Sofoni 3
3
A Zerizalɛm nɩbɛ bɛ bɛr wõ a Naaŋmɩn bʋɔlʋ ɛ
1'Woi! Tẽ-kpɛ̃ɛ-gaara#3:1 A Zerizalɛm tẽ-kpɛ̃ɛ n'ʋ. Bɛ de ʋ na man nɩ a Nɩnɩɩvʋ tẽw. Nyɛ̃ 2.15. a,
tẽ-kpɛ̃ɛ-dɛwr na paalɩ po-to-fãw dem a!
2Ʋ bɛ bɛr wõ a Sore bʋɔlʋ ɛ,
ʋ bɛ sàw ʋ wul ʋ ɛ!
Ʋ bɛ ƴãw a ʋ tɩɛrʋ a ʋ ƴãw ɛ,
ʋ bɛ lɛb taw pɩɛlɩ a ʋ Naaŋmɩn ɛ.
3A ʋ nɩ-bɛrɛ ɩ na mɛ̃ gben na ùore a,
a ʋ ƴɛ̀r-dɩrbɛ ɩ na mɛ̃ wɛ-baar
na mɩ́ bawlɩ a zaanʋɔra#3:3 Nyɛ̃ Hab 1.8.,
ɛ́ bɛ tɛr bom na 'wɔb a biɓaara a.
4A ʋ naaŋmɩn-ƴɛ̀r-manbɛ
ɩ n nɩbɛ na mɩ́ pɔrɛ, ɛ́ bɛ̀lɛ nɩbɛ a.
A ʋ bàwr-maalbɛ bɛ ƴãwnɛ a bʋ̃-son ɛ.
Bɛ bɛ mɩ́ tuur a Naaŋmɩn wulu ɛ.
5Ɛcɛ a Sore be n a tẽw pʋɔ,
k'ʋʋ ɩ a mɩnʋ be be, ɛ́ a faa ta ka be ɩ.
Biɓaarɛ za, ʋ mɩ́ yel'ɩ a lɛ-na-tu-sɔr-a, ʋ bɛ vɛnɛ ɩ.
Ɛcɛ a nɩ-faar mɩ́ cãà na ɩrɛ a bɛ nɩ-fa-ɩb bɛ zɔrɛ nɩ vĩ ɛ!
6A Sore yere na: «Ɩ̃ ɩ na nɩ-bʋʋrɛ bɛ cãà be ɩ,
a zɛbr-yir-kpɛn na piw bɛ tɛr a, ɩ̃ da a na lɔb,
ɩ̃ ɩ na a bɛ sɛ́ɛ gã zawlɛ: nɩr za bɛ tuur tɔlɛ ɩ!
A bɛ tẽ-bɛrɛ ŋmɛr ŋmɛr'a gã: nɩr za bɛ cãà kpɩɛr a ɩ.
7Ɩ̃ tɩ tɩɛr'ɩ ɩ̃ pʋɔ: ƴɛrɛŋa a, a tẽw na ƴãwnɛ mɛ̃ na,
ʋ na sàw nɩ a ɩ̃ kpãàfʋ.
Lɛ n'a ɩ̃ kʋ̃ ŋmɛr ʋ bɛr, a tu a lɛ
ɩ̃ na tɩ nyɛ̃ a suur, fuw ʋ a ɩ.
Ɛcɛ a ʋ nɩbɛ mɩ́ pawr'ɩ a yel-faa maalʋ tɛwr ƴãw.
8A na ɩ à ŋá a, a Sore yere na: nyɩ gùre a ɩ̃ waa,
a bibir ʋl ɩ̃ na na wa, wa wul a nyɩ sãwna a.
Ɩ̃ yel'a k'ɩ̃ɩ na ɓã n a nɩ-bʋʋr-yoru
nɩ a naalʋ-ten nɩbɛ taa,
ƴãw a ɩ̃ suur vũu dɩ bɛ.
A ɩ̃ su-tʋlʋ-kpãkpã vũu na dɩ n a tẽw za.»
A Naaŋmɩn na ɩ na a nɩ-bʋʋrɛ lɩɛbɩ a bɛ ɩb
9«Lɛ n'a ɩ̃ na maalɩ a nɩ-bʋʋrɛ nɛ́ɛ a vɩɛl#3:9 Nɛ́ɛ a vɩɛl: A nɩ-bʋʋrɛ nɛ́ɛ tɩ ɩ n nɛ-dɛgɛ bɛ na puore a ŋmɩn-yoru a. Ƴɛrɛŋa a, a bɛ nɛ́ɛ na vɩɛl'a, bɛ tʋ̃ɔ́ puore nɩ a Naaŋmɩn-sɩza.:
bɛ na puore nɩ a mãa Sore,
ɛ́ tɛr tɩɛr-been tone nɩ mɛ̃.
10A ɩ̃ puor-puorbɛ na yaarɩ be a ten za pʋɔ a
na mɩ́ yi n zie na zãá zuo a Etiopi mamɛ a,
ɛ́ wa n a bɛ de-kʋ̀b bome wa kʋ̀ m.»
A Ɩsɩrayɛl nɩbɛ na cɛ a
11«A ʋlɩ bibir nɛ a, ɩ̃ nɩbɛ ɛ,
a nyɩ ɩ-faar za nyɩ na ɩ a vĩ kʋ̃ cãà ɩrɛ nyɩ ɛ,
a yel-bebe nyɩ na maalɩ sãw mɛ̃ a.
Bʋ̃ʋ n'ʋ vɛ̃, a bɛlɩ dem za a pɔ̀lʋ na kʋrɛ a,
ɩ̃ na ír bɛ nɩ a nyɩ pʋɔ a lɛn daar,
ɛ́ nyɩ kʋ̃ cãà ɩrɛ nyɔka-ɩb a ɩ̃ tã-sõw zu ɛ.
12Su-siwri dem nɩ nan dem tɛwr nɛbɛ
ɩ̃ na bɛr a nyɩ pʋɔ,
ɛ́ bɛ na mɩ́ zɛlɛ na k'ɩ̃ɩ gùre bɛ.
13A Ɩsɩrayɛl nɩbɛ na cɛ a kʋ̃ cãà ɩrɛ ɩ-faar ɛ,
bɛ kʋ̃ cãà ŋmarɛ ziri ɛ.
Bɛlʋ ƴɛ̀rʋ kʋ̃ lɛb yi a bɛ nɛ̃ɛ́ ɩ.
Bɛ na mɩ́ ɓãá nɩ ƴãw dɩrɛ ɛ́ gúre,
ɛ́ nɩr bɛ damnɛ bɛ ɩ.»
A Zerizalɛm tẽw na lɛb'a mɛ
14Sɩyɔ̃ tẽw i, lɔbr nʋ̃ɔ̀ cɛlsɩ!
Ɩsɩrayɛl nɩbɛ ɛ, nyɩ cáarɛ!
Zerizalɛm i, cɩlɛ nɩ fʋ pʋɔ za!
15A Sore ír'ɩ a dɔwrʋ na tɩ lo a nyɩ zu a bɛr,
ʋ ɩ n a nyɩ dɔ̃ dem bɛ zɔ.
A Sore, a Ɩsɩrayɛl nãà, be n a nyɩ sɔgɔ,
nyɩ kʋ̃ cãà zɔrɛ yel-faa dɛ̃bɩ̃ɛ ɩ.
16A ʋlɩ bibir nɛ a, bɛ na yel'ɩ a Zerizalɛm à ŋá:
«Sɩyɔ̃ tẽw i, ta zɔrɛ dɛ̃bɩ̃ɛ ɩ, taa bàlɛ tɩɛrɛ bɛrɛ ɩ!
17A Sore fʋ Naaŋmɩn be n a fʋ zie:
ʋlɛ n'ɩ a gãdaa na zɛb tʋ̃ɔ́ a,
nʋ̃ɔ̀ ɩrɛ ʋ nɩ yaga a fʋ ƴãw,
a ʋ nɔ̃wfʋ kʋ̀rɛ fʋ nɩ nyɔ-vʋʋr-paala,
ʋ ŋmɩɛr'ɩ nʋ̃ɔ̀ cɛlsɩ a fʋ ƴãw,
18mɛ̃ cuw bibir a.»
A Sore yere na:
«Ɩ̃ na ɩ na a faa ta páw fʋ ɛ,
a vĩ ta cãà kʋrɛ fʋ ɛ.
19A lɛn daar a, ɩ̃ na dɔwr'ɩ
a bɛlɩ dem za na dɔwrɩ nyɩ a.
A lɛn daar a, ɩ̃ na sanɩ nɩ
a nyɩ nɩbɛ bɛ na ƴãw bàalʋ a,
a bɛl bɛ na diw a bɛ tẽw pʋɔ cen nɩ a,
ɩ̃ na lɛb'a tɛr bɛ wa n,
ɩ̃ na ɩ na nyɩ nyɛ̃ ƴãwfʋ,
ɛ́ a nyɩ yúor yi a ten al za pʋɔ
nyɩ na tɩ nyɛ̃ a vĩ a.
20A lɛn daar a, ɩ̃ na lɛb'a tɛr nyɩ wa n,
a lɛn daar a, ɩ̃ na lɛb'a ɓã nyɩ taa.
A nyɩ mimié n'a ɩ̃ na lɩɛbɩ a nyɩ yele.
Lɛ n'a a nyɩ yúor na yi,
ɩ̃ɩ ɩ nyɩ nyɛrɛ ƴãwfʋ a tẽw zu nɩ-bʋʋrɛ za pʋɔ.»
A Sore n'ʋ yel.
Currently Selected:
Sofoni 3: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
