2 Tesaloniki 1
1
Mi macilikaama leni ti pagidi
1
I fuondi
1Mini Poli, Silasi#1.1 Diidi 2 Korenti 1.19 kani yaa maama n ye tiipo. leni Timote n diani li tili Kilisiti Nitaanli yaali n ye Tesaloniki, ki ye U Tienu ti Baa leni o Diedo Jesu Kilisiti nni. #JTT 17.1. 2U Tienu yua n tie Baa leni o Diedo Jesu Kilisiti, n pa yi li ŋanbili leni mi yanduanma.
Tesaloniki yaaba moandili
3Ti kpiiba, li pundi tin yaa tuondi U Tienu, kelima yi po yogunu kuli. Li dagidi tin yaa tiendi yeni, kelima yi dandanli yabidi ki pugidi boncianla, yi buama yiyaba po mo yabidi ki pugidi. 4Ba yin laadi yaa fala leni yaa yebiadima kuli, ti kpiagidi ti yula U Tienu Nitaana nni, kelima yi juunli leni yi dandanli po.
5Likuli tie siedi ke U Tienu buudi tiegi. O sua ke yi dagidi U Tienu diema po, yin laadi fala moala yaama yaa po. 6U Tienu nua ke li tiegi ke wan faligi yaaba n faligidi yi moala. 7O baa taani ki pa tinba leni yinba yaaba n laadi fala mi fuodima, o Diedo Jesu yaa ñani tanpoli po leni o malekinba yaaba n pia u paalu, ki doagidi o yuli yaa daali. 8O baa doagidi u mupienu nni, ki pa yaaba n kaa bani U Tienu leni yaaba n kaa tuo ki ŋoadi ti Diedo Jesu yaa Laabaaliŋamo, bi biadima panpaani. 9Bi buudi baa yaa tie yaa bolinma n ki pia gbenma. Bi baa paadi cain leni o Diedo nunga leni o kpiagidi paalu, #Esa 2.10. 10wan cua yaa daali ki baa baa ti kpiagidi o nigagidiŋanba siiga, ke yaaba n daani o kuli mo n ñuadi o ŋamu. Yimoko baa ye bi siiga, kelima yi den daani ti siedo.
11Li tie lani yaa po ke ti miadi U Tienu yi po yogunu kuli, ke wan teni yin dagidi wan yini yi yaala yaa po. Ti go miadi o ke wan teni yin yaa tiendi wan jagi yin tieni yaa ŋanma kuli leni li dandanli tuonli, kelima o paalu po. 12Yeni ti Diedo Jesu yeli baa baa ti kpiagidi yi siiga, ke yimo n baa ti kpiagidi kelima o po, nani ti Tienu leni ti Diedo Jesu Kilisiti ŋanbili n tie maama.
Currently Selected:
2 Tesaloniki 1: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.