Mi Ñama 19

U Tienu n kuani o ŋantaado leni o niba maama

19—24

U Tienu kuani o ŋantaado leni Isidayeli yaaba

1Isidayeli yaaba n den ñani Ejipiti diema nni, ki cuoni ke li pundi ŋmaalitaa yaa daali, bi den pundi Sinayi fanpienma. 2Bi den fii ki ñani Refidim, ki ban pundi Sinayi fanpienma nni. Bi den kali mi fanpienma nni. Lankani yo, ke Isidayeli yaaba den jiidi ki kali, ki tiegi li juali. 3Musa den doni ki gedi U Tienu kani. O Diedo den yini o hali li juali tanpoli ki yedi o: «Maadi Jakob buolu yaa maama n tie ne, ki yedi bani Isidayeli yaaba: 4‹Yi den laa yinba yi ba min den tieni Ejipiti yaaba yaala. N den bugi yi nani jiebani n bugi o bila maama yene, ki cuani yi n kani. 5Moala, yi yaa cengi nni, ki go kubi n ŋantaado, yi baa yaa tie n niba i nibuoli kuli siiga, kelima mini n die ki tinga kuli.#Tia 4.20; 7.6; 14.2; 26.18; Tit 2.14; 1Pie 2.9. 6Yi baa yaa tie n po bi kopadicianba diema, ki go tie n po yaa nibuolu n gagidi ki ŋani.› Diidi ŋan baa maadi Isidayeli yaaba yaala.»#Doa 1.6; 5.10.

7Musa den gedi ki yini ki taani li nitaanli nikpela, ki doagidi bi po laa maama kuli, nani o Diedo n den puogi o maama yeni. 8Bi niba kuli den taani ki yedi: «Ti baa yaa tiendi o Diedo n yedi ti yaala kuli.» Musa den guani ki waani o Diedo bi niba maama kuli. 9O Diedo den yedi Musa: «Diidi, n baa cua a kani yaa tawaligu n kpiagi boncianla niinni, bi niba n gbadi min maadi leni a yaa yogunu, lani n tie ban dugi a po yaa yogunu kuli.» Musa den guani ki togidi o Diedo bi niba maama.

U Tienu tuogi Musa Sinayi juali po

10O Diedo den yedi Musa: «Gedi bi niba kani ki gagidi ki ŋanbi ba dinla leni saala. Ban ŋuudi bi tiadi. 11Ban yaa bogindi li dataali daali po, kelima li dataali daali, o Diedo baa jiidi Sinayi juali yuli po, bi niba kuli nintuali. 12A baa bili u bianu li juali lindima kuli bi niba po, ki yedi ba: ‹Yin fangi mani yi yula ki da do li juali, ki da sii li kunu mo.› Yua n sii li kuli, bi baa kpa o.#Heb 12.18-20. 13Ban da sii yua n sii li juali, se ban lugidi o a tana, lani yaa ka ban toa o i piemi: lan tie yanga bi lan tie nilo, yi kan ŋaa o leni miali. Li naatuntunli yaa piebi, bi nitianba baa do li juali po.»#19.13 Diidi diani 24.1 leni 9 ki gedi 11.

14Musa den jiidi li juali po ki gedi bi niba kani. O den gagidi ki ŋanbi bi niba. Bi den ŋuudi bi tiadi. 15O den yedi ba: «Yin bogini ki gbeni ne leni danataa. Yin da nagini pua kuli.»

16Li dataali tiŋaagu, i tatantani, mi tañigima leni yaa tawaligu n kpiagi den ye li juali po. Li naatuntunli den piebi hali boncianla, ke ti jawaandi den cuo bi niba kuli li nagili nni ke bi digibi.#Doa 4.5. 17Musa den teni ke bi niba ñani li nagili nni, ki gedi ki baa n tuogi U Tienu. Bikuli den sedi li juali tiipo.

18Sinayi juali kuli den tie muñii, kelima o Diedo den jiidi leni u mu. Laa muñii den fii ki doni nani ki buaga muñii yeni, li juali kuli den digibi hali boncianla.#Tia 4.11-12.

19Li naatuntunli den piebi hali boncianla. Musa den maadi, ke U Tienu mo guandi o leni u nialiciamu.

20O Diedo den jiidi Sinayi juali yuli po, ki yini Musa ke o doni. 21O Diedo den yedi Musa: «Go jiidi ki waani bi niba bonŋanla, ke ban da sani ki cua o Diedo kani ke bi baa diidi, lani n tie bi siiga boncianla n da ti kpe. 22Ba bi kopadicianba yaaba n nagidi o Diedo kani, ban gagidi ki ŋanbi bi ba, ke o Diedo n da pua ki kpa ba.»

23Musa den yedi o Diedo: «Bi niba kan fidi ki do Sinayi juali, kelima a den kuani ti laa kuali ki yedi: Ŋan bili u bianu li juali lindima, ki gagidi li.»

24O Diedo den yedi o: «Fii ki jiidi. A baa yuandi ki do, fini leni Alono kuli. Ama bi kopadicianba leni bi niba n da sani ki do mini o Diedo kani, ke min da ti pua ki kpa ba.»

25Musa den jiidi bi niba kani ki waani ba laa bonla.

Currently Selected:

Mi Ñama 19: BGP

Highlight

Copy

Compare