Mi Ñama 33
33
U Tienu yedi Musa n fii ki suagi liiga
1O Diedo den yedi Musa: «Fii ki ña nekanba, fini leni ŋan den ñani yaaba Ejipiti diema nni kuli, ki gedi min den poli ki niani Abalahama, Isaaka leni Jakob ke n baa pa bi puoliŋuani yaa diema nni.#Cil 12.7; 26.3; 28.13. 2N baa soani n maleki wan yaa ye liiga ki cangi yi. N baa deli Kanana, Amoriti, Hititi, Perisiti, Hiviti leni Jebusi yaaba. 3Yin gedi mani mi naaŋanma leni ti siadi n dua naani. Ama n kan yaa ye yi siiga li sancenli nni, ke min da ti bolini yi li sancenli nni, kelima yi tie i tupaali danba.»
4Bi niba kuli n den gbadi laa laabaalibiado bi den buudi, niloba kuli naa den lani o baditiadi. 5O Diedo den kpa yedi Musa: «Ŋan yedi Isidayeli yaaba: Yi tie i tupaali danba. N yaa bi ye yi siiga ki yegi leni yi ba yogunu waamu bebe, n bi baa bolini yi. Moala, yin landi yin la yaa baditiadi, ke n baa le min baa tieni yi yaala.» 6Lane ke Isidayeli yaaba den landi bi baditiadi, ban den fii Horebi juali kani yaa yogunu.
U Kadikaanu Gbandieli
7Musa den taa li gbandieli ki ban tii li li nagili niinpo, ke li foagi leni li nagili. O den yini li u Kadikaanu Gbandieli. Yua n den bua ki lingi o Diedo kuli, yen ña ki gedi u Kadikaanu Gbandieli kani, yaali n den ye li nagili niinpo. 8Musa yaa den caa li gbandieli po, bi niba kuli yen fii ki sedi. Nilo kuli yen sedi o gbandieli buliñoabu kani ki yaa diidi Musa hali wan ban kua li gbandieli nni. 9Musa yaa den kua li gbandieli nni yaa yogunu kuli, ku tawaligu yen jiidi ki sedi li gbandieli buliñoabu kani, lanwani o Diedo yen maadi leni Musa.
10Ku niligu kuli yaa den laa ke ku tawaligu sedi li dieli buliñoabu kani, bikuli yen fii ki gbaani bi gbandiena buliñoana kani, ki pugi. 11Li tie yene ke o Diedo yen maadi leni Musa ki nunga leni ki yaga, nani o nisaalo n yen maadi leni o lielo maama yeni. Li yaa pendi, Musa yen guani li nagili nni, Nun bijua Josue, yaa jawaalo n den tie Musa todika, naa den ña li gbandieli nni.
O Diedo boe leni Musa
12Musa den yedi o Diedo: «Diidi ki le, a den yedi nni mine: ‹Ŋan teni yaa niligu n tie ne kuli n suagi liiga, ama a naa waani nni, ŋan baa soani mini leni yua. Die ba yeni, a den yedi ke a bani nni bonŋanla, ki go bani n pali, ke a pali mo mani n po.› 13Moala n mia ŋa, li yaa tie ke a pali mani n po, ŋan doagidi n po a yanjagili. Yeni, n baa bandi ke a pali mani n po, ke a go tiadi ke u nibuolu ne tie a yuu yo.» 14O Diedo den guani ki yedi o: «Mini n ba, n baa yegi leni a, n baa pa ŋa mi fuodima moko.»
15Musa den guani ki yedi o: «A yaa kan yegi leni ti fini a ba, ŋan da teni tin ña ne. 16Be n baa teni ban bandi ke a pali mani mini leni a niba po? Li yàá tie ke a baa yegi leni ti yaa ka? Yeni, mini leni a niba baa gagidi, ki paadi leni yaa nibuoli n ye ŋanduna nni kuli.»
17O Diedo den yedi Musa: «N baa tieni ŋan mia nni yaala kuli, kelima n pali mani a po. N bani a bonŋanla, ki go bani a pali.»
18Musa go den yedi: «N mia, ŋan teni min le a kpiagidi.» 19O Diedo den guani ki yedi: «N baa teni n ŋanma kuli n tagini a nintuali. N baa taa mini Li Miali Diedo yeli a nintuali, kelima n gba mi ninñima min bua yua yaa po. N baa yaa dingidi n pali min bua ki yaa dingidi li yua yaa po.»#Lom 9.15. 20O go den yedi Musa: «A kan fidi ki le n nunga, kelima o nisaalo kan fidi ki le nni, ki go yaa ye.» 21O go den yedi: «Diidi yaa kaanu n kuu n kani ne, a baa yaa se lankane ku tanciangu po. 22N kpiagidi yaa baa pendi, n baa kuani a ku tanlongu nni, ki pii ŋa leni n nuu, hali n yaa pendi. 23Lani, n yaa piidi n nuu, a baa le n puoli po, ama n nunga wani, kaa pia lema.»
Currently Selected:
Mi Ñama 33: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
