Malaki 3
3
1O Diedo U Paaciamu Kuli Daano n guani yi yaala tie line: «N baa soani n tondo, ke wan kua liiga ki ŋanbi n po u sanu. Lanyogunu, yin lingi o Diedo yua yeni baa ludi ki cua o diegu nni. Diidi, min den kuani leni yi yaa ŋantaado yeni tondo nne. Wani n kpendi yeni!» Li Miali Diedo U Paaciamu Kuli Daano n yedi yeni.#Mat 11.10; Mrk 1.2; Luk 1.76; 7.27. 2Ŋme n baa fidi ki yaa ye o cuama daali? Ŋme n baa fidi ki sedi o yaa doagidi yaa yogunu? O baa yaa tie nani ban duadi ti kudi leni yaa mu yeni. O baa yaa tie nani a tiaŋuuda ciebu yeni#Jl 2.11; Doa 6.17.. 3O baa kali u maafanu nni nani yua duadi ŋanjilifa yeni. O baa ŋanbi Levi puoliŋuani, ki ñani bi po bi joagindi, nani ban ñandi wula leni ŋanjilifa Joagindi maama yeni. Yeni, bi go baa fidi ki padi yaa pada n tiegi o Diedo po. 4Juda yaaba leni Jerusalemi yaaba n baa yaa kpendinni o Diedo po yaa pada baa yaa mani o po, nani lan den kpa tie maama hali yogu, puoli po bina nni. 5Li Miali Diedo U Paaciamu Kuli Daano yedi: «N baa cua yi siiga ki jia ti buudi. N baa taa a lingida leni mi conconma danba tagili. N baa fii ki sedi yaaba n polini ki pua mi faama leni yaaba n mabindi bi tuonsoanba kaa pa ba bi ligi po. N baa fu leni yaaba n faligidi a kpepuona, a kpienbila leni bi canba.»
Guani mani o Diedo kani
6U Paaciamu Kuli Daano go yedi: «N tie Li Miali Diedo, n kan lebidi, die yinba wani li tie Jakob#3.6 Tiadi mani ke Jakob tie yua n den janbi o kpelo. O saawalipualo bua ki yedi ke bi tie jajanbitieba. puoliŋuani yo. 7Hali yi yaajanba yogunu, yi yaadi ki ŋaa n ñoamabona, kaa tiendi ŋan bili yaala. Lebidi mani ki guani n kani, nmo baa lebidi ki guani yi kani. Li Miali Diedo U Paaciamu Kuli Daano n yedi yeni. Ama yi tua: ‹Ti baa lebidi ki guani a kani lede?› 8Nmo buali yi line: ‹Naani o nisaalo baa fidi ki janbi U Tienu? Ama yi janbidi nni,› ki nan go tua: ‹Ti tieni be ki janbi a?› Yi janbidi nni yi diim leni yi paabu kane. 9Ti solindi ŋua yi kelima yi janbidi nni, yinba Isidayeli nibuoli kuli. 10Lanwani, yaa kpendinni mani yi diim kuli n ŋalimandiegu nni, ke li bonjekaala n yaa ye n diegu nni. Tieni mani yeni ki biigi nni yogunu kuli, ki le n yaa kan luodi yi po tanpoli bona, ki teni li seli n jiidi yi po hali ki yabidi ki kandi. Li Miali Diedo U Paaciamu Kuli Daano n yedi yeni. #Lev 27.30; Coa 18.21-24; Tia 12.6; 14.22-29; Neh 13.12. 11N kan tuo a bonfuoda n bolini yi bonbulikaala. Yi duventiidi baa luoni boncianla. Li Miali Diedo U Paaciamu Kuli Daano n yedi yeni. 12I nilanbuoli kuli baa yaa tua ke yi ye leni li pamanli, kelima yi diema baa yaa tie yaa kaanu n ŋani boncianla. Li Miali Diedo U Paaciamu Kuli Daano n yedi yeni.»
U Tienu n baa doagidi o teginma yaa daali
13O Diedo yedi: «Yi maadi n po mi mapaama, ki nan tua: ‹Ti maadi a po be?› 14Yi yedi: ‹Ki yaa tuuni U Tienu po tie duolikuomi bebe, ti den kubi o ñoamabona, ki go biidi ti pala ti bontienkaala po, wani Li Miali Diedo U Paaciamu kuli Daano nintuali, ama ti baa be lani kuli nni? 15Moala, ti kpaagi ki sua ke bi japaadanba n ye leni mi yemanma, ke li bonla kuli cuoni ti tuonbiadi danba po, ba bi yaa biigi U Tienu leni bi tuonbiada, liba kuli ki yen tieni ba.› » 16Lanwani, yaaba n fangi o Diedo Den maadi leni biyaba, ke o Diedo cengi ki gbadi ban yedi yaala. Bani yaaba n fangi o ki kpiagidi o yeli yeni kuli, o den teni ke bi diani bi yela li tili nni. 17Li Miali Diedo U Paaciamu Kuli Daano yedi: «Min baa doagidi n paalu yaa daali, laa niba kuli baa tua n yaa niba, ki yaa tie mini n ba cele yaa niba. N baa gbadi bi po mi ninñima, nani o nilo n gba o bijua yua n tuuni o po ninñima maama. 18Lani, yi baa le yaa paadima n ye bi niteginkaaba leni bi nibiadiba siiga. Yi baa le yaa paadima n ye yaaba n tuuni U Tienu po leni yaaba n ki tuuni o po siiga.»
U Tienu pabienli daali kpendi
19Li Miali Diedo U Paaciamu Kuli Daano yedi: «N pabienli daali kpendi, ki naani leni yaa buaga n tongi hali ki moandi. Bi japaadanba leni bi nibiadiba baa buodi nani mi muayoma yeni. Landaali, bi baa buodi cain, puu kuli kan sieni bi kani. 20Ama yinba yaaba n fangi n yeli wani yaa po, mi teginma yienu baa pudi ki cuani mi paagima. Yi baa ña ki yaa yugi ki ciini nani a naabiwubida yeni. 21Min baa doagidi n paalu yaa daali yeni, yi baa ŋmaa ki midi bi nibiadiba. Bi baa yaa tie nani mi fantanpienma yeni yi taana tiipo. Li Miali Diedo U Paaciamu Kuli Daano n yedi yeni.»
Eli baa guani ki cua
22O Diedo go yedi: «Yin tiadi mani n naacemo Musa bali maama po, min den teni o n ñoamabona leni n mabilikaama yaama yinba Isidayeli yaaba kuli po, Horebi juali kani. 23Hali ke o Diedo daali, li dacianli yaali n pia i jeje yeni daa cua, n baa soani n saawalipualo Eli yi kani. #Mat 11.14; 17.10-13; Mrk 9.11-13; Luk 1.17; Jan 1.21. 24O baa teni bibaanba leni bi bila n go yaa pia yanyenma. Lani, n kan ti cua ki bolini yi diema.»
Currently Selected:
Malaki 3: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.