Matie 19
19
Jesu ñama Galile leni o gedima Jerusalemi
19—20
Jesu maadi li puoñanli maama
(Mat 5.31-32; Mrk 10.1-12; Luk 16.18)
1Jesu n den maadi laa maama kuli ki gbeni, o den fii ki ñani Galile diema nni, ki gedi Jude tinga yaaga n ye Jurden kpenu kandima. #Tia 24.1-4; Mat 5.31. 2Ku niligu den ŋua o. O den paagi a yiama likani.
3 Farisieninba den tuogi o ki dia o ku madiagu ki yedi: «Naani li bali maama tuo o joa n ñani o pua, lan tie yaala kuli po?» 4O den guani ki yedi: «Yii cogi ke mi cilima o Tagido den tagi joa leni pua ka? #Cil 1.27; 5.2. 5Li go yedi: ‹Li tie lani yaa po ke o joa baa ña o baa leni o naa kani ki taani leni o pua, bani nibilie yeni n tua gbananyendi.› #Cil 2.24. 6Yeni, baa go tie bilie ka, bi ji tie yende. U Tienu n taani yaala, o nisaalo n da paadi la.» 7Bi den yedi o: «Be yaa po ke Musa nan den bili li bali maama nni, ke joa yaa ñani o pua, wan teni o li puoñatili?» 8O den guani ki yedi ba: «Li tie yi pajuaga yaa po yo ke Musa den tuo ke yin yaa ñandi yi puoba. Ama hali ŋanduna tagima yogunu, laa den tie yeni. 9Mini, n waani yi ke yua n ñani o pua ke laa tie conconma po, ki go taa puotoa kuli, o conbi.» #Mat 5.32; 1Kor 7.10-11.
10O ŋoadikaaba den yedi o: «Li yaa tie yeni joa leni pua siiga, laa ŋani joa n taa pua.» 11O den guani ki yedi ba: «Bi niba kuli ka baa fidi ki gaa laa maama, se U Tienu n puni yaaba li paalu bebe. 12Bi tianba ye ki tie moagilimu kelima bi mali ki tie yeni, bine mo tua moagilimu kelima bi niba tieni ba la, bine mo tua yeni kelima tanpoli diema po. Yua n baa fidi ki gaa laa maama, wan gaa.»
Jesu gaali a biwaala
(Mrk 10.13-16; Luk 18.15-17)
13Li yaa puoli, bi niba den cuani Jesu kani a biwaala ke wan maani o nii bi po, ki go jaandi bi po. Bi ŋoadikaaba den funi leni yaaba n kpendinni ba. 14Ama Jesu den yedi: «Cedi mani a biwaala n cua n kani ki da deli ba, kelima tanpoli diema tie yaaba n tie nani a biwaala yene yaa po.» 15O den maani o nii bi po, ki fii ki fuadi likani.
O jawaapiado
(Mrk 10.17-31; Luk 18.18-30)
16O joa den cua Jesu kani ki buali o: «Canbaa, n baa tieni be yaa bonŋanle ki baa yaa miali n kan gbeni?» 17Jesu den guani ki buali o: «Be yaa po ke a buali nni yaala n ŋani po? Yendo bebe n ye ki ŋani. A yaa bua ki baa yaa miali n kan gbeni, ŋan yaa tiendi li bali maama n bili yaala.» O den buali o: «Lile?» 18Jesu den guani ki yedi o: «Ŋan da kpa nilo, ŋan da conbi, ŋan da tieni mi siedifaama, ŋan da su. #Ñam 20.13-16; Tia 5.17-20. 19Ŋan jigini a baa leni a naa, ki go bua a lielo nani ŋan bua a yuli maama yeni.» #Ñam 20.12; Tia 5.16; Lev 19.18. 20O jawaalo yeni den yedi o: «N kubi lani kuli! N go poadi be?» 21Jesu den yedi o: «A yaa bua ki yaa ŋani cain, ŋan gedi ki ban kuadi ŋan pia yaala, ki pa a luoda li ligi, lane a baa yaa pia ŋalimani tanpoli po. Lani, ŋan cua ki ŋoadi nni.» 22O jawaalo yeni n den gbadi laa maama, o den tagini ki ban caa leni li pabiidili, kelima o ŋalimano den yabi.
23Lani, Jesu den yedi o ŋoadikaaba: «N waani yi i moamoani, li baa yaa pa boncianla o piado po, wan kua tanpoli diema nni. 24N go yedi yi, ku yuoyuogu#19.24 Bi tianba nua ke yuoyuogu yeni tie baabigbengu. Gireki maama po li pa mi gbadima po. n tagini mi kpalipienbonma nni, dingi ki cie o piado n kua U Tienu diema nni.» 25Bi ŋoadikaaba n den gbadi lani, li den paki ba boncianla ke bi yedi: «Li yaa tie yeni, ŋme nan baa fidi ki faabi?» 26Jesu den diidi ba ki yedi: «Bi nisaaliba wani kan fidi la, ama U Tienu po wani, yaala n pa kuli ki ye.»
27Lanwani, Pieli den yedi o: «Diidi ki le, ti den ŋaa likuli ki ŋoadi a. Li nan baa tua ti po lede?» 28Jesu den guani ki yedi ba: «N waani yi i moamoani, li bonla kuli yaa guani ki pandi yaa yogunu, ke o Joa Bijua mo kali o bali kalikaanu leni ti kpiagidi kuli, yinba yaaba n ŋua nni, yimoko baa kali piiga n bali kalikaanilie po, ki jia Isidayeli piiga n buoliedi buudi. #Mat 25.31; Luk 22.30. 29Yua mo n fii ki ŋaa o diena, o naataanjaba, o naataanpola, o baa, o naa, o bila, yaa ka o kuani kelima n yeli po, o baa baa likuli taalima kobiga kobiga, ki go baa yaa miali n kan gbeni. 30Ama liiga yaaba siiga niba boncianla baa tua puoli yaaba, puoli yaaba siiga mo, niba boncianla baa tua liiga yaaba.» #Mat 20.16; Luk 13.30.
Currently Selected:
Matie 19: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
