JESU TONDIBA TUONA 26
26
1Agilipa den yedi Polo: «Li tuo ŋan maadi ki ga a yuli.» Polo den yugidi o nuu ki maadi ki baa ga o yuli ki yedi: 2«O bado Agilipa, n pali mani ke n baa fidi ki maadi a nintuali dinla ki ga n yuli, ki nan doagidi ke Jufinba n kuliti nni yaala yaa po yeni naa tie moamoani. 3Lani mo, kelima fini aba bani Jufinba bogida cain leni ban nia yaala yaa po. Lanwani n mia ŋa ŋan juuni ki cengi n maama.
4Jufinba kuli bani n yema n den tie maama hali n biwaama yogunu leni hali mi cilima n maadogu nni, leni Jelusalema nni. 5Bi bani nni hali ke li waagi, ki bani ke n tie *Falisieni, yaa cagili n ñii ti jaanma po leni ti danbogida po ki cie. Bi yaa bua, bi baa fidi ki tieni siedi lipo.#JTT 23.6; Filp 3.5 6Moala n se ne u bujiakaanu kani kelima n sugini ke U Tienu baa kuani wan den niani ti yaajanba yaa ñoanianu. 7Ti buolu yaaba, bani i piiga n buoliedi yeni, yaaba n jaandi ki miadi U Tienu u yensiinu leni ku ñiagu kuli, moko sugini laa ñoanianu kuama. O bado, li tie kelima laa suginma po yo ke Jufinba kuliti nni. 8Yinba, be teni ke yi nua ke li kan tuo U Tienu fiini bi tinkpiba?
9Moamoani mini nba den tama ke li pundi min tieni min fidi yaala kuli ki yie Nasaleti yua Jesu yeli po.#JTT 8.3; 22.4-5 10N den tieni yeni Jelusalema, ki baa bi kopadicianba yudanba kani li bali ki kuani bi *nigagidiŋanba a kpaadidiena nni. Ban den jia leni ba ti buudi, n den taa leni yaaba n sua ke li pundi ban kpa ba. 11N go den caa li *balimaama bangima diena nni kuli ki wangi ba fala, ki tiendi ba u paalu ban sugi U Tienu. N pabienkandikaali den teni ke n caa baa i dolami nni ki faligidi ba.
Polo togidi wan den lebidi ki ŋoadi Jesu maama
(JTT 9.1-19; 22.6-16)
12Li tie lani yaa po ke n den baa bi kopadicianba yudanba kani li bali leni u sanu ki fii ki caa Damasa ki baan tieni yeni lanpo mo. 13O bado, u yensiinu, min den ye u sanu nni, n den laa yaa yenma n ñuliti ki cie u yienu, ke mi ñani tanpoli po ki yendi ki lindi nni, mini leni n yegininlieba. 14Tikuli den baa tiipo. N den gbadi ke u nialu maadi leni nni Ebilu maama nni ki yedi: ‹Solo, Solo, be yaa po ke a faligidi nni? Li pa apo ŋan yiadi u danbu ki pua li bonmuukaala.› 15N den yedi: ‹N Daano, a tie ŋme?› O Diedo den yedi nni: ‹N tie Jesu, ŋan faligidi yua. 16Fii ki ŋmaa ki sedi. N doagidi apo n yuli kelima n gandi a ŋan yaa tie n naacemo leni n siedo, ki yaa wangi bi niba ŋan laa yaala na leni min go baa wangi a yaala. 17N baa ga ŋa Jufinba leni yaaba n kaa tie Jufinba kuli nuu nni min baa soani a bani yaaba yaa kani. 18N soani a bikani ke ŋan ŋubidi bi nuni, ki ñani ba li *biigili nni ban kua mi yenma nni, ki ñani ba Sutaani paalu nni, ban cua U Tienu kani. Lani ban baa bi *tuonbiadi sugili, ki baa bi u kaanu U Tienu gagidi ki ŋanbi yaaba kelima li *dandanli po yaa siiga.›
Polo go togidi Agilipa wan tuuni Jesu po maama
19Lanwani o bado Agilipa, mii den yie ke n kan tuo ki tieni min den laa tanpoli po bonlekaala yaala yeni n puogi nni yaala. 20N den kpa wangi Damasa yaaba, ki yuandi ki wangi Jelusalema yaaba, leni Jude yaa diema nni yaaba kuli. N go den wangi bi nilanba moko, ke ban lebidi bi yama ki ŋoadi U Tienu, ki yaa tuuni yaa tuona n doagidi ke bi lebidi.#JTT 9.20,28-29 21Li tie lani yaa po ke Jufinba den cuo nni U Tienu diegu nni ki moandi ki baa kpa nni. 22Ama kelima U Tienu todima po n ye hali dinla ki tiendi siedi taliginba leni bi paatieba kuli po. Min yedi yaala taa yenma leni bi sawalipuaba leni Musa kuli n den pua sawali ke yaala n baa tieni yeni po, mii pugini lipo liba. 23Lan tie ke *U Tienu n Gandi Yua baa le fala tiladi, ki tua U Tienu n kpia fiini yua bi tinkpiba siiga. O ba yaa wangi Jufinba leni bi nilanba kuli mi yenma maama.»#Esa 42.6; 49.6; 1Kol 15.20
24Polo n den maadi yeni ki baa ga o yuli, Fesitusa den kpaani ki yedi: «Polo, a gaadi, a cogiciamu teni ke a gaadi.» 25Polo den goa ki yedi o: «Ti yudaano Fesitusa, mii gaadi ka. Min maadi yaa maama tie mamoanma, ki go tie yandanmaama. 26O bado Agilipa mo bani laa bonla maama fuuli. Lani n teni ke n maadi o kani leni li papaali, kelima n bani ke laa maama siiga baa bonyenla ki boani o, kelima laa den tieni wuoli nni. 27Fini o bado Agilipa, naani a dugi bi sawalipuaba maama po bi? N bani ke a dugi mipo.» 28Agilipa den goa ki yedi Polo: «Li sieni waamu ŋan teni min tua Kilisiti yua.» 29Polo den goa ki yedi o: «Li yaa tie moala, bi li yaa baa waagi, min miadi U Tienu yaala tie, ke lan da tua fini bebe ka, ama yinba yaaba n ye ne ki gbadi n maama kuli, n tua nani min tie maama, li yaa tie n kpaadi bebe ne yaaka.»
30O bado leni gufeneeli leni Belenisa leni yaaba n den taani ki ka leni ba kuli den fii. 31Ban den ña, bi den maadi leni biyaba ki tua: «O naa ja naa tieni yaala n pundi ban kpa o, baa ban kuani o li kpaadidieli nni moko.» 32O bado Agilipa den yedi Fesitusa: «O ja na yaa den soagini o buudi *Sesa po, a bi baa fidi ki faabi o.»
Bi gedini Polo Loma po
Currently Selected:
JESU TONDIBA TUONA 26: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
