1 Jan 3
3
U Tienu bila leni Sutaani yaa bila
3.1—4.6
U Tienu bila
1Diidi mani ki le U Tienu ti Baa n pia ti po yaa buacianma hali ki yini ti o bila. Ti tie yeni. Yaala n teni ke ŋanduna yaaba ki bani ti tie ke baa bani wani. #Jan 1.12. 2N buakaaba, moala ti tie U Tienu bila. Tin baa tua yaala daa doagidi, ama ti bani ke o yaa doagidi yaa yogunu, ti baa yaa tie nani wani n tie maama, kelima ti baa le o nani wan tie maama. 3Yua n pia laa dugidi kuli baa yaa ŋanbidi o yuli, nani wani o Diedo n ŋani maama yeni.
4Yua n tieni ti tuonbiadi kuli miidi U Tienu bali maama. Ti tuonbiadi tie li bali maama yaa miidima. 5Yi bani ke wani o Diedo n den doagidi ki baa ñani ti yaa tuonbiadi. Tuonbiadiba kuli ki ye o niinni baa waamu. #Jan 1.29. 6Yua n ye o niinni kuli kan yaa tiendi tuonbiadi. Yua n tiendi ti tuonbiadi kuli daa laa o, waa bani o mo.
7N bibuadimu, yin da tuo mani ke oba kuli n boandi yi. Yua n tiendi yaala n tiegi, o tiegi nani Kilisiti n tiegi maama. 8Yua n tiendi ti tuonbiadi tie Sutaani yua, kelima wani Sutaani den tiendi ti tuonbiadi hali mi cilima ki pundi hali moala. U Tienu Bijua den cua ki doagidi o yuli, ki baa bolini Sutaani tuona.
9U Tienu n mali yua kuli kaa tiendi tuonbiadi, kelima wani U Tienu miali buolu ye o niinni, o kan fidi ki yaa tiendi ti tuonbiadi kelima U Tienu mali o. 10Line n doagidi U Tienu bila leni Sutaani yaa bila n paadi leni biyaba maama: Yua n kaa tiendi yaala n tiegi kuli, bi kaa bua o kpiilo kuli, waa tie U Tienu biga.
Yin yaa bua mani yiyaba
11Diidi yin den gbadi yaa maama hali mi cilima n tie ne: Tin yaa bua mani tiyaba. #Jan 13.34. 12Tin da tie mani nani Kayini yua n den tie o Biado yua, ki den kpa o waalo. Be yaa po ke o den kodi o? O den kodi o kelima o tuona den bia, ke o waalo ya tiegi. #Cil 4.8. 13N kpiiba, ŋanduna yaaba yaa nani yi, lan da lidini yi. 14Ti bani ke ti ñani mi kuuma nni ki kua li miali nni kelima ti bua ti kpiiba. Yua n ki pia mi buama da ye mi kuuma nni. #Jan 5.24. 15Yua n nani o kpiilo kuli tie nikpalo, yi bani ke nikpaloba mo kuli ki pia yaa miali n kan gbeni o niinni.
16Line n teni ke ti bani mi buama n tie yaala: Lani n tie ke Jesu Kilisiti den puni o miali ti yaa po. Li pundi timo n yaa puuni ti miana ti kpiiba po. 17O nilo yaa pia, ki nan nua ke o kpiilo luo, ke o pia o po i nunkuomi, U Tienu buama ye o niinni lede? 18N bibuadimu, tin da pia mani mi buama tiyaba po leni mi maama bebe, ama tin yaa pia a tuona po leni i moamoani nni.
Ki yaa pia ti dugidi U Tienu nintuali
19Lani yaa po, ti baa yaa bani ke ti tie i moamoani yaaba, ki go duani ti yama U Tienu nintuali. 20Lanwani, ba ti pala yaa buni ki cuo ti, ti bani ke U Tienu cie ti pala ki go bani li bonla kuli. 21N buakaaba, ti pala yàá buni ki cuo ti, ti pia li papaali U Tienu kani. 22Tin miadi yaala kuli, ti baadi la o kani kelima ti kubi o bali maama, ki go tiendi yaala n mani o po. 23O bali maama n tie mine: Tin yaa daani o Bijua Jesu Kilisiti, ki yaa bua tiyaba nani wan bili ti po yaa bali maama n yedi maama. #Jan 13.34; 15.12,17. 24Yua n kubi li bali maama ye o U Tienu niinni, U Tienu mo ye o niinni. Lane ti bani ke o ye ti niinni kelima wan puni ti o Fuoma yaama yaa po.
Currently Selected:
1 Jan 3: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
