EBILUNBA 1
1
U Tienu juodi ki maadi o Bijua ñoabu nni
1Hali yogu U Tienu den maadi leni ti yaajanba bi sawalipuaba ñoana nni yogini boncianla leni mabuoli boncianla. 2Ama moala, mi juodima dana nni, o maadi leni tinba o Bijua yaa ñoabu nni. O den bili ke wane n diedi li bonla kuli, o yaa niinne ke o go tagi li ŋandunli kuli. 3Wani Bijua yeni n yadi U Tienu kpiagidi yendima. U Tienu n tie maama, o Bijua moko tie yeni cain. O go kubi mi tagima kuli ke mi ye kelima o maama paaciamu po. Wan den soani ti *tuonbiadi ŋuudi-ñanma tuonli ki dudi, o den kali hali tanpojoma, U Tienu yua n pia ti kpiagidi jienu po.
U Tienu Bijua n cie malekinba maama
4Bijua den tua yua n pia ti kpiagidi ki cie malekinba nani wan baa yaa yeli n pia ti kpiagidi ki cie bi yaa yela maama. 5Kelima u laa yogunu ke U Tienu maadi leni o malekinba siiga baa yendo ki yedi o:
«A tie n Bijua,
Mini n mali a dinla.»
U laa yogunu ke o maadi malekoba maama ki yedi:
«N baa tie a Baa,
A mo baa tie n bijua.»#Pis 2.7; 2Sam 7.14; 1Baj 17.13
6Ama U Tienu n soani o Bijakpiaga ŋanduna nni yaa yogunu o go yedi:
«O malekinba kuli n kpiagi o.»#Tia 32.43
7Wan maadi malekinba po, o yedi:
«O teni ke o malekinba
Tua nani u faalu yeni,
Ki go teni ke o naacenba tua mupienu.»#Pis 104.4
8Ama wan maadi o Bijua yaa maama o yedi:
«Fini U Tienu, a bali kalikaanu
Baa ye hali yaa yogunu kuli,
A badigbiamu mo tie mi *teginma gbiamu.#Pis 45.7-8
9A bua mi teginma,
Ki nani mi biadima.
Li tie lani yaa po, fini U Tienu, ke a Tienu gandi a
Ki wuli a yuli po li pamanli kpama,
Ki teni ke a pia ti jigidi ki cie a lieba.»
10O go yedi:
«Fini o Diedo, hali mi cilima,
A den pu ki tinga tanpuuli.
Tanpoli mo tie a yaa tagime.#Pis 102.26-28
11Lani kuli baa bodi,
Ama fini wani, a baa ye,
Likuli baa kpeligi
Ki cadi nani li liadili yeni.
12A baa kokoli la nani bu kpalibu yeni,
Likuli baa lebidi nani o nilo
N lebidi o liadili maama.
Ama fini, a tie yenma yogunu kuli,
A bina mo ki pia gbenma hali abada.»
13U laa yogunu ke U Tienu go maadi leni o malekinba kuli siiga baa yendo ki yedi:
«Kali n jienu po,
Hali min guli a yibalinba ŋan ŋmaa ba?»#Pis 110.1
14Malekinba yeni kuli ki tie fuoma yaaba, yaaba n tuuni wani U Tienu po, wan tuuni yaaba ke bi todi mi *tindima yaa faajieba kaa?
U Tienu n ŋanbi yaa tindicianma
Currently Selected:
EBILUNBA 1: GUX03
Highlight
Copy
Compare
Share
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
