Kolosi 1

Kilisiti tuonli n tie maama

1—2

I fuondi

1Mini Poli, yua n tie Jesu Kilisiti tondo, kelima U Tienu yanbuama po leni ti kpiilo Timote, n diani li tili ne, 2yinba ti kpiiba yaaba n tie bi nigagidiŋanba leni bi nidugikaaba Kilisiti nni, ki ye Kolosi dogu nni po. Ti Baa U Tienu n pa yi li ŋanbili leni mi yanduanma.

Poli pagi U Tienu Kolosi yaaba po

3Ti tuondi U Tienu ti Diedo Jesu Kilisiti Baa yi po, ki go jaandi yi po yaa yogunu kuli kaa cedi, 4kelima tin gbadi ke yi pia yaa dandanli Jesu Kilisiti po leni yaa buama bi nigagidiŋanba kuli po. 5Yi baa la kelima U Tienu n bili yi po yaa suginma tanpoli po, i moamoani maama, yaama n tie o Laabaaliŋamo n den kpa cua yi kani, ki bangi yi yaama. 6Laa laabaaliŋamo pundi yi kani ki yadi ŋanduna nni kuli, ki luoni o bonluonkaala ki yabidi ki pugidi. O go tiendi yeni yi siiga, hali yin den gbadi o yaa daali ki bandi U Tienu ŋanbili n tie yaala moamoani. 7Li tie nani ti buado leni ti tuonsoanlielo Epafrasi n den bangi yi maama. O tie yi po Kilisiti naacendugika, #Kol 4.12; Flm 1.23. 8ki den waani ti U Tienu Fuoma n teni ke yi pia yaa buamoanma.

9Li tie lani yaa po ke hali tin gbadi lani kuli yaa daali, ti jaandi yi po U Tienu kaa cedi, ki miadi o wan gbieni yi pala leni yaa yanfuoma leni yaa fanu n ñani wani U Tienu kani, ke yin bandi o yanbuama. 10Yeni, yi tagu n yaa tie nani lan dagidi o Diedo po maama, ke yin yaa tiendi yaala n mani o po yogunu kuli. Yin yaa tuuni a tuonŋama buoli kuli, ki kpedi ki suagi liiga U Tienu bandima nni. 11Ti go miadi o ke wan pa yi u paalu li bonla kuli po, kelima o paalu yuu n pia ti kpiagidi yaa po, ke yin yaa pia li toli leni li juunli yogunu kuli. 12Yaa tuondi mani Baa leni li pamanli, yua n teni ke yi dagidi ki baa yi biinu wani U Tienu n bili yaa ŋalimano mi yenma diema nni, o nigagidiŋanba po. 13O faabi ti ki ñani ti li biigili paalu nni, ki kuani ti o Bibuadiga diema nni. 14O yaa niinne ke ti pia mi daafaabima leni ti tuonbiadi sugili. #Efe 1.7.

Kilisiti n tie yua leni wan tuuni yaa tuonli

15Wani Kilisiti n tie U Tienu,

Tin kaa fidi ki nua yua yaa nannanli,

Ki go tie o Bijakpiaga,

Yua n den ye hali ke bonliba kuli daa tagi.

16Li bonla kuli den tagi o yaa niinni,

Yaala n ye tanpoli leni ki tinga nni kuli,

Tin nua yaala leni tin kaa nua yaala.

Lani n tie yaaba n kaa i bali-kalikaani po,

Bi diediba, bi yudanba leni li bali danba kuli.#1.16 Lan maadi yaaba yaa maama ne, tie ban nua yaaba ke bi dini li bali tanpoli po leni ki tinga nni kuli. Li fidi ke li tie malekinba siiga yaa bala.

Li bonla kuli tie o yaa tagima ki go tagi o yaa po.

17O ye hali ke bonliba kuli daa ye.

Wani n kubi li bonla kuli ke li tuugi ki se bonŋanla.

18Wani n tie Kilisiti Nitaanli kuli yuli,

Lini yaali n tie o gbanandi.

O tie o nikpialo, U Tienu Bijakpiaga.

U Tienu den kpa fiini wane bi tinkpiba siiga,

Ke wan yaa tugi li yuli li bonla kuli nni.#Efe 1.22-23.

19Li den mani U Tienu po ke o yedagidikaama kuli,

N yaa ye Kilisiti niinni.

20O yanbuama po goga,

O teni ke li bonla kuli,

Yaala n ye ŋanduna nni leni tanpoli po kuli,

N mangi leni o kelima Kilisiti yaa po.

O ñani ti yibalindi ki teni ke i mani ye,

Kelima o soama li dapoanpoanli po. #Efe 2.16.

21Yinba yaaba n den tie bi canba leni U Tienu yibalinba kelima yi yantiabiada leni yi tuonbiada po, 22o teni ke yi mangi leni o moala kelima o Bijua n den kpe yaa kuuma o gbanandi nni yaa po. U Tienu tieni yeni ki bua ke yin sedi o nintuali ki ŋani cain, ki da pia tagiliba kuli, kaa pia ban baa kuli yi leni yaala. 23Li baa yaa tie yeni ke yin yaa se bonŋanla yaa tanpuuli n pa po, kelima yi dandanli po, ki naa lebidi ki ŋaa o Laabaaliŋamo suginma, yin den baa yaadi. Bi waani ŋanduna yaaba kuli o Laabaaliŋamo yeni, mini Poli mo n tua yua yaa naacemo.

Poli tuonli Kilisiti Nitaanli po

24N mangidi n pali moala leni min laadi yi po yaa fala. N tiendi yeni ke min gbieni n gbanandi nni yaala n poadi Kilisiti yaa fala o gbanandi nni, yaadi n tie o Nitaanli.#1.24 Laa bua ki yedi ke Kilisiti fala ki den dagidi ki baa fidi ki faabi ti. Ama li maadi yua n daani kuli n baa le yaa fala. 25N tua Kilisiti Nitaanli yaa tuonsoanlo, kelima U Tienu den puogi nni ke min yaa wangi yi U Tienu maama kuli. 26Mani n tie yaa bondoaginkaala n den wuo hali yogu, yaa jamaani n pendi kuli po, ki doagidi moala o nigagidiŋanba po. 27O bua ki teni o nigagidiŋanba n yaa bani o bondoaginkaala, yaala n tie ŋalimani, ki pia ti kpiagidi, ki ye i nibuoli kuli po. Laa bondoaginkaala tie line, Kilisiti ye yi niinni, ki teni ke yi pia ti dugidi, ke yin taani ki baa U Tienu kpiagidi. 28Ti tuodi ki wangi nilo kuli wani yaa maame, ki go bangi laa maama leni mi yanfuoma, ki bua ki cuani nilo kuli U Tienu kani, ke o dagidi cain Kilisiti nni. 29Li tie lani yaa po ke n tuuni, ki moa li muali leni o yaa fidu, yuu n tuuni n niinni leni u paalu.

Currently Selected:

Kolosi 1: BGP

Highlight

Copy

Compare