MATIYU 9
9
1Jesu den kua ku ñinbiagu nni ki duodi mi ñincianma ki guani o dogu po.#9.1 Laa dogu n den tie Kapenayuma. Diidi 4.13. 2Lanyogunu bi den cuani o kani yua yaa gbanandi n kpe ke o dua ku kaagu po. Jesu n den laa bi *dandanli, o den yedi yua yaa gbanandi n kpe: «Paagi a pali, n bijua, a baa a *tuonbiadi sugili.» 3Lane li *bali maama bangikaaba bi tianba den maliti bi yama nni ki tua: «O naa ja sugidi U Tienu.» 4Jesu den bani ban maliti yaala, ki yedi: «Be n teni ke yi maliti yaala n bia yi yama nni yeni? 5Be n dingi ki cie ki yedi: ‹A baa a tuonbiadi sugili› bi ki yedi: ‹Fii ki yaa cuone?› 6N bua yin bandi ke o *Ja Bijua pia li bali ŋanduna nni ki baa fidi ki pa bi niba bi tuonbiadi sugili.» Lane o den yedi yua yaa gbanandi n kpe yeni: «Fii ki taa a kaagu ki yaa kuni.» 7O ja yeni den fii ki ñani ki ban kuni. 8Ku niligu n den laa lani, ti jawaandi den cuo ba, ke bi kpiagi U Tienu leni wan puni bi nisaaliba laa paalu buolu.
Jesu yini Matiyu
(Mak 2.13-17; Luk 5.27-32)
9Jesu n den fii lankani ki suagi liiga, o den laa ban yi yua Matiyu ke o ka o tuonli kani ki gaani li lubili. O den yedi o: «Ŋoadi nni.» Matiyu den fii ki ŋoadi o.
10Jesu n den ka Matiyu dieli nni u saajekaanu kani, bi lubigaaba leni i tagibiadi danba kuli den cua boncianla, ki ka ki di leni o leni o ŋoadikaaba.#Luk 15.1-2 11*Falisieninba n den laa lani, bi den yedi o ŋoadikaaba: «Be yaa po ke yi canbaa di leni bi lubigaaba leni i tagibiadi danba?» 12Jesu den gbadi ki yedi ba: «Yaaba n pia laafia ka bua lotoli, ama a yiama. 13Gedi mani ki ban bandi yaa maama n tie na bundima: ‹Mi niñingbadima n mani npo, laa tie a pada ka.› Mii cua ki baa yini yaaba n tiegi ka, ama ti tuonbiadi danba.»#Mat 12.7; Ose 6.6
Mi ñoalolima maama leni kpanjatoama
(Mak 2.18-22; Luk 5.33-39)
14Jan ŋoadikaaba den cua Jesu kani ki yedi o: «Be yaa po ke tinba leni Falisieninba yen luo bu ñoabu ke a yaa ŋoadikaaba wani naa luo?» 15Jesu den goa ki yedi ba: «O pocaancalo danlinba baa ga lede ki biidi bi pala wan da ye leni ba li pocaali nni yaa yogunu? Ama a dana kpendi ke bi baa cuo o pocaancalo ki ñani o bi siiga, bi baa loli bu ñoabu laa yogunu.»
16O go den yedi: «Niloba kan taa cabipanli ki biini li liadikpeli, kelima li cabipanli baa dadi li bonkpeli lan padi ki pugini. 17Bi kan didi taa o duvenpaano ki piagi ti dayuakpedi nni, kelima o yaa pudi yaa yogunu, ti dayuakpedi baa padi, duven n wuli, ti dayuadi mo n bodi. Ama bi yen piagi o duvenpaano ti dayuapandi nni, ke duven leni ti dayuadi kuli n yaa ye.»
Jesu pia u paalu ki cie u yianu leni mi kuuma
(Mak 5.21-43; Luk 8.40-56)
18Jesu n den maadi leni ba yeni, bi yudanba siiga nni yendo den cua ki gbaani o nintuali ki yedi: «N bisalo kpe moala moala na, ama ŋan cua ki ban maani opo a nii, o baa faadi.» 19Jesu den fii ki ciani o, wani leni o ŋoadikaaba.
20Lanyogunu yaa pua yaa soama n den wuliti#9.20 soama n den wuliti: Li tie ke o laadi o ŋmaalo u yogunu kuli. hali piiga n bina lie den cua ki nagini o puoli po ki sii o liadicuadi, 21kelima o den tua o yama nni: «N yaa li baa ki sii o liadili bebe, n baa paagi.» 22Jesu den jigidi ki laa o ki yedi: «Paagi a pali, n bisalo, a dandanli paagi a.» Lanyogunu o pua yeni den paagi cain.
23Jesu den pundi ki kua o yudaano yeni deni. Wan den sua ke ti baantiadi cua ki biga kuuma po ki piebi mu yelimu ke bi niba mo tiendi ku fuugu, o den yedi: 24«Ña mani, kelima ki bonpuoga naa kpe ka, o goa yo.» Bi den ñuadi o. 25Wan den ñani bi niba kuli, o den kua ki biga n dua naani, ki cuo o nuu ke o fii. 26O laabaalo den yadi laa diema nni kuli.
Jesu noadi juama lie
27Jesu n den fii lankani ki suagi liiga, juama lie den ŋua o ki tangi: «Dafidi Bijua, gbadi tipo mi niñima.» 28Jesu n den kua li dieli nni, a juama yeni den cua o kani. Jesu den buali ba: «Yi daani ke n baa fidi ki tieni yipo yin miadi yaala?» Bi den goa ki yedi o: «Mm, ti Daano.» 29Lane o den sii bi nuni ki yedi: «Lan tieni yipo nani yin daani maama.» 30Lani bi nuni di den nua. Jesu den teni ba li ñoabonli ki yedi: «Fangi mani yi yula ke oba n da bandi.» 31Ama bi den ñani ki kpaani o yeli laa diema nni kuli.
Jesu deli ki ñani o muulo po ki cicibiadiga
32Laa jaliediba n den fii ki caa, bi niba go den cuani Jesu kani cicibiadiga daano ke o tie muulo. 33Jesu n den deli ki ñani ki cicibiadiga yaa yogunu, o muulo yeni den yaadi ki maadi. Li den paki yaa niba n taani likani ke bi tua: «Ti daa bi laa li naa bonla Isalele diema nni.» 34Ama Falisieninba wani den tua: «Mu cicibiadimu bado n puni o u paalu ke o deli ki ñandi mu cicibiadimu bi niba niinni.»#Mat 10.25; 12.24; Mak 3.22; Luk 11.15
Mi niñima cuo Jesu ku niligu po
35Jesu den gaandi i dociami leni i dowaali nni kuli, ki bangi U Tienu maama li balimaama bangima diena nni, ki wangi *U Tienu diema Laabaaliŋamo, ki paagidi bi niba bi yianbuoli leni bi tadinbuoli kuli po.#Mat 4.23; Mak 1.39; Luk 4.44 36Wan den diidi ku niligu, mi niñima den cuo o bipo kelima bi den coagi, bi yama mo den yagi nani yaa pe n kaa pia yankpaalo yeni.#Coa 27.17; 1Bad 22.17; 2Baj 18.16; Esk 34.5; Mak 6.34 37Lani yaa po o den yedi o ŋoadikaaba: «U jetaagu yaba, ke bi tuonsoanba mo nan wa.#Luk 10.2 38Lanwani yin mia mani u jetaagu Diedo wan soani bi tuonsoanba o jetaagu po.»
Bi piiga n tondiliediba
(Mak 3.13-19; Luk 6.12-16)
Currently Selected:
MATIYU 9: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
