JESU TONDIBA TUONA 8
8
1Landaali bi niba den cili ki wangi Kilisiti n yini yaaba, yaaba n ye Jelusalema o falabiado. Jesu tondiba yaaka, yaaba n sieni kuli den yayadi Jude diema nni leni Samali diema nni. 2Yaa niba n fangi U Tienu den piini Etiena ki mua opo i kumoe boncianla. 3Solo den moandi ki baa bolini Kilisiti n yini yaaba. O den kua ti diedi nni ki co bi jaba leni bi puoba kuli, ki kuandi ba li kpaadidieli nni.#JTT 22.4-5; 26.9-11
Filipi wangi o Laabaaliŋamo Samali nni
4Yaaba n den yayadi yeni, den caa i kaani boncianla ki wangi U Tienu Laabaaliŋamo. 5Filipi den jiidi ki gedi yaa dogu n ye Samali diema nni ki wangi laa niba *U Tienu n Gandi Yua maama fuuli. 6A nigola n den gbadi Filipi n yedi yaala ki laa wan tiendi yaa bancianma, bi den cengi o yedima bonŋanla. 7Mu cicibiadimu den tangi ki ña ban ye yaaba yaa niinni. Yaaba yaa gbanandi n faani leni a waba boncianla moko den paagi. 8Li pamanli den tieni boncianla laa dogu nni.
9Li den sua ke o nilo ye u dogu yeni niinni ke li waagi, ki yi Simono. O den tiendi ti buligbandi ke li paki Samali yaaba, ki jigini o yuli ke o tie niciamo. 10Bi niba kuli, a bila leni a nikpela, den ga o maama bonŋanla ki tua: «Une n tie U Tienu paalu, ban yi yu u paaciamu.» 11Bi den cengi o maama kelima wan den tiendi yaa buligbandi den paki ba hali ke li waagi. 12Ama Filipi n den wangi ba *U Tienu diema Laabaaliŋamo leni Jesu Kilisiti yeli, bi den daani o maama ke o *batisi ba, bani bi jaba leni bi puoba kuli. 13Simono wani oba den daani ke bi den batisi o. O den taabi Filipi ki nua wan tiendi yaa sinankeeninba leni yaa bancianma ke li paki o.
14Jesu tondiba yaaba n sieni Jelusalema n den gbadi ke Samali yaaba ga U Tienu maama, bi den soani bikani Pieli leni Jan. 15Ban den pundi likani, bi den jaandi yaaba n daani po ke ban baa U Tienu Fuoma Yua. 16U Tienu Fuoma Yua daa den jiidi bi siiga oba kuli po. Bi da den batisi ba o Diedo Jesu yeli nni bebe. 17Lane Pieli leni Jan den maani bipo bi nii ke bi baa U Tienu Fuoma Yua.
18Simono n den laa ke bi baa U Tienu Fuoma Yua kelima bi tondiba maani bipo bi nii, o den cuani bipo i ligi ki yedi: 19«Pa mani mini moko laa paalu, ke min maani n nii yua yaa po, wan baa U Tienu Fuoma Yua.»
20Pieli den yedi o: «Fini leni a ligi kuli n bodi, kelima a tama ke a baa pa i lige ki baa U Tienu paabu. 21Ŋaa pia biinu leni ŋantaadoba kuli li naa tuonli nni, kelima a pali naa tiegi U Tienu nintuali. 22Lani yaa po ŋan biidi a pali a yanjagibiadili po ki ŋa li ki mia o Diedo li yaa baa tuo wan pa ŋa sugili ŋan pia yaa yanmaalima po. 23Kelima n nua ke li nunponbiadili gbie a niinni, ti *tuonbiadi go loli a mo.» 24Simono den goa ki yedi: «Mia npo mani o Diedo, ke yin yedi yaala kuli n da cua n kani.»
25Pieli leni Jan n den tieni siedi o Diedo po ki go waani o maama likani, bi den fii ki goa Jelusalema, ki wangi Samali dogi boncianla nni o Laabaaliŋamo.
Filipi leni Etiopi diema koanbali
26O Diedo maleki den maadi leni Filipi ki yedi o: «Fii ki gedi ganu po, ki pundi yaa sanu n ñani Jelusalema ki caa Gasa dogu po, ki ŋoadi yaa sanu n poandi mi fanpienma nni yeni.» 27Filipi den fii ki gedi.
Li den sua ke Etiopi diema nilo, yua n tie *moagiliga, Kandasi Etiopi pobado koanbali, yua n den tie o ligi kubido, den gedi Jelusalema ki baan kpiagi U Tienu. 28Wan den lebidi ki baa guani o denpo, o den ka i taami teligu#8.28 Laa yogunu po, yaaba n den pia li bali leni ti jigidi den kua i taami yaa teliti nni ki caa ban bua ki gedi naani. nni ki cogi o sawalipualo *Esayi tili. 29U Tienu Fuoma den yedi Filipi: «Gedi ki nagini yaa taami teligu n tie na ki yegi leni gu.» 30Filipi den sani ki nagini gu ki gbadi ke Etiopi yua cogi o sawalipualo Esayi tili nni. O den buali o: «A ga ŋan cogi yaala n bua ki yedi yaala bi?» 31O den goa ki yedi o: «N baa ga lede ki bandi, nitoa yaa bundi npo?» Lani o den mia Filipi wan do ki kali leni o i taami teligu nni ban yegi.
32Wan den cogi i Diani nni naankani den maadi yaa maama n tie na:
«Bi den dia o nani o pia yeni ki caani o u yankodikaanu po.
Nani ki pebiga n ŋmini yua n moagidi#8.32 moagidi: Bi tianba baa yedi lebi. o kobidi kani maama.
Waa den yaadi o ñoabu.#Esa 53.7-8
33Bi den miidi o, ki jia opo yaa buudi n ki tiegi.
Ŋme baa fidi ki togidi o buolu maama?
Kelima bi ñani o miali ŋanduna nni.»
34Ki moagiliga den yedi Filipi: «N bua ŋan waani nni, o sawalipualo maadi ŋme yaa maame? O maadi o yuli maama bi, bi nitoa yaama yo?» 35Filipi den cili leni laa dianu ki waani o Jesu Laabaaliŋamo.
36Ban den ŋua bi sanu ki suagi liiga, bi den pundi mi ñima kani. Ki moagiliga den yedi: «Diidi mi ñima nna. Be n yie npo ke min da batisi?» [ 37Filipi den goa ki yedi o: «A yaa daani leni a pali kuli, li baa fidi.» Ki moagiliga den goa ki yedi: «N daani ke Jesu Kilisiti tie U Tienu Bijua.»] 38O den waani yua n gobidi i taami teligu wan sieni gu. Filipi leni ki moagiliga den jiidi ki kua mi ñima nni ke Filipi batisi o. 39Ban den ñani mi ñima nni, o Diedo Fuoma den taa Filipi ke ki moagiliga ki go laa o. Ki moagiliga den suagi liiga leni o sancenli ke o pali mani. 40Filipi den sua ke o ye Asota dogu nni. O den ñani Asota ki caa Sesale, ki wangi o Laabaaliŋamo wan tagini yaa dogi kuli hali ki ban pundi.
Solo n daani Jesu maama
(JTT 22.3-16; 26.9-20)
Currently Selected:
JESU TONDIBA TUONA 8: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
