1 Tesaloniki 4
4
Tin baa yaa ye maama ki mangidi U Tienu pali
1Ti kpiiba, ti majuodikaama tie mine. Ti den bangi yi yi tagi n baa yaa tie maama ki yaa mani U Tienu po. Moamoani yi tiendi yeni. Moala ti mia yi ki go tigini yi kelima o Diedo Jesu po, ke yin go yaa tiendi yeni ki pugidi. 2Yi bani tin den gaa yaa ñoamabona o Diedo Jesu kani ki teni yi. 3U Tienu n bua yaala lani n tie yi gagidiŋanma, ke yin kubi yi yula ki da tieni conconbuoluba kuli. 4O go bua ke yi siiga yuakuli n kubi o gbanandi mi gagidiŋanma nni leni yaa yema n dagidi nni, #4.4 Li go baa fidi ki yedi ke yuakuli n yaa ye leni o pua yaa yema n dagidi U Tienu po. 5ki da tuo o gbanandi bonbuakaala n diedi o nani bi nilanba yaaba n kaa bani U Tienu n tiendi maama. 6Oba kuli n da boandi o kpiilo laa bonla nni, ki janbi o. Ti den tuodi ki waani yi ki go kadi ki waani yi, ke o Diedo baa tuu laa biadima buolu kuli panpaani. 7U Tienu ki den yini ti ke tin yaa ye mi conconma nni ka, ama mi gagidiŋanma nni. 8Lani yaa po, yua n yie laa tundi kuli, waa yie nisaalo ka, o yie U Tienu yua n puni yi o Fuoma Yua yo.
9Laa go tie tiladi min diani yi po ki waani yi, ke yin yaa bua yi kpiiba, kelima U Tienu wani o ba n bangi yi, ke yin yaa bua yiyaba. 10Yi tiendi yene mo yo, yi kpiiba yaaba n ye Maseduani kuli po. Ti mia ki go tundi yi, ke yin yaa tiendi yeni ki pugidi. 11Yin moandi mani ki yaa mani leni yiyaba, ki go yaa kubi yi ŋantaadiceli, ki yaa tuuni li tuonli ki baadi yaala n dagidi yi yema po mo, nani tin den kpa bangi yi maama yeni. 12Yin yaa tiendi yeni ke yaaba n kaa daani n yaa nua yi, ke yi tie nimoanba ki jigindi yi, ke yin da dugi nitoa todima po.
Li dandanli leni Kilisiti guacuama
4.13—5.28
O Diedo guacuama
13Ti kpiiba, tii bua lan yaa boani yi yaaba n kpe yaa maama po, ke yin da ye leni li paboanli bi po, nani yaaba n ki pia suginmiba yeni. 14Li yaa tie ke ti daani ke Jesu den kpe ki go fii bi tinkpiba siiga, ti go daani ke U Tienu baa fiini yaaba n daani o ki kpe kuli, kelima Jesu po. O baa teni ban taani leni o.
15Ti kadi ki waani yi o Diedo n den yedi ti yaala: Lani n tie ke tinba yaaba n ye ki fo hali o Diedo guacuama, ti kan gaa yaaba n den kpe liiga. #1Kor 15.51-52. 16Mi maalima yaa tieni, ke malekinba yudaano kpaani, ke U Tienu kakaci piebi, lanyogunu o Diedo wani o ba baa ña hali tanpoli po, ki jiidi. Yaaba n den kpe leni li dandanli Kilisiti po, baa kpa fii bi tinkpiba siiga. 17Lani, tinba yaaba n sieni ki fo baa taani leni ba, ki yugi a tawala nni ki tuogi o Diedo mi fawaama nni. Lani, ti baa yaa ye leni o Diedo hali yaa yogunu kuli. 18Lanwani, yin yaa baagidi mani yiyaba pala leni laa maama.
Currently Selected:
1 Tesaloniki 4: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
