Zakari 8
8
A nɩdaar zie na lɛb'a vɩɛl, a Zerizalɛm nɩ a Sore nɩ-bʋʋrɛ ƴãw
1A Sore, a Kpɛnʋ-za-sob, tɩ ƴɛ̀r'ɩ ƴɛ̀rʋ ŋa kʋ̀ m:
2«A mãa, a Sore,
ɩ̃ nɔnɛ nɩ a Zerizalɛm vũuvũu,
a nɔ̃wfʋ ŋa dɩrɛ mɛ̃ na mɛ̃ vũu a.
3Alɛ n'a so, mãa n'ʋ yere:
ɩ̃ lɛbr'a waar a Zerizalɛm,
ɩ̃ lɛb'a kpɩɛr a Sɩyɔ̃ tẽw.
Bɛ na bʋɔlɛ nɩ a Zerizalɛm
kɛ́ “Tẽ-kpɛ̃ɛ na bɛ lɛb pùor a”,
ɛ́ a Sɩyɔ̃ tãw ɩ̃ na so a,
yúor na dɩ na kɛ́ “Tãw-sõw”.
4Sɩza n'a, mãa n'ʋ yere,
a dɛb-nyamɛ nɩ a pɔw-nyamɛ na dibr dàa a,
a bɛ yome na yãwmɛ a ƴãw a,
bɛ na mɩ́ lɛb'a zɩ̃ a Zerizalɛm nɩ-yaga tuor-taa ziir.
5A pɔlbili nɩ a pɔwsɩrali
na mɩ́ lɛb'a wa yãwmɛ yaga,
wa dɩ̃ɛnɛ a tẽ-kpɛ̃ɛ sɛ́ɛ pʋɔ.
6A Sore, a Kpɛnʋ-za-sob, yere na:
a yel ŋa sãá nɩ a Ɩsɩrayɛl nɩbɛ na cɛ a zie mɛ̃ ʋ kʋ̃ tʋ̃ɔ́ a,
ɛcɛ a mãa Sore, a Kpɛnʋ-za-sob,
ɩ̃ na tʋ̃ɔ́ na yel k'ʋʋ kʋ̃ tʋ̃ɔ́ bɩɩ?
7Mãa n'ʋ yere kʋ̀rɛ nyɩ,
ɩ̃ na faa nɩ a ɩ̃ nɩ-bʋʋrɛ
bɛ na diw cen nɩ a saa-pɛrɩ́ tẽw lowr,
nɩ a mʋ̃tɔ̃w-kpɛb-lowr tẽw lowr a.
8Ɩ̃ na ɩ na bɛ yi a be lɛb wa wa kpɩɛr a Zerizalɛm.
Bɛ na ɩ n a ɩ̃ nɩ-bʋʋrɛ, ɩ̃ɩ ɩ a bɛ Naaŋmɩn.
Ɩ̃ na dɩrɛ nɩ naalʋ a bɛ zu,
nɩ yel-mɩŋa nɩ mɩnʋ.»
9À ŋá n'a a Sore, a Kpɛnʋ-za-sob, yere:
«Nyɩ ƴãw fãw! Nyɩ̀ wone nɩ a ƴɛrɛŋa,
a ƴɛ̀rʋ á ŋá ɩ̃ na tɩ dãw ƴãw a ƴɛ̀r-manbɛ ƴɛ̀r,
a lɛn daar bɛ na tɩ lɔb a yir-kpɛ̃ɛ pɛr, a ʋ mɛb ƴãw a.
10A koro za a, nɩr bɛ mɩ́ tɩ ya
a nɩsaalbɛ ton nɩ a dʋn dem ɛ.
A dɔ̃ dem ƴãw a,
nɩr bɛ mɩ́ tɩ bɛr yã kɛ́ cere ɩ,
bʋ̃ʋ n'ʋ vɛ̃, ɩ̃ tɩ bɛr'ɩ a nɩbɛ za bɛ dɔwrɛ taa.
11Ɛcɛ ƴɛrɛŋa a, mãa n'ʋ yere,
a mãa Sore, a Kpɛnʋ-za-sob,
ɩ̃ kʋ̃ lɛb dɔwrɩ a nɩ-bʋʋrɛ bɛ ŋa nɩbɛ na cɛ a,
mɛ̃ a lɛ ɩ̃ na tɩ dɔwrɩ bɛ a koro za a ɩ.
12Ɩ̃ na ƴãw nɩ ƴã-ɓaarʋ a tẽw zu:
a divɛ̃ tɩɩr na mɩ́ wɔ̃ na,
a tẽsɔw bʋ̃-kʋ́ɔrɩ na mɩ́ maal'a,
sa-bɛrɛ na yi n a salom zu lo.
Ɩ̃ na kʋ̀ n a maalʋ á ŋá za,
a ɩ̃ nɩ-bʋʋrɛ nɩbɛ bɛl na cɛ a.
13Zuda nɩ Ɩsɩrayɛl naalʋ ten i,
a nɩ-bʋʋr-yoru sɔgɔ a,
nyɩ tɩ ɩ n nɩ-bʋʋrɛ bɛ na ŋmɛ ƴãw a bãwfʋ.
Ɛcɛ ƴɛrɛŋa a, ɩ̃ faarɛ nyɩ na,
nyɩ na ɩ n nɩ-bʋʋrɛ na nyɛ̃ maalʋ a bãwfʋ.
Nyɩ ta cãà zɔrɛ dɛ̃bɩ̃ɛ ɩ! Nyɩ ƴãw fãw!»
14Nyɛ̃ a lɛ a Sore, a Kpɛnʋ-za-sob, na yere a:
«A lɛ ɩ̃ na tɩ yel k'ɩ̃ɩ na ɩ na a kpɛ nyɩ,
a nyɩ sãàkʋm-kore na tɩ ɩ
k'ɩ̃ nyɛ̃ suur a ƴãw a, ɩ̃ bɛ lɛb bɛr ɛ.
15Ƴɛrɛŋa a, ɩ̃ nɩ̃ɛ na yel k'ɩ̃ɩ na maalɩ nyɩ na,
Zerizalɛm tẽw dem,
nɩ Zuda naalʋ-tẽw za dem i.
Nyɩ ta cãà zɔrɛ dɛ̃bɩ̃ɛ ɩ.
16Nyɩ nyɛ̃ a lɛ a na fɛr kɛ́ nyɩ ɩrɛ a:
Nyɩ yere a yel-mɩŋa kʋ̀rɛ taa.
A nyɩ ƴɛ̀rʋ-dɩb ziir a,
nyɩ mɩ́ dɩ a ƴɛ̀rʋ a tu yel-mɩŋa, ɛ́ wa n ƴã-ɓaarʋ!
17Nyɩ ta mɩ́ tɩ́ɛrɛ kɛ́ nyɩ maalɩ taa faa ɩ,
nyɩ zawrɩ a pɔ-ziri pɔb, bʋ̃ʋ n'ʋ vɛ̃,
ɩ̃ bɛ nɔnɛ a yele á ŋá taabɛ ɩ,
mãa n'ʋ yere, a mãa Sore.»
A mʋta-tuo bibie na lɩɛb'ɩ cuw bibie
18A Sore, a Kpɛnʋ-za-sob, tɩ ƴɛ̀r'ɩ ƴɛ̀rʋ ŋa kʋ̀ m: 19«Ɩ̃ yere na kʋ̀rɛ nyɩ, a mʋta-tuo nyɩ na mɩ́ tɛr, a yũon cuwr anaar sob, anũu sob, ayopõi sob nɩ a pie sob a, a na lɩɛb'ɩ cuw-bɛrɛ na tɛr cɩlʋ, nɩ nʋ̃ɔ̀ a, a Zuda nɩbɛ ƴãw.»
«Ɛcɛ, nyɩ bɔbr a yel-mɩŋa nɩ a ƴã-ɓaarʋ gãw bom za!»
20À ŋá n'a a Sore, a Kpɛnʋ-za-sob, yere:
«Nɩ-bʋʋr-yoru, tẽ-bɛrɛ yaga nɩbɛ
na lɛb'a waar a Zerizalɛm.
21Tẽ-kpɛ̃ɛ ŋa nɩbɛ na mɩ́ yel'ɩ tẽ-kpɛ̃ɛ ŋa dem:
“Nyɩ wa, tɩ cere na kɛ́ tɩ tɩ puori
a Sore, a Kpɛnʋ-za-sob,
ɛ́ bɔbr kɛ́ tɩ be a ʋ zie.”
Bɛ na sɔw na: “Tɩ mɩ̀ cere na.”
22Sɩza n'a, nɩ-bʋʋr-yaga nɩ ten na tɛr fãw a
na wa n a Zerizalɛm, wa bɔbr kɛ́ bɛ be a ɩ̃ zie,
ɛ́ zɛlɛ mɛ̃ nɩ a bɛ puoru.
23A lɛn daar a, mãa n'ʋ yere,
nɩ-sãanbɛ pie a ƴɛ̀rʋ na ɩ tɛɛtɛɛ a
na mɩ́ nyɔw nɩ Zifʋ been kparʋ ƴãw
ɛ́ yel ʋ: “Tɩ bɔbr'a kɛ́ tɩ páw nyɩ cen, bʋ̃ʋ n'ʋ vɛ̃,
tɩ wõ na kɛ́ a Naaŋmɩn be n a nyɩ zie.”»
Currently Selected:
Zakari 8: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
