Mi cilima 47

1Josefi den gedi ki ban waani Faraon ki yedi o: «N kpeliba leni n baa ñani Kanana diema nni ki cua nekanba, ki kubi bi yandi leni ban pia yaala kuli. Diidi, bi ye Gosen diema nni.» 2O den taa o kpeliba siiga nibimuu, ki waani ba Faraon. 3Faraon den yedi ba: «Yi tuuni be yaa tuonle?» Bi den guani ki yedi Faraon: «A naacenba tie yankpaabe nani bi baanba n den tie maama yeni.» 4Bi go den yedi Faraon: «Ti cua ki bua ki yaa ye mi diema nni, kelima ti muadi naa go ye a naacenba pe po, mi koma mo bia boncianla Kanana diema nni. Lanwani, ŋan pa a naacenba ban kali Gosen diema nni.» 5Faraon den yedi Josefi: «A baa leni a kpeliba cua a kani. 6Ejipiti diema ye a nintuali, teni a baa leni a kpeliba n kali yaa kaanu n ŋani ki cie i kaani kuli Ejipiti diema nni. Ban yaa ye Gosen diema nni, a yaa laa bi siiga nni bi yanfuodanba, ŋan teni ban yaa kubi n po n yangola.»

7Josefi den teni ke o baa Jakob cua ke o waani o Faraon. Jakob den gaali Faraon. 8Faraon den yedi Jakob: «A pia binaŋa yo?» 9Jakob den guani Faraon ki yedi o: «N candi ŋanduna nni bina pundi bina kobiga n piitaa. N miali bina naa yabidi. N laa fala a bintiama, ŋaa pundi n baanba candi ŋanduna nni yaa bina.» 10Jakob go den gaali Faraon ki ñani Faraon kani. 11Josefi den teni ke o baa leni o kpeliba kali mi diema nni, ki puni ba ki tinga ke bi diedi ga Ejipiti diema nni. O den puni ba yaa kaanu n ŋani ki cie i kaani kuli mi diema nni, Ramisesi diema nni nani Faraon n den ñani li ñoamabonli maama. 12Josefi den puni o baa leni o kpeliba mi jiema leni o baadiegu nni yaaba kuli, ki ŋoadi nani bi bila coali n den pundi maama.

Josefi n soani maama mi koma yogunu

13Jiema naa go den ye mi diema nni kuli, kelima mi koma den bia boncianla. Ejipiti diema leni Kanana diema den bua ki biidi cain kelima mi koma po. 14Josefi den gaa Ejipiti diema leni Kanana diema nni ligi kuli, kelima bi den daa ŋalikama. O den bili laa ligi kuli Faraon diegu nni. 15Yaa ligi n den ye Ejipiti leni Kanana diema nni kuli n den gbeni yaa yogunu, Ejipiti yaaba kuli den cua Josefi kani, ki yedi o: «Pa ti mi jiema kelima ligi naa go ye. Be yaa po ke ti baa kpe a nintuali?» 16Josefi den yedi: «Cuani mani yi yangola, n baa lebidi ki teni yi mi jiema, li yaa tie ke yii go pia ligi.» 17Lanwani, bi den cuani bi yangola Josefi kani ke o teni ba mi jiema, ki lebidi leni bi taami leni bi yangola ya n den tie pe, ne leni ŋunbi kuli. O den teni ba mi jiema laa binli kuli kelima bi yangola po.

18Laa binli n den pendi, bi go den cua Josefi kani yaa binli n den ŋua ki yedi o: «Ti kan wuoni ti daano ke ti ligi kuli gbeni, ke ti taa ti yangola kuli ki cua ki teni ti daano. Puu naa go sieni ti daano nintuali, moala se ti gbanandi leni ti tinmu bebe. 19Be yaa po ke ti baa kpe a nintuali? Ti yaa kpe, ti tinmu go pia ti po mi laa fuome? Ŋan daa tinba leni ti tinmu kuli, ki lebidi leni mi jiema. Ti baa tua Faraon yonbi, wan diedi ti leni ti tinmu kuli. Pa ti li bonbulikaala ke tin yaa ye ki da kpe, ke ti tinmu n da tua tinfanmu.» 20Josefi den daa Ejipiti tinmu kuli Faraon po, kelima mi koma den gbadi ba boncianla. Mi diema kuli den tua Faraon yaa yaama. 21O den ñani Ejipiti diema banlu kuli yaa niba i kuani nni, ki cuani ba i dociami nni. 22Waa den gaa bi kopadicianba yaa tinmu bebe yo, kelima Faraon bali maama den ye ki ŋanbi bi kopadicianba po, ke ban yaa ye leni Faraon n den puni ba yaala. Lani yaa po, baa den kuadi bi tinmu. 23Josefi den yedi bi niba: «N daa yi dinla leni yi tinmu kuli Faraon po. Gaa mani li bonbulikaala ki nan fidi ki buli i kuani. 24Ŋalikama cema yogunu, baabuodimuu kuli siiga, yi baa pa Faraon baabuoyengu, ki yaa kubi baabuodinaa, yi kuani bulima po, yinba yi ba, yi bila leni yaaba n ye yi diedi nni kuli jiema po.» 25Bi den yedi o: «A gaa ti miana. Ti baa li ŋanbili ti daano nintuali, lanwani ti baa yaa tie Faraon yonbi.» 26Josefi den teni ke laa maama tua li bali maama ki ye hali moala. Li yedi ke Ejipiti tinga kuli bonbaakaala siiga, bonyenla bonlimuu kuli siiga tie Faraon yaa yaale. Li tie bi kopadicianba yaa tinmu bebe yo ke Faraon naa den diedi.

Jakob miajuodikaabu

27Isidayeli yaaba den kaa Ejipiti diema nni Gosen tinfanma nni. Bi den baa li baali, ti madi mo den tuo ba hali bonŋanla. 28Jakob den tieni piiga n binalele Ejipiti diema nni, ke Jakob miali bina den pundi kobiga n piinaa n binalele. 29Isidayeli n den sua ke o kuuma yogunu bua ki pundi, o den yini o bijua Josefi ki yedi o: «Li yaa tie ke a pali mani n po, n mia ŋa, ŋan soali a nuu n panli tiipo, ki poli ke n baa fidi ki dugi a buama po. Ŋan da piini nni Ejipiti diema nni. 30N yaa duani leni n danba, a baa taa nni ki ñani nni Ejipiti diema nni, ki piini nni n baanba takula nni.» Josefi den guani ki yedi: «N baa tieni ŋan yedi nni yaala.»#Cil 49.29-32; 50.6. 31Jakob den yedi: «Ŋan poli n po ke a baa tieni yeni.» Josefi den poli. Lanwani, Isidayeli den gbaani o duanu yuli kani, ki pugi.

Currently Selected:

Mi cilima 47: BGP

Highlight

Copy

Compare