Matie 10

Bi piiga n tondiliediba

(Mrk 3.13-19; Luk 6.12-16)

1Jesu den yini o piiga n ŋoadikaliediba ki dini ba li bali. O den puni ba u paalu ke ban yaa deli ki ñandi mu cicibiadimu. O go den puni ba u paalu ke ban yaa paagidi bi niba, bi yianbuoli leni bi tadinbuoli kuli po.

2Bi piiga n tondiliediba yeni yela n tie ne:

Yua n kpia, Simon ban go yi yua Pieli leni o waalo Andre, Sebede bijua Jaki leni o waalo Jan, 3Filipi leni Batelemi, Toma leni o lubigaalo Matie, Alife bijua Jaki leni Tade, 4Simon ban yi yua o Yankuadaano#10.4 Puoli po Simon yeni den kuani o yama U Tienu sanŋoadima nni ki bua ki faabi Jufinba, Loma yaaba nuu nni. Kana yua yaa bundima n tie o yankuadaano. Juda den tie Isikarioti dogu yua. leni Judasi Isikarioti yua n den yuandi ki janbi Jesu.

Jesu soani o piiga n tondiliediba

(Mrk 6.7-13; Luk 9.1-6)

5Bani n tie Jesu n den soani o piiga n niliediba yaaba, ki teni ba yaa ñoamabonli n tie ne: 6«Da gedi mani bi nilanba po, ki da kua Samari yaaba dogi nni mo, ama yin gedi Isidayeli buolu po, bani yaaba n tie nani yaa pe n yaadi yeni. 7Yin tagi naankani kuli, yin yaa wangi ke U Tienu diema nagini. #Luk 10.4-12. 8Yin yaa paagidi a yiama, ki fiindi bi tinkpiba, ki ŋanbidi a gbaada, ki deli mu cicibiadimu. Yi den baa fanma, yimo n yaa puuni fanma. 9Da ŋuuni mani wula, ŋanjilifa, yaa ka i ligi kuli yi ŋuuni nni, 10ki da taa sancenboagili, liadalie, cacaadi yaa ka gbiamu, kelima o tuonsoanlo pundi ki baa o bonjekaala. #1Kor 9.14; 1Tim 5.18.

11Yin kua yaa dociamu nni leni yaa dowaalu nni kuli, yin buali ki bandi yaa nilo n baa tuo ki gaa yi cangu yaa ye likani. Yin caani o yaa deni hali yin baa n fii yaa yogunu. 12Yi yaa kua yaa diegu nni kuli, yin fuondi ba ki yedi: ‹Mi yanduanma n yaa ye leni yi.› 13Yi yaa sua ke ku diegu yaaba gaa yi cangu, yin gaali ba yaa yanduanma n yaa ye leni ba. Ama bi yàá gaa yi cangu mo, yi gaali n guani yi kani. 14Bi yàá tuo ki gaa yi cangu, kaa cengi yi maama, yi yaa ña likani, yin kpia ba yi taatama. #JTT 13.51. 15N waani yi i moamoani, ti buudi daali Sodomi leni Gomori yaaba fala kan pundi laa dogu yaaba yaa fala. #Mat 11.24; Cil 19.24-28.

Bi niba n baa waani Jesu tondiba yaa fala

(Mrk 13.9-13; Luk 21.12-17)

16Cengi mani: N soani yi nani i pe yene i fuasangbanli siiga. Yin yaa fani nani i we yeni, ki go yaa dingi nani mu kpaajiemu yeni. #Luk 10.3. 17Fangi mani yi yula leni bi niba, kelima bi baa yaa co ki caani yi li bujiali kani. Bi baa pua yi i baliji li bali maama bangima diena nni. #Mrk 13.9-11; Luk 12.11-12; 21.12-15. 18Bi baa yaa caani yi guveneerinba leni bi badiba kani kelima n yaa po, ke yin tua bi po siedi bani leni bi nilanba po kuli. 19Bi yaa ti cuo ki gedini yi li bujiali kani yaa yogunu, yin da yagi yi yama, yin baa maadi maama leni yin baa yedi yaala kuli po, kelima lanyogunu, bi baa pa yi yin baa yedi yaala. 20Laa tie yinba ka baa maadi, yi Baa Fuoma, yaama n ye yi niinni, n baa maadi.

21Kpelo leni waalo siiga, bi tianba baa cuo biyaba ki teni ban kpa ba. Bibaanba baa cuo bi bila ki teni ban kpa ba. A bila mo baa fii ki sedi bi danba po ki cuo ba ki teni ban kpa ba. #Mrk 13.12; Luk 21.16. 22Bi niba kuli baa nandi yi, kelima n yeli po. Ama yua n baa juuni hali mi juodima baa faabi. #Mat 24.9,13; Mrk 13.13; Luk 21.17. 23Bi yaa waani yi o falabiado doyendu nni, sani mani ki gedi dotogu. N waani yi i moamoani, yi kan gaani Isidayeli yaaba dogi nni kuli ki gbeni, ke o Joa Bijua daa cua.

24O ŋoadika ki cie o canbaa, o naacemo mo ki cie o daano. #Luk 6.40; Jan 13.16; 15.20. 25Li dagidi o ŋoadika n yaa tie nani o canbaa, o naacemo mo n yaa tie nani o daano yeni. Bi yaa yini o diedaano Belisebuli, laa pia tama ke bi baa sugidi o diegu nni yaaba ki cie. #Mat 9.34; 12.24; Mrk 3.22; Luk 11.15.

Yin baa yaa jie yua

(Luk 12.2-7)

26Lanwani, yin da jie ba, kelima liba kuli ki ye ki wuo ki kan wuodi. Liba kuli ki ye ki duagi, ke bi kan bandi la. #Mrk 4.22; Luk 8.17. 27Min yedi yi yaala li biigili nni, waani li mani u yensiinu. Ban soabidi yaama yi tuba nni, kpaani ma mani a diena po. 28Da jie mani yaaba n baa kpa ti gbanandi, ama ki nan kan fidi ki kpa o naano. Ama yin yaa jie mani yua n baa fidi ki bolini o naano leni ti gbanandi kuli ku fantanbuogu nni. 29Baa kuadi nuanilie ka falini? Ama baa noanyenga bi siiga kan baa tiipo, ke yi Baa U Tienu ki bua. 30Ama yinba, ba yi yudi, yi Baa bani ti coali kuli n da maama. 31Lanwani, yin da jie mani puu kuli, yi pia mayuli ki cie i nuani boncianla.

Ki tuo bi ki yie Jesu

(Luk 12.8-9)

32Lani yaa po, yua n tuo nni bi niba nintuali, nmoko baa tuo o n Baa yua n ye tanpoli nintuali. 33Ama yua n nia nni bi niba nintuali, nmoko baa nia o n Baa yua n ye tanpoli nintuali. #2Tim 2.12.

Jesu cuama cuani mi paadima

(Luk 12.51-53; 14.26-27)

34Yin da tama ke n cua ki baa teni mi yanduanma n yaa ye ŋanduna nni ka. Mii cua ki baa teni mi yanduanma ka n yaa ye, ama n cuani bu toabu.#10.34 I kaantiami li yedi ki jugisiega. Ama bi yaa maadi ki jugisiega, bi maadi bu toabu. 35N cua ki baa teni ki bonjaga n paadi leni o baa, ki bonpuoga n paadi leni o naa, ki biyuaga n paadi leni o yaanaa. #Mis 7.6. 36O nilo yibalinba baa yaa tie o diegu nni yaaba.

37Yua n bua o baa bi o naa ki cie mini, waa pundi ki yaa tie n ŋoadika. Yua n bua o bijua bi o bisalo ki cie nni, waa pundi ki yaa tie n ŋoadika. 38Yua n kaa taa o dapoanpoanli ki bugi ki ŋua nni, waa pundi ki yaa tie n ŋoadika. #Mat 16.24; Mrk 8.34; Luk 9.23. 39Yua n bua ki kubi o miali baa biani li. Ama yua n baa biani o miali kelima mini yaa po baa le li. #Mat 16.25; Mrk 8.35; Luk 9.24; 17.33; Jan 12.25.

Yua n gaa Jesu tondo cangu panpaani

(Mrk 9.41)

40Yua n gaa yi cangu, gaa mini yaa cangu yo, yua n gaa n cangu mo gaa yua n soani nni yaagu yo. #Mrk 9.37; Luk 9.48; 10.16; Jan 13.20. 41Yua n gaa o saawalipualo cangu, kelima o tie saawalipualo po, baa baa o saawalipualo n baa baa yaa panpaani. Yua n gaa o niteginka cangu mo, kelima o tie niteginka po, baa baa o niteginka n baa baa yaa panpaani. 42N waani yi i moamoani, n ŋoadikaaba na siiga, ba yua yaa jigidi n wa ki cie, yua n puni o mi ñinsoangima ke o ñuni kelima o tie n ŋoadika kuli, kan luo o panpaani.»

Currently Selected:

Matie 10: BGP

Highlight

Copy

Compare