Mi Ñama 31

U kaangagidiŋamu tuonsoanba

1O Diedo den maadi leni Musa, ki yedi: 2«Diidi, n gandi Betisaleeli Uri bijua, Huri yaabili, Juda buolu yua. 3N gbieni o leni U Tienu Fuoma leni mi yanfuoma, mi banma leni i tuonbuoli kuli banma. 4O bani a tuona boncianla n baa cuoni maama, o bani ki duadi wula, ŋanjilifa leni ti kumoandi. O bani a tanmoana leni ti daadi n baa kpie maama. 5O bani a tana ya n pia mayuli ke a dunga pa n baa kpie maama, ti daadi n baa kpie maama, o bani tuonli kuli n baa soani maama. 6N teni ke Ahisamaki bijua Oholiabi, Dan buolu yua n baa tua o po todika. N puni a tuonsoanbanda mi yanfuoma, ke ban taani ki soani min puogi a yaa tuonli kuli. 7Laa tuona n tie ne: U Kadikaanu Gbandieli, ku ŋantaadikpaku, ku ŋantaadikpaku biili, u Kadikaanu Gbandieli nni tiadi kuli, 8tabili yua n gagidi ki ŋani, u fidisantuankaanu yuu n tagi leni wulamoano leni u tiabidi bidi, tulale padibinbinli, 9li padibinbinli leni li tiabidi bidi, ku tadigu leni ku tuankaanu, 10u badu tiadi, o kopadiciamo Alono leni o bijaba n baa yaa la yaa tiadi ke ti gagidi ki ŋani, ki tuuni li kopadiciantuonli, 11mi kpagagidikaama yaama n ŋani, u kaangagidiŋamu tulale. Bi baa tieni likuli nani min bili maama yeni.»

Yin baa jigini U Tienu fuodima daali maama

12O Diedo den maadi leni Musa, ki yedi: 13«Yedi Isidayeli yaaba: Li tie yi po tilade yin jigini n fuodima dana, kelima yaa yogu n tuu yaa yogu, n fuodima dana n baa yaa tie siedi, mini leni yinba ŋantaado po. Lani, n baa teni ban bandi ke n tie Li Miali Diedo yua n Gagidi ki ŋanbidi yi. 14Yin yaa jigindi mani mi fuodima daali, kelima landaali baa gagidi ki yaa ŋani yi po. Yua n fali landaali, bi baa kpa o. Yaa nilo n soani tuonliba landaali, bi baa ñani o o buolu nni. 15Yi baa soani danaluoba, ama li daleleeli tie mi fuodima daali, jaanma daali, yaali n gagidi ki bili o Diedo po. Yua n soani tuonliba mi fuodima daali, bi baa kpa o.#Ñam 20.8-11; 23.12; 34.21; 35.2; Lev 23.3; Tia 5.12-14. 16Isidayeli yaaba baa kubi U Tienu fuodima daali jaanma. Nifiima n tuu nifiima, bi baa bogidi U Tienu fuodima daali jaanma. Lani n tie min bili yaala leni ba, i yogini kuli po. 17Landaali baa yaa tie siedi mini leni Isidayeli yaaba siiga i yogini kuli po, kelima danaluoba, o Diedo den tagi tanpoli leni ki tinga, li daleleeli, o den sieni o tuonli ki fuodi.»#Ñam 20.11.

18O Diedo n den maadi leni Musa Sinayi juali po ki gbeni, o den teni o siedi tanpabiliedimu, U Tienu wani o ba, n den diani o bali maama yaamu yaa po.

Currently Selected:

Mi Ñama 31: BGP

Highlight

Copy

Compare