1 Timote 1
1
I tundi li nitaanli leni li gobidikaaba po
1—3
I fuondi
1Mini Poli, yua n tie Jesu Kilisiti tondo, kelima U Tienu ti Candaano yaa ñoamabonli po leni Jesu Kilisiti yua n tie ti suginma yaa po. 2N diani a po li tili, fini Timote, yua n tie n bimoanga li dandanli nni. U Tienu yua n tie Baa leni ti Diedo Jesu Kilisiti yaa ŋanbili, o ninñingbadima leni o yanduanma n yaa ye leni a. #JTT 16.1.
Poli waani Timote n fangi o yuli leni mi bangifaama
3N bua ki tiadi a min den puogi a yaala, min den baa fii ki gedi Maseduani diema yaa yogunu. N den mia ŋa, ŋan yaa ye Efesi ki tundi bi nitianba, ke ban da bangi bangitoama. 4Ŋan go yie bi po ke ban da pa bi yula i telimi togida leni bi yaajanba togida, ya n ki pia gbenma po, kelima laa bonla kuli fiindi mi niama, ki naa todi ke U Tienu tuonli suagi liiga li dandanli nni. 5Laa tundi n baa cuani yaala tie mi buama, yaama n ña li papienli, yaa pali siedi n ŋani leni li dandanmoanli nni. 6Bi nitianba lebidi ki ŋaa laa bonla, ki yaadi ki ŋua mi mafanma. 7Bi bua ki yaa tie li bali maama bangikacianba, ama baa bani ban maadi yaala leni ban bangi yaala leni li papaali yeni n bua ki yedi yaala.
8Ti bani ke U Tienu bali maama ŋani, li yaa tie ke o nilo ŋua ma nani lan bili maama. 9Ti go bani ke baa bili li bali maama yeni o niteginka po ka. Ama bi bili ma bi nibiadiba leni yaaba n yie li bali maama, U Tienu yiekaaba, ti tuonbiadi danba, yaaba n kaa ŋua U Tienu sanu, kaa fangi o mo, yaaba n kpaani bi baanba leni bi naanba, nikpalo kuli, 10mi conconma danba, yaa jaba n taagi leni biyaba, yaaba n kuadi bi niba, bi tuofaadanba, yaaba n tiendi mi siedifaama leni yaala n nia leni mi bangiŋanma po kuli. 11Laa bangiŋanma ŋua o Laabaaliŋamo, U Tienu yua n pundi ki yaa baadi ti kpiagidi ki go pia mi yemanmoanma n piani nni yua.
Poli tuondi U Tienu o ninñingbadima po
12N tuondi ti Diedo Jesu Kilisiti yua n puni nni u paalu, ki sua ke n tie nidugika ke o kuani nni o tuonli nni, 13mini yua n den kpa sugidi o, ki wangi o fala, ki tiendi o yaala n bia. O den gbadi n po mi ninñima, kelima n den tiendi yeni n yanpiima leni n dandanluoma po. #JTT 8.3; 9.4-5. 14Ti Diedo den ŋanbi n po hali ke li kandi, ki puni nni yaa dandanli leni yaa buama n ñani Jesu Kilisiti kani. 15Yaa maama n tie ne tie mi madugikaama, ki pundi bi niba n gaa ma cain, ke Jesu Kilisiti den cua ŋanduna nni ki baa tindi ti tuonbiadi danba. Bi siiga nni mini n cie. 16Ama o den gbadi n po mi ninñima line yaa po: Jesu Kilisiti cili ki doagidi o juunli mini yaa kani, ke min tua li bontogidikaala yaaba n baa daani o ki baa yaa miali n kan gbeni kuli yaa po. 17U Tienu, yua n tie o Badiciamo hali yaa yogunu kuli kaa pia kuuma, tin ki nua yua, wani yua bebe n tie U Tienu, n yaa baadi ti jigidi leni ti kpiagidi yaa yogu n tuu yaa yogu. Amina!
18N biga Timote, n teni a yaa ñoamabonli n tie ne, nani ban den kpa pua a po yaa saawali ki yedi maama: Ŋan yaa koani li dandanli koanŋanli. 19Ŋan yaa kubi li dandanli leni yaa pali siedi n ŋani. Bi nitianba den ŋaa laa bonla ke bi dandanli bodi. 20Imene leni Alekisandri tie laa niba siiga yaaba. N den teni ba Sutaani, ke lan bangi ba ban da go sugidi U Tienu.
Currently Selected:
1 Timote 1: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
