Amosi 1
1
Yaa buudi n ye Isidayeli leni o kuantalieba po
1—2
1U Tienu den doagidi Amosi yua n den tie Tekoa dogu yankpaaba siiga yendo po. O den baa li bonlekaala yaala n tie Isidayeli diema po. Li den tie Osiasi n den tie Juda bado, ke Yoasi bijua Jeroboami mo tie Isidayeli diema bado yaa yogunu. Li den sua ke li sieni binalie mi tindigibima n tieni.
2Amosi den tua:
«O Diedo ye Siyon ki buoni.
O ye hali Jerusalemi ki kpaani.
A yankpaafuana kuodi#1.2 Bi tianba soagini ki yedi: «Li paboanli ye a yankpaafuana nni.»,
Karimeli juali yuli po kuodi.» #Jl 4.16.
Siiri yaaba
3O Diedo den yedi mi naa maama:
«Damasi yaaba tieni tuongundataa,
Li pundi ba bonanaa,
Ya n teni ke n kan lebidi min jagi yaala.
Bi den ŋmaa ki midi Galaadi diema yaaba
Leni yaa teliti yaa taana n pia ti kudi ke ti sondi. #Esa 17.1-3; Jer 49.23-27; Sak 9.1.
4N baa soani u mu
Wun buoni o bado Asayeli puoliŋuani.
U baa je o bado Beni-Adadi diegu.
5N baa mudi Damasi sendabila
Ya n luondi u dogu buliñoabu.
N baa bolini Bekati Afeni yaaba,
Ki bolini yaa bado n kaa Beti-Edeni.
Siiri niba mo baa gedi ti yonbidi Kili dogu po.
O Diedo n yedi yeni.»
Filisiti yaaba
6O Diedo yedi mi naa maama:
«Gasa yaaba tieni tuongundataa,
Li pundi ba bonanaa,
Ya n teni ke n kan lebidi min jagi yaala.
Bi cuo nibuomunu kuli ki teni Edomi diema. #Esa 14.29-31; Jer 47.1-7; Esk 25.15-17; Jl 4.4-8; Sof 2.4-7; Sak 9.5-7.
7N baa soani u mu Gasa dogu bilini nni,
U baa je likani dieŋama.
8N baa bolini Asidodi dogu yaaba,
Asikalon dogu yeni mo, n baa bolini likani bado,
Ki pegidi ki baa Ekiron dogu,
Ki bolini Filisiti yaaba, yaaba n sieni.
Li Miali Diedo U Tienu n yedi yeni.»
Tiiri leni Fenisi yaaba
9O Diedo yedi mi naa maama:
«Tiiri yaaba tieni tuongundataa,
Li pundi ba bonanaa,
Ya n teni ke n kan lebidi min jagi yaala.
Bi cuo nibuomunu kuli ki teni Edomi yaaba,
Ki naa tiadi Tiiri yaaba n den loli yaa ŋantaado
Leni bi kpiiba Isidayeli yaaba. #Esa 23.1-18; Esk 26.1—28.19; Jl 4.4-8; Sak 9.1-4; Mat 11.21-22; Luk 10.13-14.
10N baa soani u mu Tiiri dogu bilini nni,
Wun je likani dieŋama.»
Edomi yaaba
11O Diedo yedi mi naa maama:
«Edomi yaaba tieni tuongundataa,
Li pundi ba bonanaa,
Ya n teni ke n kan lebidi min jagi yaala.
Bi den ŋoadi ki deli bi kpiiba leni ki jugisiega,
Kaa gbadi bi po ninñimiba kuli.
Bi pala yaa fii, ŋaa pia ke a jiidi,
Baa pia sugili. #Esa 34.5-17; 63.1-6; Jer 49.7-22; Esk 25.12-14; 35.1-15; Abd 1.1-14; Mal 1.2-5.
12Lani yaa po, n baa soani u mu bi dogu Tema nni,
Wun je Botisira dogu dieŋama.»
Anmoni yaaba
13O Diedo yedi mi naa maama:
«Anmoni yaaba tieni tuongundataa,
Li pundi ba bonanaa,
Ya n teni ke n kan lebidi min jagi yaala.
Bi den lidi a puotugupunba Galaadi diema nni,
Kelima bi bua ki diadi bi diema. #Jer 49.1-6; Esk 21.33-37; 25.1-7; Sof 2.8-11.
14Lani yaa po, n baa soani u mu Raba dogu bilini nni,
Wun je likani dieŋama mi janjanma daali,
Bu toabu kuudi siiga,
Li baa yaa tie nani ku tafaabiadigu siiga yeni.
15Bi bado mo baa gedi ti yonbidi,
Wani leni o koanbala.
O Diedo n yedi yeni.»
Currently Selected:
Amosi 1: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
