Ose 2
2
U Tienu n baa faa ki tieni o niba po yaala
1Isidayeli yaaba baa yabidi nani mi ñincianma balinma tanbiima, ban kan fidi ki biigi yaama, ki buali ki coadi ma.
Ban den tua yaa nibuolu:
«Yii go tie n niba,»
Bi baa yedi ba:
«Yi tie U Tienu yua n fo bijaba.» #Lom 9.26.
2Lanwani, Juda yaaba leni Isidayeli yaaba go baa guani ki taani,
Ki dini badiyendo.
Bi baa diedi mi diema,
Kelima Yisireyeli daali yeni baa tua dacianle.
3Lanwani, yini mani yi naataanjaba “N niba” yini yi naataanpola mo “Ban bua yaaba bonŋanla.”
Isidayeli yaaba ŋaa U Tienu
U Tienu yedi:
4«Bu mani leni yi naa Isidayeli,
Bu mani leni o,
Kelima waa go tie n pua,
Nmo ki go tie o calo.
Wan ñani o nunga nni leni o biina siiga
O conconma maalima.
5Lani yaa ka, n baa yiedi o mubima,
Ki ŋaa o o naa n mali o maama.
N baa teni o diema n tua fanpienma,
Ñima n ki ye yaa tinga nni.
N baa teni wan kpe u ñuñuunu.
6N kan yaa bua o bila,
Kelima bi tie puoconconbila yo.
7Bi naa puni o yuli mi conconma po,
Wani yua n mali ba yeni,
Tiendi yaala n pia i fe,
Ki tua: ‹N baa yaa ŋua n jaconcona,
Bani yaaba n puuni nni n jiema leni n ñima,
N pekobidi leni n len,
N kpama leni n daama.›
8Li tie lani yaa po yo,
Ke n baa pigini o sanu leni i konkoni,
N baa maa u bilinu ki pigini u.
O kan go le o sani.
9O baa sani ki ŋoadi o jaconcona,
Ama o kan nandi ba.
O baa lingi ba,
Ama o kan le ba.
Li yaa puoli, o baa yedi:
‹To! N baa guani n cakpelo po,
Kelima min den ye o kani,
Li den mani nni ki cie moala.›
10Waa den bani ke mini n puuni o ŋalikama,
O duvenpaano leni mi kpama.
Waa bani ke mini n den bibini o,
Wan den taa yaa ŋanjilifa
Leni yaa wula ki puni o bulo Baali yeni.
11Li tie lani yaa po yo,
Ke n baa gaa n ŋalikama u jetaagu yogunu,
Ki fie n duvenpaano duven tiidi ciema yogunu.
N baa fie n pekobidi leni n len,
Wan taani yaala ki piigi o ŋasiili.
12N baa yiedi o mubima,
O jaconcona nintuali.
Oba kuli kan fidi ki faabi o n nuu nni.
13N baa teni yaala n bi tie o pamanli kuli n gbeni,
Lani n tie a bina badi,
Wan tiendi yii ŋmapaano kuli,
Mi fuodima dana leni o taanciama kuli.
14N baa bolini o duventiidi leni o kankandi,
Wan maadi yii yaa maama ki tua:
‹N jaconcona n pani nni yaa panpaani n yeni.›
N baa teni likani n tua fuali,
Ti moayandi mo n ŋmani i tiidi yeni.
15O baa baa wan den sundi n po,
Ki padi ki siagi o bulo Baali po
Leni butoe po yaa sinma n pia
U nuulumanu yeni panpaani.
O den sundi n po ki pili o ñoagima ki la o laani,
Ki tiini ki ŋua o jaconcona.
O baa pa likuli panpaani,
Kelima o den sundi mini U Tienu po.
Mini o Diedo n yedi yeni.»
16U Tienu yedi: «Lanwani, n baa teni
O yama n guani ki kua n niinni,
Min gedini o mi fanpienma nni,
Ki ban maadi o mi buama maama.
17Lanwani, n baa guani o o duventiidi,
Ki teni Akori joaloangu#2.17 Akori joaloangu den kuu Jeriko dogu ki tandi ki cuubi nintuali po. Lanwani, yua n ŋoadi gu baa n kua mi diema tugu nne. Li bundima tie “Fala joaloangu.” Li tiadi yaala n den tieni Josue yogunu. Diidi Josue 7.24-26.,
N tua mi suginma buliñoabu.
Lankani, o baa tuo ki yaa ŋua nni,
Nani o jafandi yogunu,
Nani wan den ñani Ejipiti yaa yogunu.»
18O Diedo yedi:
«Lanyogunu o baa yini nni: “N calo.”
O kan go yini nni: “Baali n daano.”
19N baa ñani o ñoabu nni Baali yela.
Bi kan go tiadi ba o yela mo.
20Lanyogunu, n baa kuani o ŋantaado
N niba leni ti moayandi siiga,
Bani leni ti bonyugiditi siiga,
Bani leni yaala n balini ki tinga po kuli siiga.
N baa kua a dabana, mu jugisiemu
Leni ti toatiadi kuli mi diema nni,
Ki teni n niba n yaa goa ke bi jigi co.
21Isidayeli yaaba, n baa yaa tie
Yi togibaa yaa yogunu kuli po,
N baa yaa tie yi togibaa,
Ki yaa ŋua yaa bujiali n tiegi leni mi teginma.
N baa yaa tie yi togibaa,
Mi buama leni mi ninñingbadima nni.
22N baa yaa tie yaa togibaa n kubi o ñoaniani,
Yimo baa bandi mini o Diedo.»
23O Diedo yedi: «Lanyogunu,
N baa tua yaa Tienu n gaani bu miabu,
N baa pa tanpoli wan bua yaala,
Tanpoli mo n pa ki tinga kan bua yaala,
24Ki tinga mo n pa ŋalikama,
O duvenpaano leni mi kpama,
Lani, mo kuli n pa Yisireyeli wan bua yaala.
25N baa buli Yisireyeli mi diema nni,
Ki yaa bua Lo-Ruhama.
N baa yedi Lo-Ami: “A tie n buolu.”
Omo baa yini nni: “N Tienu.”»#2.25 A yaa bua ki gbadi nekanba fuuli, se ŋan guani ki ban diidi Ose bila yela. Diidi 1.3-9. #Lom 9.25; 1Pie 2.10.
Gulmancema Protestant Bible © Bible Society of Burkina Faso, 2013.