Tobi 13
13
A Tobi yielu
1Nyɛ̃ a Tobi yielu ʋ na tɩ yieli a:
2«A Naaŋmɩn na vʋʋrɛ
ɛ́ dɩrɛ naalʋ kʋralɛ a, ʋ tɛr'ɩ danʋ!
Ʋlɛ n'ʋ mɩ́ dɔwrɩ ɛ́ lɛb zɔ nɩbaalʋ.
Ʋlɛ n'ʋ mɩ́ ɩ fʋ siw
tɩ ta a kpɩmɛ tẽw,
a tẽsɔw pʋ̃ɔmɩ pʋ̃ɔmɩ za,
ʋʋ lɛb ír fʋ a bɔrʋ kpɛ̃ɛ ŋa pʋɔ
do wa n.
Bom kãw za bɛ cɩ̃ɛnɛ a ʋ nũú ɛ.
3Ɩsɩrayɛl nɩbɛ ɛ, nyɩ danɛ ʋ
a nɩ-bʋʋr-yoru niŋé,
a bɛl pʋɔ ʋ na diw nyɩ yaarɩ a.
4A be mɩ̀ a,
ʋ wul nyɩ na ʋ na ɩ kpɛ̃ɛ a.
Nyɩ zɛw ʋ a bʋ̃-vʋʋrɩ za niŋé,
bʋ̃ʋ n'ʋ vɛ̃, ʋ ɩ n a tɩ Sore,
a tɩ Naaŋmɩn, a tɩ Sãà#13:4 Tɩ Sãà: Nyɛ̃ Ɩza 63.16, 64.7.,
ʋ ɩ n a Naaŋmɩn na be kʋralɛ a.
5Ʋ dɔwrɛ nyɩ nɩ a nyɩ sãwna ƴãw,
ɛcɛ ʋ na zɔ n a nyɩ za nɩbaalʋ.
Ʋ na ɩ na nyɩ yi
a nɩ-bʋʋr-yoru pʋɔ wa,
a bɛl pʋɔ ʋ na tɩ diw nyɩ yaarɩ a.
6Nyɩ lɛb wa a ʋ zie nɩ nyɩ pʋɔ za,
nɩ nyɩ nɩɩlʋ za,
kɛ́ nyɩ wa vʋʋrɛ a ʋ niŋé
a yel-mɩŋa pʋɔ,
lɛ n'a ʋ na lɛb wa a nyɩ zie,
ɛ́ kʋ̃ lɛb sɔwlɩ nyɩ a ʋ niwn ɛ.
7Ƴɛrɛŋa a, nyɩ tɩɛrɩ a alɩ bome nɛ
ʋ na maalɩ kʋ̀ nyɩ a,
ɛ́ zɛw kɔkɔr danɩ nɩ ʋ.
Nyɩ danɩ a Sore na ɩ nɩ-mɩŋa a,
nyɩ ƴãwnɛ a Nãà na be kʋralɛ a.
8Mãa a, ɩ̃ yiele ʋ nɩ
a tẽw ŋa pʋɔ
bɛ na diw mɛ̃ wa n a#13:8 Tẽw ŋa pʋɔ bɛ na diw mɛ̃ wa n a: A Nɩnɩɩvʋ tẽw n'ʋ..
Ɩ̃ wule nɩ a ʋ fãw
nɩ a kpɛ̃ɛ ʋ na ɩ a,
a nɩ-bʋʋrɛ na sãw a#13:8 Nɩ-bʋʋrɛ na sãw a: A Ɩsɩrayɛl nɩbɛ nɛbɛ..
Nyɩ lɛb wa a ʋ zie,
yel-bier-maalbɛ ɛ,
nyɩ tɛr mɩnʋ ɩ-ɩrɩ a ʋ niŋé:
Ãa bãw? Kapaw,
ʋ na tɛr'ɩ pʋ-pɩɛlʋ a nyɩ ƴãw
ɛ́ zɔ a nyɩ nɩbaalʋ.
9Ɩ̃ zɛwr'ɩ a ɩ̃ Naaŋmɩn,
ɩ̃ cɩlɛ nɩ nʋ̃ɔ̀ cɩlʋ a Nãà
na be a salom zu a ƴãw.
10A bɛ za, bɛ hiere ʋ na ɩ kpɛ̃ɛ a,
ɛ́ danɛ ʋ a Zerizalɛm tẽw pʋɔ!
Tẽ-sõw Zerizalɛm i,
Naaŋmɩn na dɔwrɩ fʋ na
a fʋ nɩbɛ ɩ-ɩrɩ ƴãw.
Ɛcɛ ʋ na lɛb'a zɔ a bɛlɩ dem
na tu ʋ bɛ lɛb pùor a nɩbaalʋ.
11A lɛ ƴãw a, danɛ a Sore
mɛ̃ a lɛ a na sɛw a,
danɛ a Nãà na be kʋralɛ a,
k'aa ʋ yir-kpɛ̃ɛ tʋ̃ɔ́ lɛb mɛ
a fʋ nɩbɛ nʋ̃ɔ̀ ƴãw.
12A Sore, ʋ ƴãw nʋ̃ɔ̀ a nɩbɛ za
bɛ na diw cen nɩ a!
Ʋ wul a ʋ nɔ̃wfʋ a kpɩɛrʋ dem za
na kpɩɛr a fʋ pʋɔ a,
tɩ ta n a tẽw baarʋ daar!
13Cãà na nyɩwrɛ yaga za a
na yi n a fʋ pʋɔ
nyɩwrɩ tɩ ta a tẽw baarʋ zie.
Nɩ-bʋʋr-yaga na yi n zi-zãána
wa a fʋ zie.
A tẽ-daa baarʋ zie ten nɩbɛ
na wa n a fʋ zie, Zerizalɛm i!
A bɛ nuru na paal'a nɩ de-kʋ̀b bome
a Nãà na be a salom zu a ƴãw.
A nɩbɛ nãà wa dɔwr lɩɛrɛ taa a
na ƴãw fʋ nɩ nʋ̃ɔ̀,
ɛ́ kʋralɛ a, bɛ na bʋɔlɛ fʋ nɩ:
“Tẽ-kpɛ̃ɛ bɛ na kaa ír a.”
14Ŋmɛ-ƴãw, a páw a bɛlɩ dem
na na tʋʋr fʋ a!
Ŋmɛ-ƴãw, a páw a bɛlɩ dem za
na na sãw fʋ bɛr
ɛ́ dá a fʋ dacine lɔb a,
a bɛlɩ dem za na na ŋmɛr
a fʋ yir-cõcowli bɛr,
ɛ́ nyɩw a fʋ yie bɛr a!
Ɛcɛ maalʋ, a páw a bɛlɩ dem za
na na ƴãwnɛ fʋ kʋralɛ a!
15A lɛ pʋɔ a, Zerizalɛm i, fʋ na cɩlɛ na,
a bɛlɩ dem na tu a Naaŋmɩn bɛ lɛb pùor a zũú.
Bʋ̃ʋ n'ʋ vɛ̃, bɛ na wa na wa ɓã taa bɛ za
kɛ́ bɛ danɩ a Sore na be kʋralɛ a.
Zu-nʋ̃ɔ̀ dem'ɩ a bɛlɩ dem na nɔnɛ fʋ a!
Zu-nʋ̃ɔ̀ dem'ɩ a bɛlɩ dem
na na cɩlɛ a fʋ ƴã-ɓaarʋ ƴãw a!
16Zu-nʋ̃ɔ̀ dem'ɩ a bɛlɩ dem za
na kone a fʋ kpɩɛrʋ za ƴãw a!
Bʋ̃ʋ n'ʋ vɛ̃, bɛ na cɩlɛ nɩ a fʋ ƴãw,
ɛ́ lãwnɩ fʋ cɩlɛ kʋralɛ.
Sɩza, ɩ̃ danɛ nɩ a Sore,
a Na-kpɛ̃ɛ,
17bʋ̃ʋ n'ʋ vɛ̃, bɛ na lɛb'a mɛ
a Zerizalɛm,
ɛ́ a tẽ-kpɛ̃ɛ ŋa pʋɔ a,
a ʋ Yir na àr'ɩ kʋralɛ.
Zerizalɛm i, nyɛ̃ nʋ̃ɔ̀ na na ɩrɛ mɛ̃
a lɛn daar a ɩ̃ nɩ-bʋʋrɛ na cɛ a
nãà wa nyɛ̃ a fʋ yúor-vɩɛlʋ-danʋ
ɛ́ danɛ a Nãà na be a salom zu a!
Bɛ na mɛ n a fʋ dɩ̃dɛɛ
nɩ kʋsɛ-bi-nyɩlɩ kãw
bɛ na bʋɔlɛ safɩɩr nɩ emerodɩ a,
ɛ́ mɛ a fʋ dacine za nɩ kʋsɛ-bi-nyɩlɩ.
Bɛ na mɛ n a fʋ yir-cõcowli
nɩ salm-zɩɛ,
ɛ́ a dacine na piw a tɛr a
ɩ salm-zɩɛ mɩŋa mɩŋa.
Bɛ na maal'ɩ a fʋ tẽw sɛ́ɛ nɩ kʋsɛ-bi-nyɩlɩ
bɛ na bʋɔlɛ iribi a, de nɩ Ofɩɩr kʋsɛ-vɩɛlɩ.
18Nʋ̃ɔ̀ yielu n'a na yire a fʋ dɩ̃dɛɛ ƴãw,
ɛ́ a fʋ yie za pʋɔ a, bɛ na yiele na: “Aleluya!
A Ɩsɩrayɛl Naaŋmɩn yúor, ʋ tɛr danʋ!”
Ɛ́ a bɛlɩ dem za a Sore na na kʋ̀ maalʋ a,
na danɛ nɩ a ʋ yo-sõw kʋralɛ.»
La Bible en Dagara © Alliance Biblique du Burkina Faso, 2013.