua n ŋani ki cie bia nani li kongoabili yeni,
Yua n tiegi ki cie moko bia ki cie ku kontuugu.
Bi saawalipuaba n den tuodi ki waani yi yaa daali yeni pundi.
Landaali yi gbanu baa wudi.
5Da dugi mani yi yieninlieba po,
Ki da jigini yi danlinba.
Bandi mani yin baa yaa maadi maama,
Yi puoba yaaba n dua ki baali yi kani.
6Landaali, yuakuli yibali baa yaa tie o diegu nni yua yo,
Kelima ki bonjaga baa fali o baa,
Ki bonpuoga n fiini mi yiema o naa po,
Ki biyuaga mo n yaa nani o yaanaa. #Mat 10.35-36; Luk 12.53.
7Ama mini, n baa yaa diidi o Diedo yo,
N baa yaa dugi n faabima Tienu po,
Kelima wani n Tienu baa gaa n miabu.
Ti dugidi U Tienu ninñingbadima po
8N yibali, da mangi a pali.
Ba n yaa baa, n baa go fii.
Ba n yaa ye li biigili nni,
O Diedo tie n yenma.
9N tieni ti tuonbiadi o Diedo po,
Lani, n baa juuni ki gaa o pabienli tundifala,
Hali wan baa ti tua n candanbaalo,
Ki saa n po i moamoani yaa yogunu.
O baa gedini nni naankani n yieni,
Yeni n baa yaa ñuadi o teginma tuona.
10N yibali baa le lani kuli i fe n cuo o,
Wani yua n den tua nni, Li Miali Diedo a Tienu ye le?
Bi baa ŋmaa n yibalinba nani u sanu nni moamoadi yeni.
N nuni baa le lani kuli.
11Yinba Isidayeli yaaba, bi baa diadi yi diema,
Ban baa guani ki maa yi bilinciami yaa daali.
12Landaali, ki cili Asiiri ki ban pundi hali Ejipiti,
Ki taa Ejipiti ki ban tuoni u kpenciamu Efrati,
Ki cili ñincianma ki ban tuoni miyama,
Ki didi taa juali ki ban tuoni liyali,
A niba baa ña lipo ki kpeni.
13Ama li ŋandunli yaaba baa bodi
Kelima bi tuonbiadi po.
U Tienu baa gbadi Isidayeli yaaba po mi ninñima
14U Tienu, taa a yankpaagbiamu ki yaa kpaa a niba,
Bani yaa nigoli n tie a piama yeni.
Bi ye bi bebe li fuasieli nni i tikuani siiga.
Ŋan go yaa kpaa ba Basan leni Galaadi diema nni,
Nani ŋan den kpa kpaa ba maama.
15U Tienu yedi: «N baa teni yin go le mi bancianma,
Nani yin den ñani Ejipiti nni yaa yogunu yeni.
16I nilanbuoli baa le lani i fe n cuo ba,
Ba leni ban pia yaa paalu kuli.
Bi baa pii bi ñoana, bi tuba mo n womi.
17Bi baa yaa liagi mi tama nani i we,
Bi nani yaala n balini ki tinga nni kuli yeni.
Ti jawaandi baa cuo ba ban ña bi diepaala nni,
Ki cua o Diedo ti Tienu nintuali ki digibi.»
U Tienu, bi baa yaa jie ŋa, ki fangi a.
18Ŋme n naani leni fini U Tienu,
Fini yua n duundi ki ñandi ti tuonbiadi,
Ki puuni sugili a niba yiema po.
Ŋaa kubi a pabienli yogunu kuli a niba yaaba n sieni po,
Kelima mi ninñingbadima mani a po.
19A go baa gbadi ti po mi ninñima,
Ki ŋmaa ti tuonbiadi a taana tiipo,
Ki lu ti tin tingi mi ñincianma nni.
20A baa waani tinba a niba Jakob puoliŋuani,
A buama yaama n ki pia lebidima,
Ki go waani tinba Abalahama puoliŋuani a ŋanbili,
Nani ŋan den poli ki niani ti yaajanba hali yogunu maama.
Currently Selected:
Mise 7: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
