1 Korenti 7
7
Poli guani ba bi buali
7—15
Li ñiigili maama
1Moala n bua ki guani yi, yin den diani ki buali nni yaa maama. Li ŋani ke o joa n da taa pua. 2Ama nani mi conconma n yabi maama po yeni, li ŋani joa kuli n yaa pia o pua, pua mo kuli n yaa pia o calo. 3O joa n yaa tiendi o pua po yaala n pundi, o pua moko n yaa tiendi o calo po yeni. 4O pua ki die o gbanandi, o calo n die, o joa moko ki die o gbanandi, o pua n die. 5Yin da yie mani yiyaba po, kali yikuli yaa juogi ki tuo ki bili u yogunu waamu i jaandi po. Lani yaa pendi, yin guani ki taani leni yiyaba ke Sutaani n da tulini yi, kelima yi gbali yi gbanandi kubima. 6Min maadi yeni, laa tie ke n bili yi po yin baa yaa tiendi yaala ka, li tie sanbili yo. 7N bi bua ke nilo kuli n yaa tie nani min tie maama na. Ama nilo kuli baa U Tienu kani yaa paabu n ki taa leni o lielo. Niyendo baa yaa paabu n baa fidi ki tieni line, nitoa mo line.
8Moala n maadi yaaba n daa tieni ñiigili leni a kpepuona po. Li baa yaa ŋani bi po ban yaa ye yeni, ki tie nani min tie maama. 9Ama bi yaa kan fidi ki kubi bi gbanandi, ban tieni li ñiigili, kelima bi yaa tieni li ñiigili, li ŋani ki cie bi gbanandi n yaa fiidi, ki juugi ba nani u mu yeni.
10N bili mi naa maama yaaba n tieni li ñiigili po. Mini ka bili ma, o Diedo n bili ma. O pua n da ña o calo kani. #Mat 5.32; 19.9; Mrk 10.11-12; Luk 16.18. 11O yaa ñani o kani, wan da go kuni jatoa, wan yaa ye obebe. Lani yaa ka, wan guani ki mangi leni o calo. Joa mo n da ñani o pua.
12Moala n maadi yaaba n sieni po, mini n maadi, o Diedo ka. Ti kpiilo yendo yaa pia yaa pua n ki daani, ama ki tuo ki ye leni o, wan da ñani o. 13Yaa pua n pia o calo ke waa tuo ki daani, ama ki tuo ki baa yaa ye leni o, wan da ña o kani. 14Yaa joa n ki daani baa mi gagidiŋanma kelima o pua po. Yaa pua n ki daani mo baa mi gagidiŋanma kelima o calo po. Lani yaa ka, yi bila bi baa yaa joagini. Ama lani n tie maama yeni, bi gagidi ki ŋani. 15Die yua n ki daani yaa bua ki ña, ban cedi wan ña. O yaa ñani, ti kpiiba, lan tie joa bi pua, o faabi leni laa lolima, kelima U Tienu yini ti ke tin yaa ye leni mi yanduanme. 16Fini o pua, a bani lede ke a baa faabi a calo? Fini o joa mo, a bani lede ke a baa faabi a pua?
Yuakuli n ye nani U Tienu n yini o maama
17Lanwani, bonyenla bebe n ye, yuakuli n yaa ye nani o Diedo n puni o maama, ki ŋoadi wan den tie maama U Tienu n yini o yaa yogunu. Lani n tie min biliti yaala Kilisiti Nitaana nni, i kaani kuli po. 18O nilo yaa den kua ku koanciagu U Tienu n yini o yaa yogunu, wan da lingi ki bolini ku koanciagu maalima. Yua n ki den kua U Tienu n yini o yaa yogunu mo, wan da kua. 19O nilo yaa kua leni o yàá kua, laa tie puu, ama U Tienu mabilikaama kubima n tie likuli. 20Nilo kuli n yaa tie wan den tie maama, U Tienu n den yini o yaa yogunu. 21A yaa den tie yonbo U Tienu n yini a yaa yogunu, lan da yagi a yama. Ama a yaa baa fidi ki faabi, ŋan moandi ki faabi a yuli. 22Yua n tie yonbo o Diedo n yini o yaa yogunu, o Diedo faabi o ke o tua o yua. Yua n die o yuli mo U Tienu n yini o yaa yogunu, tua Kilisiti yonbo. 23U Tienu den daa yi yaa dunga n pa, lanwani da tua mani bi nisaaliba yonbi. 24N kpiiba, yuakuli n yaa tie U Tienu kani wan den tie maama, U Tienu n den yini o yaa yogunu.
Yaaba n ki ñiigi leni a kpepuona maama
25Yaala n tie yaaba n kaa tieni ñiigili nani yin den buali nni maama po, mii pia o Diedo mabilikaama laa maama po. Ama n baa waani yi min sua yaala, mini yua ke o Diedo teni ke n tua nidugika, kelima o ninñingbadima po. 26N sua ke li baa yaa ŋani, kelima yaa fala n kpendi po, o nilo n yaa tie wan tie maama. 27A yaa pia pua, ŋan da moandi ke a baa ñani o. A yàá pia pua, ŋan da lingi ki taa. 28Ama a yaa taa pua, ŋaa tieni tuonbiadi. O jafaano mo yaa kuni joa, waa tieni tuonbiadi. Ama yaaba n tieni li ñiigili baa yaa laadi fala o naa jamaano nni. Li tie lani yaa po ke n bua ki todi yi, yin da kua laa fala nni.
29N kpiiba, min bagi yaala tie ke yaa yogunu n sieni koabi. Lanwani, dinla liiga, yua n pia pua, n yaa ye nani waa pia yeni. 30Yaaba n buudi, n yaa ye nani baa buudi yeni. Yaaba n pia li pamancianli, n yaa ye nani baa pia yeni. Yaaba n daa bonla, n yaa ye nani baa die ban daa yaala. 31Yaaba n pia i ŋantaadi leni ŋanduna bonla, n yaa ye nani laa bonla ki tie bi po tiladi, kelima ŋanduna yua n ye moala ne caa ki baa juodi.
32N bua yin yaa ye ki da pia yanyagidi. Yua n ki pia pua kuandi o yama o Diedo ŋantaadi nni, ki lingi wan baa yaa mangidi o Diedo pali maama. 33Yua n pia pua mo kuandi o yama ŋanduna ŋantaadi nni, ki lingi wan yaa baa mangidi o pua pali maama. 34Lani n teni ke o puodaano yama boagidi kaanilie. O pua moko, yua n ki pia joa leni yua n daa bani joa, bimoko kuandi bi yama o Diedo ŋantaadi nni, ki moandi ki gagidi bi ki ŋanbi bi gbanandi leni bi yantiali nni. Yua n kuni o joa, kuandi o yama ŋanduna ŋantaadi nni, ki lingi ki baa yaa mangidi o calo pali.
35N maadi lani kuli ki bua ki todi yi. Laa tie ke n bua ki dia yi ku diagu ka. N bua yin yaa ŋua o Diedo nani lan dagidi maama, ki bua o, ki yaa taabi o leni payenli.
36O nilo yaa pia o toginaa ke o dagidi li calinkpenli#7.36 Lan maadi yua n pia o toginaa yeni, bi tianba nua ke li tie bibaa leni o bisalo yo., ke o sua ke o kan fidi ki juuni, wan tieni wan sua maama n dagidi. Ban taa biyaba. Bi yaa tieni yeni, baa tieni tuonbiadi. 37Ama yua n jagi ki bili o yama nni, ke o baa fidi ki juuni, ki kan sii o toginaa, o yaa sua ke o baa fidi ki tieni nani wan den jagi maama, o ŋanbi leni wan kan sii o toginaa. 38Lanwani, yua n taa o toginaa, o tieni yaala n ŋani. Ama yua n juuni kaa sii o toginaa, wani n tieni yaala n ŋani ki cie.
39O pua luo leni o calo, o calo n ye yaa yogunu, ama o calo yaa ti kpe, o pua yeni faabi leni yaala n bi luo o. O baa fidi ki kuni wan bua yua kuli. Die wan yaa tie Kilisiti nilo. 40Ama min sua ke yaala n baa yaa mani o po ki cie, n tie wan yaa ye o kpepuodi nni, ki da go kuni joa. N yedi yeni, kelima n tama ke nmoko pia U Tienu Fuoma.
Currently Selected:
1 Korenti 7: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
