Tobi 3
3
A Tobi puoru
1Pʋ-sãwna tɩ tɛr mɛ̃ nɩ yaga za, ɩ̃ kone tɛr'ɩ a 'woi 'woi. Al pùorí, ɩ̃ tɩ tĩ na puore à ŋá tɛr'ɩ a 'woi 'woi:
2«Fʋ ɩ n nɩ-mɩŋa, Sore e,
a fʋ ɩ-ɩrɩ za tu n mɩnʋ,
a fʋ sɛ́ɛ za ɩ n nɔ̃wfʋ nɩ yel-mɩŋa,
fʋ̃ʋ n'ʋ dɩrɛ nɩ a tẽ-daa a ƴɛ̀rʋ.
3A lɛ pʋɔ a, Sore e,
taa yiire mɛ̃ bɛrɛ ɩ,
jɩ́r mɛ̃ kaa ɛ́ taa dɔwrɛ mɛ̃
a ɩ̃ yel-bebe zũú,
nɩ a sãwna
mãa nɩ a ɩ̃ sãàkʋm-kore
na bɛ bãwnɩ ɛ́ sãw fʋ a ɩ.
4Bʋ̃ʋ n'ʋ vɛ̃, tɩ bɛ tu a fʋ nɛ-ƴãwnɩ ɛ,
alɛ so fʋ sàw a tɩ dɔ̃ dem za a tɩ bome,
ɛ́ tɛr tɩ tɩ ɩ gbãgbaar, ɛ́ kʋrɛ tɩ.
A nɩ-bʋʋr-yoru bɛl pʋɔ
fʋ na diw tɩ yaarɩ a,
bɛ ɩrɛ tɩ na laar ɛ́ tʋʋr tɩ.
5A fʋ ƴɛ̀rʋ za fʋ na dɩ a pʋɔ a,
fʋ wul'ɩ a fʋ mɩnʋ.
Fʋ tɛr'ɩ yel-mɩŋa
fʋ na dɔwrɩ mɛ̃
a ɩ̃ yel-bebe
nɩ a ɩ̃ sãàkʋm-kore dem ƴãw a.
Bʋ̃ʋ n'ʋ vɛ̃, tɩ bɛ tu
a fʋ nɛ-ƴãwnɩ ɛ,
tɩ bɛ cen dẽdẽ a fʋ niŋé ɩ.
6Ɛcɛ ƴɛrɛŋa a,
ɩ m lɛ za fʋ na bɔbr a.
Lɛb de a ɩ̃ nyɔ-vʋʋrʋ!
Ɩ̃ bɔbr'a k'ɩ̃ɩ yi a tẽw ŋa zu
lɛb lɩɛbɩ a tanɛ.
Mãa zie a,
a kũu sa a nyɔ-vʋʋrʋ,
bʋ̃ʋ n'ʋ vɛ̃, ɩ̃ wõ n zʋmɛ
ɩ̃ na bɛ sɛwnɩ a.
Pʋ-sãwna tɛr mɛ̃ na
bɛ dɩ vuo ɩ.
Sore e, faa mɛ̃
a kpɩɛrʋ ŋa pʋɔ,
bɛr mɛ̃ ɩ̃ cen a pɩ̃ɛnʋ
na be kʋralɛ a pʋɔ.
Sore e, ta lɩɛb kpaar cɔw mɛ̃ ɩ,
mãa kpi a, alɛ sa
ɩ̃ na na cãà vʋʋrɛ
a kpɩɛrʋ ŋa tɔ pʋɔ
wone a zʋmɛ á ŋá taabɛ a.»
A Saara tõ-tõ-bi-pɔw tʋ ʋ na
7A ʋlɩ bibir nɛ tɔr za a, a Medi tẽw Ɛkɩbatan tẽ-kpɛ̃ɛ pʋɔ a, Araguwɛl pɔwyaa, Saara, tɩ wõ n a ʋ sãà tõ-tõ-bi-pɔw kãw na tɩ tʋ ʋ a. 8Bʋ̃ʋ n'ʋ vɛ̃, a Saara tɩ kul'ɩ sɩr gb'a ayopõi, ɛ́ kʋralɛ a kɔ̃tɔ̃-faa Asɩmode#3:8 Asɩmode: A yúor ŋa pɛr'ɩ “Kʋ pàw pɛr”. mɩ́ tɩ kʋ a sɩr ʋʋ bɛ lãw nɩ a ʋ pɔw sɛr, mɛ̃ a lɛ a na ɩrɛ dɛb nɩ pɔw na kul taa a zie ɩ. A ɩ a lɛ a tõ-tõ-bi-pɔw tɩ yel a Saara: «Fʋ̃ʋ n'ʋ kʋrɛ a fʋ sɩrbɛ! Nɩbɛ ayopõi n'ɩ bɛ ŋa fʋ kul ɛ́ bɛ tɛr a bɛ kãw za yúor ɛ! 9Bʋ̃ʋ n'ʋ so fʋ dɔwrɛ tɩ a bɛ kũu ƴãw? Cen tɩ páw bɛ ɛ́ nɩr taa nyɛrɛ fʋ fʋ dɔwr bidɛb bɩɩ pɔwyaa kãw za ɩ!»
10A ʋlɩ bibir nɛ a, pʋ-sãwna kpɛ̃ɛ tɩ tɛr'ɩ a Saara, ʋ tɩ tĩ kone dúor'ɩ a ʋ sãà bɔwpɩɛ pʋɔ, tɩɛrɛ nɩ k'ʋʋ tɩ yawlɩ ʋ tʋɔra. Ɛcɛ a ʋ tɩɛrʋ pʋɔ a, ʋ tɩ yel'ɩ à ŋá: «Bɛ kʋ̃ʋ wa tʋʋr a ɩ̃ sãà yere nɩ: Fʋ tɩ tɛr'ɩ pɔwya-been fʋ na nɔnɛ yaga za a, ʋʋ wa yawlɩ ʋ tʋɔra a ʋ kpɩɛrʋ zũú! À kpɩɛrʋ ɩ̃ na na ƴãw a ɩ̃ sãà-nyãw à à ŋá a na ɩ na ʋ kpi n pʋ-sãwna. Ɩ̃ na ƴãw nɩ fãw nɩ̃ɛ ta yawlɩ ɩ̃ tʋɔra ɩ, ɛ́ zɛlɩ a Sore yãayãa k'ʋʋ ɩ ɩ̃ kpi, lɛ n'a ɩ̃ kʋ̃ lɛb wõ zʋmɛ a ɩ̃ cãafʋ daar ɛ.»
A Saara puoru
11A pɛr nɛ pʋɔ a, a Saara tɩ lɩɛb'a tori a tokoro vʋɔr, zɛw a nuru puori à ŋá:
«Ɩ̃ danɛ fʋ na,
nɩbaal-zɔrɛ Naaŋmɩn i!
Fʋ̃ʋ so danʋ kʋrakʋralɛ!
A fʋ bʋ̃-íri za,
a yiele danɛ nɩ fʋ kʋrakʋralɛ!
12Ƴɛrɛŋa a, fʋ̃ʋ zie n'a
ɩ̃ lɩɛbɩ a ɩ̃ niwn cɔw,
fʋ̃ʋ n'ʋ ɩ̃ úore.
13Ɩ ɩ̃ yi a tẽw ŋa zu,
ta cãà wone a zʋmɛ á ŋá taabɛ ɩ.
14Sore e, fʋ bãwnɩ a na,
ɩ̃ bɛ tɛr dɛwr ɛ,
dɛb kãw za bɛ páw mɛ̃ ɩ.
15Ɩ̃ bɛ sãw a ɩ̃ yúor nɩ a ɩ̃ sãà yúor
a tẽw ŋa pʋɔ bɛ na diw mɛ̃ wa n a ɩ.
Ɩ̃ ɩ n a ɩ̃ sãà pɔwya-been,
ʋ bɛ tɛr bi-yũo
ʋ na dɩ a ʋ gbãw ɛ.
Ʋ bɛ tɛr yɛb,
bɛ tɛr ʋ nɩr kãw
na na tʋ̃ɔ́ kul mɛ̃ a ɩ#3:15 Nyɛ̃ Sɔr-n 36.6-9..
Ɩ̃ ũù nɩ sɩrbɛ ayopõi baarɩ:
bʋnʋ ƴãw n'a ɩ̃ na cãà vʋʋrɛ?
Ɛcɛ Sore e,
fʋ̃ʋ bɛ wa nɔnɛ kɛ́ fʋ ɩ ɩ̃ kpi a,
fʋ̃ʋ ƴãw tobr a zʋmɛ
bɛ na tʋʋr mɛ̃ a ƴãw.»
A Naaŋmɩn de nɩ a Saara nɩ a Tobi puoru
16A ʋlɩ pɛr nɛ pʋɔ a, a Naaŋmɩn na tɛr yúor-vɩɛlʋ-danʋ a tɩ wõ n a Tobi nɩ a Saara puoru, 17ɛ́ tõ malkɩ Arafayɛl#3:17 Arafayɛl: A yúor ŋa pɛr'ɩ “Naaŋmɩn n'ɩ a sanɛ”. k'ʋʋ tɩ sanɩ bɛ za ayi: a tɩ fɛr'a k'ʋʋ ír a bʋ̃-pɛlɛ al bɛr a Tobi mimie pʋɔ, k'ʋ tʋ̃ɔ́ lɛb nyɛ̃ a Naaŋmɩn cãà. A mɩ̀ tɩ fɛr'a k'ʋʋ diw a kɔ̃tɔ̃-faa Asɩmode bɛr a Araguwɛl pɔwyaa Saara zie, ɛ́ de ʋ kʋ̀ a Tobɩasɩ ʋ kul. Bʋ̃ʋ n'ʋ vɛ̃, a Tobɩasɩ n'ʋ a tɩ sɛw k'ʋʋ de niwn kul ʋ, ɛ́ bɛr a dɛbr bɛl za na tɩ bɔbr ʋ a.
A pɛr nɛ pʋɔ a, a Tobi tɩ yi n a davʋra pʋɔ kpɛ a ʋ dĩó, ɛ́ a Araguwɛl pɔwyaa, Saara, yi a bɔwpɩɛ pʋɔ siw.
La Bible en Dagara © Alliance Biblique du Burkina Faso, 2013.