Esiteri 7
7
Hamani janbi guani ki baa o yuli po
1O bado leni Hamani go den yegi ki gedi o puobado Esiteri n go den ŋanbi yaa jaanjiema po. 2Bi gediliema daali yeni, ban den ñu duven yaa yogunu, o bado go den yedi Esiteri: «Esiteri, a miabu tie be? Li yaa tie ba n diema boagidima, a baa baa.»
3O puobado Esiteri den guani ki yedi o: «Fini o bado pali yaa mani n po, ke li mani a po, ŋan gaa n miali ki teni nni, lani n tie n miabu. Ŋan go faabi n buolu, lani n tie min bua yaala. 4Bi kuadi ti, mini leni n buolu yeni, ki baa kodi ti ki bolini ti cain. Li yaa bi tie ke bi kuadi ti tin tua yonbi bebe yo, n bi baa yaa ŋmini. Ama lan tie maama yeni, ti yibali kan fidi ki ŋanbi wan baa biidi fini o bado po yaala.»#7.4 Laa vedise go baa fidi ki soagini nanda: Bi yaa bi kuadi ti tin tua yonbi, n bi baa ŋmini, kelima li kan bi yaa tie tiladi min yagi a yama.
5O bado Asuerusi den yedi o puobado Esiteri: «Yua n jagi ke o baa tieni laa bonla tie ŋme? O ye le?»
6Esiteri den guani ki yedi o: «Ti yibali, yua n wangi ti fala tie Hamani, yaa nibiado n tie ne.»
Ti jawaanciandi den cuo Hamani o bado leni o puobado nintuali. 7O bado pali den beni boncianla ke o fii ki ñani mi jaanjiema kani, ki gedi o diegu salidinga nni. Ama Hamani den ledi ki kaa ki bua ki mia o puobado Esiteri wan faabi o miali, kelima o den laa ke o bado jagi ke o baa kpa o.
8O bado n den ñani o diegu salidinga nni ki guani mi jaanjiema kani, o den sua ke Hamani nagini ki baa Esiteri n kaa yaa kalikaanu po, ke o yedi: «Naani o joa ne go bua ki ñii o puobado n diegu nni, n nintuali mo?»
O bado n den maadi yeni, bi den pini Hamani nunga.#7.8 Bi yen pini ban jia yaaba yaa buudi ke bi baa kpe yaa nunmu. 9Yaa moagilimu n den ye leni o bado siiga nni yendo, ban yi yua Halibona, den yedi o bado: «Diidi ki le, Hamani den bogini ku daagu Mardoke po, wani yua yaa maama n den faabi o bado miali. Ku daagu yeni caa Hamani diegu nni, ke ku foaginu pundi nukpanduna piimuu.» O bado den yedi: «Ban ban soadi Hamani ku po.»
10Lane bi den soadi Hamani wan den bogini yaa daagu Mardoke po yeni. Li yaa puoli, o bado pali den kuugi.
Gulmancema Protestant Bible © Bible Society of Burkina Faso, 2013.