Mi Ñama 3

U Tienu yini Musa

1 Musa den kpaa o cuado Jetiro, Madiani kopadiciamo yangoli. O den gedini li yangoli hali mi fanpienma pendima, ki pundi U Tienu juali Horebi kani.

2O Diedo maleki den doagidi o kani, ki ye ku tuugu nni, u mupienu nni. Musa den diidi ki sua ke ku tuugu co, ki naa buodi.

3Musa den yedi: «N baa jadi ki le laa bonlidinkaala n tie yaala, ki go le yaala n teni ke ku tuugu naa buodi.» 4O Diedo n den laa ke o jadi ki baa le yaala, lani, U Tienu den yini o ku tuugu siiga nni, ki yedi o: «Musa! Musa!» O den guani ki yedi: «Mini nne!» 5U Tienu den yedi: «Ŋan da nagini nekanba, pidi a cacaadi kelima ŋan se yaa kaanu yeni tie tingagidikaaga.» 6O go den yedi o: «N tie a baa Tienu, ki go tie Abalahama, Isaaka leni Jakob Tienu.» Musa den pii o nunga kelima o den jie kaa bua ki noanli ki le U Tienu.

7O Diedo den yedi: «N laa n niba fala Ejipiti nni. N gbadi ban buudi yaa bubula, yaaba n faligi ba n teni ke bi buudi ya. N bani bi fala. 8N jiidi ki baa faabi ba Ejipiti yaaba nuu nni, ki teni ban ña laa diema nni, ki kua yaa diema n ŋani ki go yabi yaa niinni. Mi naaŋanma leni ti siadi n dua naani. Li tie Kanana, Hititi, Amoriti, Persi, Hiviti leni Jebusi yaaba n ye yaa diema nni. 9Moala, Isidayeli yaaba bubula pundi hali n kani. N laa Ejipiti yaaba n wangi ba yaa falaciamo. 10Moala, gedi, n baa soani a Faraon kani, ŋan teni n niba Isidayeli yaaba n ña Ejipiti diema nni.»#JTT 7.30-34.

U Tienu waani Musa o yeli

11Musa den yedi U Tienu: «Nmo tie ŋme yo ki baa fidi ki gedi Faraon kani, ki teni Isidayeli yaaba n ña Ejipiti diema nni?» 12U Tienu den yedi: «N ye leni a, line n baa yaa tie a po mi maalima ke mini n soani a. A yaa teni ke bi niba ñani Ejipiti nni, yi baa yaa tuuni U Tienu po li naa juali kani.»

13Musa den yedi U Tienu: «Lanwani, n baa gedi Isidayeli yaaba kani ki yedi ba: Yi baanba Tienu n soani nni yi kani. Ama bi yaa buali nni: o yi lede? N baa guani ba be?»#Ñam 6.2-3. 14U Tienu den yedi Musa: «N TIE MIN TIE YUA.» O go den yedi: «Ŋan maadi Isidayeli yaaba yaa maama n tie ne: ‹“N YE,” n soani nni yi kani.› »#Doa 1.4,8. 15U Tienu go den yedi Musa: «A go baa maadi leni Isidayeli yaaba, ki yedi ba yaa maama n tie ne: ‹Li Miali Diedo yi baanba Tienu yua n go tie Abalahama, Isaaka leni Jakob Tienu, wani n soani nni yi kani.› N yeli n yeni, yaa yogu n tuu yaa yogu, min bua ban yaa yi nni maama n yeni, nifiima n tuu nifiima. 16Gedi ki ban taani Isidayeli yaaba nikpela, ki yedi ba: ‹Li Miali Diedo yi baanba Tienu den doagidi n kani, wani yua n tie Abalahama, Isaaka leni Jakob Tienu. O den yedi: N nua yi, ki go nua ban tiendi yi yaala Ejipiti nni. Lani n teni 17ke n yedi ke n baa teni yin ña Ejipiti nni, yin laadi fala naankani. N baa teni yin kua Kanana, Hititi, Amoriti, Perisiti, Hiviti leni Jebusi yaaba diema nni, mi naaŋanma leni ti siadi n dua naani.› 18Bi baa cengi a maama. Yeni, fini leni Isidayeli yaaba nikpela baa gedi ki ban le Ejipiti bado ki yedi o: ‹Li Miali Diedo, Hebilu yaaba Tienu den doagidi ti kani. Lanwani, pa ti u sanu, tin cuoni danataa cenli ki gedi mi fanpienma nni, ki ban padi a pada o Diedo ti Tienu po.›

19N bani ke Ejipiti bado kan tuo yin gedi, li yàá tie ke n waani o n nuu paalu yaa ka. 20N baa tandi n nuu ki pua Ejipiti leni mi bancianma buoli kuli, min baa tieni yaama mi diema nni. Lani yaa pendi, o baa gbe ki cedi yin gedi.

21N baa teni bi niba yeni n baa li ŋanbili Ejipiti yaaba kani, ke yi yaa fii, yi kan fii nikuomi. 22Pua kuli baa mia o kuantalielo leni o yieninlielo yaa tiadi n tie ŋanjilifa, wula tiadi leni ti tiayiekaadi yi bijaba leni yi bisiaba po. Yeni n tie yin baa fagi Ejipiti yaaba maama.»#Ñam 12.35-36.

Currently Selected:

Mi Ñama 3: BGP

Highlight

Copy

Compare