Matie 27

Bi gedini Jesu Pilati bujiali kani

(Mrk 15.1-5; Luk 23.1-12; Jan 18.28-38)

1Ku tiŋaapanpangu, bi kopadicianba yudanba leni Jufinba nikpela kuli den taani ki juogi, ke bi baa teni ban kpa Jesu. 2Bi den loli o, ki gedini o ki ban teni o Pilati yua n den tie guveneeri.

Juda kuuma

(JTT 1.18-19)

3Juda, yua n den janbi Jesu n den laa ke bi jia wani Jesu buudi, ki kadi ke bi baa kpa o, o den mua ke yàá bi janbi o. O den taa a kujapienpiitaada ki gedini bi kopadicianba yudanba leni a nikpela kani, #JTT 1.18-19. 4ki yedi: «N tieni ti tuonbiadi ki janbi yua n ki pia tagili.» Bi den guani ki yedi o: «Lani mo nan ŋua ti? Li ŋua fine!» 5Juda den luni i ligi yeni U Tienu diegu nni ki ñani, ki gedi ki ban soadi o yuli.

6Bi kopadicianba yudanba den gandi gandi i ligi yeni ki yedi: «Laa ŋani laa ligi n kua U Tienu diegu ŋalimano nni, kelima li tie mi soama ligi.» 7Ban den juogi, bi den taa laa ligi ki daa o maado kuanu, ke u tua bi canba kupiikaanu. 8Lani yaa po, ke bi yi laa kuanu mi “soawulima kuanu” hali dinla. 9Lani, o saawalipualo Jeremi n den maadi yaa maama den tieni:

«Bi den taa kujapiena piitaa,

Isidayeli yaaba n den biigi

Ki sua ke o dunga pundi maama, #Sak 11.12-13.

10Ki daa o maado kuanu,

Nani o Diedo n den yedi nni maama.»

Jesu sedi Pilati nintuali

(Mrk 15.2-5; Luk 23.3-5; Jan 18.33-38)

11Jesu den sedi guveneeri nintuali. Guveneeri den buali o: «A tie Jufinba bado bi?» Jesu den guani ki yedi: «Fini n yedi yeni.»#27.11 Yaa ka, a maadi moamoani. 12Bi kopadicianba yudanba leni a nikpela den kuli o, ama waa den guani liba. 13Lane ke Pilati den yedi o: «Ŋaa gba ban kuliti a yaala kuli po?» 14Jesu naa den lebidi o maamiba. Li den paki guveneeri boncianla.

Pilati jia ki kadi ke ban kpa Jesu

(Mrk 15.6-15; Luk 23.13-25; Jan 18.38—19.16)

15Mi Pendima jaanma kuli, guveneeri den maani ki yen faabi kpaadiyenli, ku niligu n mia o wan faabi yua. 16Lanyogunu, bi den pia kpaadiyenli, ke bi yi o Barabasi ke bi niba kuli bani o biadima po. 17Ku niligu n den taani, Pilati den yedi ba: «Yi bua min faabi yi po ŋme, Barabasi, bi Jesu ban yi yua Kilisiti?» 18O den bani ke bi cuo Jesu ki cuani o li bujiali kani, kelima li nunponbiadili po.

19Wan da den li kaa o bujiali kaanu, o pua den soani u tondu o kani ki yedi o: «Ŋan da kua o naa niteginka maama nni, kelima yaa ñiagu n pendi na, n laa fala boncianla ti dangidi nni kelima o po.»

20Bi kopadicianba yudanba leni a nikpela den tundi ku niligu, ke bi mia Pilati wan faabi Barabasi ki teni ban kpa Jesu. 21Guveneeri go den yedi ba: «Bani nibilie siiga yi bua min faabi yi po ŋme?» Bi den guani ki yedi o: «Barabasi.» 22Pilati den yedi ba: «N nan baa tieni Jesu, ban yi yua Kilisiti mo lede?» Bikuli den guani ki yedi o: «Joani o li dapoanpoanli po!» 23Guveneeri den yedi: «O tieni be biadime?» Bi go den tangi ke li pa: «Joani o li dapoanpoanli po!» 24Pilati n den laa ke o maama ki baa sedima lipo, ke ku fuugu mo pugidi, o den taa mi ñima ki nidi o nii ku niligu nintuali, ki yedi: «Mii pia tagiliba o naa niteginka soawulima nni. Li ŋua yinbe!» #Tia 21.6-9. 25Ku niligu kuli den guani ki yedi o: «O soama n baa tinba leni ti bila po!»

26Lani, Pilati den faabi bi po Barabasi. O den teni ke bi pua Jesu i baliji,#27.26 I baliji: I baliji puama den bia ke li kandi, li den kua ban pua Loma yua i baliji. ki ŋa o bi nuu nni, ban ban joani o li dapoanpoanli po.

Loma yaaba toatieba ñuadi Jesu

(Mrk 15.16-20; Jan 19.2-3)

27Guveneeri toatieba den kuani Jesu wani guveneeri diegu nni wan ja ti buudi naani, ki taani bi cagili kuli ki lindi o. 28Bi den landi o tiadi, ki golini o bu kpalimoanbu. 29Bi den taa i konkoni ki piani nani ki badifogiliga yeni, ki cibini o, ki mubini o jienu li kankagili. Bi den gbaandi o nintuali ki ñuadi o nani o tie bado yeni, ki tua: «Ti fuondi a, fini Jufinba bado.» 30Bi den siini o po ti ñinsandi, ki taa li kankagili ki pua o yuli po. 31Ban den ñuadi ñuadi o yeni ki gbeni, bi den goliti bu kpalibu ki guani ki lani o o yaa tiadi, ki ñani o ki gedini, ki baa n joani o li dapoanpoanli po.

Bi joani Jesu li dapoanpoanli po

(Mrk 15.21-32; Luk 23.26-43; Jan 19.17-27)

32Ban den caa, bi den tuogi Sireni#27.32 Sireni: den tie Libi diema yaa dociamu. dogu yua ke o yi Simon, ki tieni o u paalu, ke o bugi Jesu dapoanpoanli. 33Bi den pundi ban yi yaa kaanu Goligota, lani n bua ki yedi “ku Yukuokuogu kaanu.” 34Bi den teni Jesu yaa duven n kali leni yaa ñoagu n to ke wan ño. Ama wan den leni o waamu, waa den ñuni. #Ps 69.22.

35Ban den joani o li dapoanpoanli po, bi den taa o tiayiekaadi ki toani tiatia ki boagidi ti. [Bi den tieni yeni ke o saawalipualo n den maadi maama n tieni: «Bi den boagidi n tiayiekaadi bi siiga, ki toani tiatia n liadicianli po.]» #Ps 22.19. 36Lani, bi den kali ki guu o.

37Bi den kpaa ki tabini, ki yini o yuli po, yaa diani n waani yaala yaa po ke bi cuo o: «One n tie Jesu, Jufinba bado.»

38Bi den joani sanjiabilie a dapoanpoana po ki taani leni o, yendo o jienu po, oyua mo o ganu po.

39Bi santagiba den sugidi o, ki fegini bi yula ki tua: #Ps 22.8; 109.25. 40«Fini yua n baa mudi U Tienu diegu, ki guani ki maa gu danataa, gaa a yuli. A yaa tie U Tienu Bijua, ŋan jiidi li dapoanpoanli po.» #Mat 26.61; Jan 2.19. 41Bi kopadicianba yudanba, li bali maama banda leni bi nikpela kuli den ñuadi o yeni, ki tua: 42«O den gaa nitoaba ki nan kan ji fidi ki gaa o yuli. O yaa tie Isidayeli buolu bado moamoani, wan jiidi li dapoanpoanli po moala ne, lanwani ti baa tuo ki daani o. 43O dugi U Tienu po. U Tienu yaa bua o moamoani, wan nan gaa o moala tin le, kelima o den tua: ‹N tie U Tienu Bijua yo.› » #Ps 22.9. 44Ban den taani ki joani o leni yaa sanjiaba a dapoanpoana po moko den sugidi o.

Jesu kuuma

(Mrk 15.33-41; Luk 23.44-49; Jan 19.28-30)

45Ki cili u yensiicocolu, li biigili den tieni ki tinga nni kuli, ki yaa caa hali li yenlebidili. 46Li yenlebidili po yeni, Jesu den tiani boncianla: «Eli, Eli, lama sabakitani?» Lani n tie: “N Tienu, n Tienu, be yaa po ke a ŋaa nni?” #Ps 22.2. 47Yaa niba n den ye likani bi tianba n den gbadi, bi den yedi: «O yi o saawalipualo Eli.» 48Tontoni bi siiga nni yendo den sani, ki ban taa u tuogu ki pagini mi ñinmiligima nni, ki fini li kankagili, ki yugidi ki teni o ke wan ño. #Ps 69.22. 49O lieba den yedi: «Cedi mani tin le Eli yaa baa cua ki gaa o.»

50Jesu go den tiani ke li pa, ki fuo ki jiini ki cabi.

51Lanyogunu U Tienu diegu nni kpalidoaginkaabu den padi siiga nni, ki cili tanpoli ki ban jiidi hali tinga, ki boagidi kaanilie. Ki tinga den digibi, a tana den yagidi, #Ñam 26.31-33. 52A takula den yaadi, U Tienu nigagidiŋanba yaaba n den kpe siiga, boncianla den fii bi tinkpiba siiga. 53Bi den ñani a takula nni. Jesu fiima bi tinkpiba siiga puoli, bi den kua u dogagidiko#27.53 Lani n tie Jerusalemi. nni ke bi niba boncianla laa ba.

54Minteela kobiga yudaano leni yaaba n den taani leni o ki ji Jesu kuli n den laa mi tindigibima leni yaala n tieni kuli, ti jawaandi den cuo ba boncianla, ke bi yedi: «Moamoani, one den tie U Tienu Bijua yo.»

55Bi puoba boncianla moko den ye likani ki se foagima ki diidi, Jesu n den ñani Galile ke yaaba n ciani o ki todi o o yema po. #Luk 8.2-3. 56Li den pia bi siiga Mariyama, Magidala dogu yua leni Mariyama yua n den tie Jaki leni Josefi naa leni Sebede bila yaa naa.

Jesu piinma

(Mrk 15.42-47; Luk 23.50-56; Jan 19.38-42)

57Ku yenjuagu, yaa piado n yi Josefi ki tie Alimate dogu yua den cua. Omoko den tie Jesu ŋoadika. 58O den gedi Pilati kani ki ban mia o wan teni o Jesu o tinkpilo. Pilati den yedi ban teni o. 59Josefi den taa o tinkpilo ki bobini o len kpalipanbu, 60ki duani o o takupanli nni, wan den teni ke bi kpiedi yaali ku tangu nni. O den bindi ku tanpabigu ki biini li kuli ñoabu, ki ban kuni. 61Mariyama, Magidala yua leni Mariyama toa den ye likani, ki kaa ki tiegi li takuli.

Bi guudi Jesu takuli

62Lan den fii ki faa, lani tie li boginli daali fiifaama, bi kopadicianba yudanba leni Farisieninba den taani ki gedi Pilati kani, 63ki yedi o: «Ti daano, ti tiadi ke laa boandi daano n da den fo yaa yogunu, o den yedi ke danataa yaa pendi, ke o baa fii bi tinkpiba siiga. #Mat 16.21; 17.23; 20.19; Mrk 8.31; 9.31; 10.33-34; Luk 9.22; 18.31-33. 64Lani yaa po, ŋan teni ban yaa guu li takuli hali danataa, ke o ŋoadikaaba n da ti cua ki su o, ki yedi bi niba ke o fii bi tinkpiba siiga. Laa boandiyuami ji baa bia ki cie li bonkpiala.» 65Pilati den yedi ba: «No mani yaaba n baa yaa guu nne. Gedi mani ki ban guudi li takuli yin fidi maama kuli.» 66Bi den gedi li takuli po ki tieni ku tanpabigu yeni po yaa maalima ke o nilo yaa biidi bi baa bandi, ki sieni bi guudikaaba.

Currently Selected:

Matie 27: BGP

Highlight

Copy

Compare