Levi 4
4
I candanbaani pada
1O Diedo den yedi Musa: «Waani Isidayeli yaaba yaa maama n tie ne: 2O nilo yaa tieni tuonbiadi ki miidi o Diedo bali maama maamiba kaa faami, bi o yaa tieni yaa bonla n kua, yin baa tieni maama nne:
3Li yaa tie ban den wuli ki gagidi yaa kopadiciamo a pada tuonli po n tieni ti tuonbiadi kaa faami, ki cedi ke bi niba kuli baa i tagili, kelima o tudima yeni po. O baa baa yaa naatonli n ki pia poadi, ki padi o Diedo po, lan tua i candanbaani padili. 4O baa cuani li naatonli yeni u kaangagidiŋanmoanu nintuali, u Kadikaanu Gbandieli buliñoatuogili kani. O baa maani o nuu li naatonli yeni yuli po, ki kodi li lankani, o Diedo nintuali. 5O kopadiciamo, ban den gagidi yua a pada tuonli po yeni baa taa li naatonli yeni soama, ki kuani u Kadikaanu Gbandieli nni. 6O Diedo nintuali, o baa tuuni o nubili mi soama nni, ki mii taalimilele u kaangagidiŋanmoanu kpalidoaginkaabu po. 7O Diedo nintuali, o baa duuni mi soama ban juugi tulale yaa padibinbinli yina, lini yaali n se u kaangagidiŋanmoanu nni. O baa taa yaa soama n sieni, ki wuli a padijuukaana binbinli yaali n se u Kadikaanu Gbandieli buliñoabu kani yeni tiipo. 8O baa ñani i candanbaani padili yaa naatonli yeni kpama kuli, lani n tie: yaa kpakaagu n ŋuagi ti nuadi kuli, 9a cayaanlieda, a kpama, yaa kpama n ye a loga nni, mi pualanma, wan baa taani ki tabidi ki ñani yaama leni a cayaana. 10O kopadiciamo baa ñani laa bonla kuli, nani ban tiendi maama mi taanyenma padili yaa naatonli po. O baa juu likuli li padijuukaali padibinbinli po. 11Yaala n sieni, lani n tie ku gbangu, ti nandi, li yuli, a biana, tugu nni yaala leni yaala n ye lienni kuli, 12o baa ñani likuli li nagili niini ki bili ban gagidi ki lu ti baadi naankani. O baa maani likuli, yaa daadi n maa ban lu ti baadi leni mi fantanpienma yaa tinbengu po, ki juu ki buoni likuli. Lankane ke likuli baa juu ki buodi.
Isidayeli yaaba taataanpadili
13Li yaa tie ke Isidayeli yaaba nitaanli kuli n tieni ti tuonbiadi kaa faami, bi ki tieni yaala n kua, ki miidi o Diedo bali maama, ba ke baa bani, bi kua i tagili nni. 14Ban tieni yaa tuonbiadi yeni yaa doagidi, bi baa cuani naatonli ki padi i candanbaani padili. Bi baa cuani li u Kadikaanu Gbandieli buliñoabu kani. 15U Tienu nintuali, Isidayeli yaaba nikpela baa maani bi nii li naatonli yuli po, bi siiga yendo n kodi li. 16O kopadiciamo, ban den gagidi yua a pada tuonli po yeni, baa taa li naatonli yeni soama ki kuani u Kadikaanu Gbandieli nni. 17O Diedo nintuali, o baa tuu o nubili mi soama, ki mii taalimilele u kaangagidiŋanmoanu kpalidoaginkaabu po. 18O Diedo nintuali, o baa duuni mi soama yaa padibinbinli n se u Kadikaanu Gbandieli nni yeni yina po. O baa taa yaa soama n sieni ki wuli ma a padijuukaana binbinli yaali n se u Kadikaanu Gbandieli buliñoabu kani yeni tiipo. 19O baa ñani li naatonli yeni kpama kuli, ki juu ma li padibinbinli po. 20O baa tieni laa naatonli moko nani ban tiendi i candanbaani padili yaa naatonli maama. O baa tieni lini moko yene. O kopadiciamo baa padi li nitaanli po, ki mia li po sugili yene. Li baa baa sugili mo. 21Yaala n sieni li naatonli yeni nni, o baa ñani likuli li nagili niini, ki juu nani wan den tieni li naatonkpiali maama. Li tie li nitaanli kuli candanbaani padile.
O yudaano padili
22Li yaa tie ke yudaano n tieni tuonbiadi kaa faami, bi ki tieni yaala n kua, ki miidi o Diedo o Tienu bali maama, o kua i tagili nni. 23O yaa ti bandi wan tieni yaa tuonbiadi yeni, o baa cuani yaa ŋuabuali n ki pia poadi, ki padi i candanbaani padili. 24O Diedo nintuali, o baa maani o nuu li ŋuabuali yeni yuli po, ki kodi li, ban kodi a padijuukaana yaa yandi naankani. Li tie i candanbaani padili. 25O kopadiciamo baa tuu o nubili ki padiyanga yeni soama, ki duuni ma a padijuukaana binbinli yina po. Li yaa puoli, o baa wuli yaa soama n sieni li padibinbinli yeni tiipo. 26O baa juu mi kpama kuli li padibinbinli po, nani ban tiendi maama mi taanyenma pada po. O baa padi o yudaano yeni po, ki mia o po sugili yene. Yeni, o baa baa sugili.
Taliga padili
27Li yaa tie ke taliga n tieni tuonbiadi kaa faami, bi ki tieni yaala n kua, ki miidi o Diedo bali maama, o kua i tagili nni. #Coa 15.27-28. 28O yaa ti bandi wan tieni yaa tuonbiadi yeni, o baa cuani yaa ŋuasalo n ki pia poadi, ki padi i candanbaani padili. 29O baa maani o nuu o ŋuasalo yeni yuli po, ki kodi o ban kodi a padijuukaana yaa yandi naankani. 30O kopadiciamo baa tuu o nubili ki padiyanga yeni soama, ki duuni ma a padijuukaana binbinli yina po. Li yaa puoli, o baa wuli yaa soama n sieni li padibinbinli yeni tiipo. 31O kopadiciamo baa ñani mi kpama kuli, nani ban tiendi mi taanyenma padiyanga maama yeni, ki juu ma li padibinbinli po, lan tua o Diedo po nuulumanu. O baa padi o nilo yeni po, ki mia o po sugili yene. Yeni, o baa baa sugili. 32Li yaa tie ke o nilo yeni baa cuani o candandi po pia, o baa cuani pesalo, yua n ki pia poadi. 33O baa maani o nuu o pesalo yeni yuli po, ki kodi o ban kodi a padijuukaana yaa yandi naankani. 34O kopadiciamo baa tuu o nubili ki padiyanga yeni soama, ki duuni ma a padijuukaana padibinbinli yina po. Li yaa puoli, o baa wuli yaa soama n sieni li padibinbinli yeni tiipo. 35O kopadiciamo baa ñani mi kpama kuli, nani ban tiendi mi taanyenma padipia maama yeni, ki taani leni yaala n baa juu kuli, ki juu li padibinbinli po, ki taani leni u mu n buoni yaala o Diedo po. O baa padi o nilo yeni po, ki mia o po sugili yene. Yeni, o baa baa sugili.
Currently Selected:
Levi 4: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
