Yã-bãwfʋ 4
4
1Fʋ̃ʋ bɛ tɛr bie ɛ́ ɩrɛ a vla a, alɛ sa! Bɛ bɛ yiire a bɛlɩ dem na ɩrɛ a vla a yele ɩ, bʋ̃ʋ n'ʋ vɛ̃, a Naaŋmɩn nɩ a nɩsaalbɛ mɩ́ de nɩ a bɛ yele. 2A bɛ cãafʋ daar a, a nɩbɛ mɩ́ cɔwrɛ bɛ na, ɛ́ bɛlɛ bɛ wa cãà a, bɛ̃ɛ kone bɛ na bɛ cãà a. A zie na be kʋralɛ a pʋɔ a, bɛ vɔbl'ɩ a zɛb-tʋ̃ɔ́fʋ kpawʋʋr#4:2 Nyɛ̃ 1Ko 9.24-25, Fil 3.13-14., bʋ̃ʋ n'ʋ vɛ̃, bɛ zɛb'a tʋ̃ɔ́ bom na vɩɛl ʋ za a páwfʋ ƴãw.
3Ɛcɛ a nɩ-faar bibiir saa yãwmɛ sɛw ŋmɩn a, bɛ kʋ̃ tɛr yel-ɩra ɩ. Bɛ ɩ na mɛ̃ tɩ-faar bʋʋrɛ tɩɩr na bɛ tɛ nyɩgɛ siw, ɛ́ a pɛ́ɛ bɛ kpɛmɛ a. 4Alɛ saa vo wuli vuo kãw a, ɛcɛ a bɛ tɛr fãw ɛ. A sɛsɛb mɩ́ dam a na, ɛ́ ʋlɛ wa fure nɩ fãw a, ʋ mɩ́ vɔ̃ a na bɛr. 5A wuli na cãà vore a mɩ́ kar a, ɛ́ a wɔmɛ na cãà ɩ kɛrɛ zuo a dɩb ƴãw a bɛ tɛr yel-ɩra a, nɩr kʋ̃ tʋ̃ɔ́ ɩ n a bom kãw za ɩ. 6A ƴɛ̀rʋ-dɩb bibir a, a bibiir bɛl bɛ na dɔw lãwfʋ na bɛ tu a Naaŋmɩn wulu a pʋɔ a#4:6 Nyɛ̃ 3.13., na ɩ n dãsɩɛ dem na wule a bɛ dɔwrbɛ ɩ-faar a.
A nɩ-mɩn pʋ̃ɔ-kpib pɛr
7A nɩ-mɩŋa ʋl a, ʋlɛ saa pʋ̃ɔ̀ kpi a, ʋ na nyɛ̃ nɩ a pɩ̃ɛnʋ. 8Bʋ̃ʋ n'ʋ vɛ̃, koru yaga bɛ n'a mɩ́ ɩ a dɛb-nyãw sɛwnɩ ƴãwfʋ ɛ, yome yaga yele bɛ n'a ɩ. 9A nɩsaal zie a, a yã-bãwfʋ ɩ n a zukɔbr-pɛlɛ, ɛ́ a koru yaga n'ɩ a nyɔ-vʋʋr-vla. 10Mɛ̃ à ŋá a, pɔlbile pɛlɩ nɩ a Naaŋmɩn pʋɔ, a Naaŋmɩn nɔ̃w ʋ. Ʋ na tɩ kpɩɛr a yel-bebe dem sɔgɔ a, Naaŋmɩn nyɔw ʋ na ír#4:10 A kan-nɛ́ɛ 10 tɩ tɔ 14 manɛ nɩ a Enɔkɩ yele. Nyɛ̃ Yzt 5.21-24.. 11Ʋ ír ʋ na k'aa faalʋ taa wa nanɩ sãwnɛ a ʋ tɩɛrʋ ɛ, k'aa ziri taa wa tule a ʋ sɩ́ɛ ɩ. 12Bʋ̃ʋ n'ʋ vɛ̃, a nʋ̃ɔ̀-faa bɛlʋ mɩ́ liw nɩ a yel-vɩɛlɩ, ɛ́ a damnʋ a yel-bɔbrɩ na mɩ́ waar'ɩ a mɩ́ tule nɩ a tɩɛr-vla sob. 13A bɛ cɛlɩ ɛ, ɛ́ a pɔlbile ŋa páw a vɩɛlʋ, ɛ́ a ʋ nyɔ-vʋʋrʋ maalɩ tɩ tɔ mɛ̃ ʋ vʋʋr'a tɩ cɛlɩ a. 14A ʋ nyɔ-vʋʋrʋ na tɩ pɛlɩ a Sore pʋɔ a n'a so ʋ lɛb ír ʋ fɔ̃wlɛ a faalʋ zie ŋa pʋɔ. A nɩbɛ tɩ nyɛ̃ na ɛ́ bɛ bãw a pɛr ɛ, bɛ bɛ tɩ bɔbr kɛ́ bɛ tɛr yel ŋa tɩɛrʋ ɛ: 15kɛ́ Naaŋmɩn maalʋ nɩ a ʋ su-ɓaarʋ mɩ́ be n a ʋ nɩ-kaa-íri ƴãw, k'ʋʋ mɩ́ gùre nɩ a bɛlɩ dem na tu ʋ a#4:15 Nyɛ̃ 3.9..
16A nɩ-mɩŋa kũu mɩ́ yere nɩ a nɩ-faar na cãà vʋʋrɛ a sãwna. Ɛ́ a pɔlbile na dãwnɩ a vɩɛlʋ páwfʋ a yere a dɛb-nyamɛ na cãà ɩ a nɩ-faar a sãwna. 17A nɩbɛ mɩ́ nyɛ̃ nɩ a yã-bãwnɛ kũu, ɛ́ bɛ bãw a lɛ a Sore na tɩɛrɛ a ʋ ƴãw a ɩ, bɛ bãw bʋ̃ʋ n'ʋ so ʋ maal tɛr ʋ ʋ bɛ bãw damnʋ a ɩ. 18Bɛ mɩ́ nyɛ̃ nɩ à á ŋá ɛ́ laar, ɛcɛ bɛlɛ nɛbɛ a Sore na ɩ la. 19A bɛ kũu daar a, a nɩbɛ kʋ̃ ƴãw a bɛ kũu ɛ. A kpɩmɛ tẽw a, vĩ na bɛ tɛr baarʋ daar a n'a bɛ na nyɛ̃. A Sore na ír bɛ na nɩ fãw a bɛ beba zie lɔb tẽw, a zu de niwn, ɛ́ bɛ kʋ̃ tʋ̃ɔ́ ƴɛ̀r ƴɛ̀rʋ ɛ. Ʋ na ɩ na a bɛ fãw baarɩ a nʋɔr kʋ, bɛ na be n kpɩɛrʋ pʋɔ, ɛ́ nɩr kʋ̃ lɛb tɩɛrɛ a bɛ yele ɩ.
A nɩ-faar nãá-bãw-kɛ́-lɛ
20A Naaŋmɩn wa sɔrɛ a nɩ-faar yel-bebe a, bɛ na màwr'a tawr tarɛ nɩ, ɛ́ a bɛ ɩ-faar na ìr'a àr manɛ a bɛ sãwna.
La Bible en Dagara © Alliance Biblique du Burkina Faso, 2013.