SAKALI 8
8
1Li Miali Diedo, U Paaciamu Kuli Daano den maadi leni nni ki yedi yaa maama n tie na: 2«Li Miali Diedo, U Paaciamu Kuli Daano n bua Siyono yaaba hali boncianla. N bua ba leni n pali kuli. 3N baa lebidi ki guani Siyono, ki yaa ye Jelusalema yaaba siiga. Bi niba baa yaa yi Jelusalema dogu: “Yaa dogu yaaba n bua U Tienu, ki tuo ki ŋua o.” Bi baa yaa yi Li Miali Diedo, U Paaciamu Kuli Daano, juali mo: “Mi gagidiŋanma juali.”»
4Li Miali Diedo, U Paaciamu Kuli Daano yedi:
«Yaa jakpela leni yaa pociana n podi
Hali ki ñiigi i gbiami, kelima bi binciama po,
Go baa yaa ka Jelusalema nitaankaani nni.
5U dogu sani go baa gbie leni a bonjala leni a bonpola
Ke bi tiini ki jeli.
6Isalele yaaba, yaaba n sieni u naa yogunu
Nua ke laa bonla naani nni ke li kan tuo ki tieni.
Ama naani mini, Li Miali Diedo, U Paaciamu Kuli Daano moko
Baa nuali la ke li tie bonlidikaala?
7N baa faabi n niba yaaba n ye ti yonbidi nni
Puoli diema leni nintuali diema nni.
8N baa ñani ba lipo ke ban kpeni ki kali Jelusalema.
Bi baa yaa tie n niba,
N mo baa yaa tie bi Tienu,
N baa yaa die ba,
Ki gobidi ba leni i moamoani leni mi *teginma.»
9Li Miali Diedo, U Paaciamu Kuli Daano yedi yaa maama n tie na:
«Paagi mani yi pala,
Yinba, yaaba n gba u naa yogunu,
N sawalipuaba n den waani yaa ñoaniani,
Yaa yogunu ke bi den pu li tanpuuli,
Ki baa goa ki maa n diegu.
10Hali ke laa dana daa cua,
Bi niba leni ti yandi tuonli ki den baadi panpaani,
Nilo kan den fii ki gedi kaanu ki go guani,
Kaa baa kadi leni yibalinba,
Kelima n den teni ke bi niba koani bi ŋmiali nni.
11Ama moala, n kan go soani n niba yaaba n ciadi yeni laa bonla,
Nani min den tiendi ba maama hali yogu.
Mini, Li Miali Diedo, U Paaciamu Kuli Daano n yedi yeni.
12N baa teni mi yanduanma n tieni ki tinga po:
Duven tiidi baa luoni,
Ki tinga baa teni ti kpaandi n tieni,
Ki taaga baa mi boncianla.
N baa pa laa bonla kuli n niba yaaba n sieni.
13Juda yaaba leni Isalele yaaba,
Yaala n den baa yi den tua
Ti solindi makpanjama i nilanbuoli siiga.
Ama, n baa faabi yi ki teni yin tua li seli makpanjama bi siiga.
Yin da go jie mani, paagi mani yi pala!»
14Li Miali Diedo, U Paaciamu Kuli Daano yedi yaa maama n tie na:
«Yi yaajanba n den fiini n pali
Ke n jagi ke n baa waani ba fala
Mii den lebidi n yanjagili.
15Ama moala, n jagi ke n baa tieni yinba Jelusalema yaaba
Leni mi diema yaaba kuli po yaala n ŋani.
Yin da go jie mani!
16Yin baa yaa tiendi yaala tie line:
Yua kuli n yaa maadi o nisaalilielo i moamoani.
Yi bujiakaani kani, yin yaa ja yaa buudi n tiegi
Ki kpendinni mi yanduanma.#Efe 4.25
17Yin da kpaagi yi yaba po yaala n bia.
Yin da pua mi faama ki polini,
Kelima laa tuona kuli tie mini Li Miali Diedo n nani yaala.»
Mi ñoalolima dana baa kpandi ki tua jaanma dana
18Li Miali Diedo, U Paaciamu Kuli Daano den waani nni yaa maama n tie na: 19«Cinaa leni cimuu leni cilele leni cipiiga ŋmaali yi yaa niinni ke yi luo bu ñoabu yeni baa tua yinba Juda yaaba jaancianma, yaama n pia yipo li pamancianli. Ama yin yaa bua mani i moamoani leni mi yanduanma.»
20Li Miali Diedo, U Paaciamu Kuli Daano yedi:
«I nilanbuoli, i dogi boncianla niba baa tigibi Jelusalema.
21Dogu niba baa cua ki yedi dotogu yaa niba:
‹Ti caa ki baan kpiagi Li Miali Diedo,
U Paaciamu Kuli Daano,
Ki mia o sela yo.
Cua mani tin gedi!›
Laa niba baa goa ki yedi ba:
‹Ti moko baa yegi leni yi.›
22I nilanbuoli boncianla leni yaa nilanbuoli n pia u paalu
Baa cua Jelusalema ki bua ki kpiagi nni,
Ki go jaandi ki mia n sela.
23Laa yogunu, nilanba piiga, yaaba n ki taa mabuolu
Baa taani ki muubi Jufiyendo liadili ki yedi o:
‹Ti bua ki yegi leni a ki gedi,
Kelima ti gbadi ke U Tienu ye leni yi.› »
ISALELE LENI NIBUOTOE
U Tienu baa bu yaa dogi niba n kuu leni Isalele
Currently Selected:
SAKALI 8: GUX03
Highlight
Share
Compare
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
