Bɛn Sɩɩra 37
37
Bá be na, bá be
1Bá za mɩ́ yel'a:
«A mãa mɩ̀, ɩ̃ ɩ n a fʋ bá.»
Ɛcɛ kãw n'ɩ ŋan ɩ a fʋ bá nɩ yúor tɛwr.
2Nyɛ̃ pʋ-sãwna na mɩ́ cɛ blã na kʋ a:
a tɔ bɩɩ a bá na mɩ́ wa lɩɛbɩ dɔ̃ sob a!
3A tɩ nɩɩlʋ na mɩ́ cɩɩlɛ cere a faa lowr a,
a ʋ yib zie n'ɩ nyɩn,
ʋl na paalɩ a tẽw nɩ a bɛlʋ a?
4Kãw nɩ ŋan ɩ a fʋ bá a nʋ̃ɔ̀ daar,
ɛ́ a kpɩɛrʋ daar ʋ ír àr a fʋ ƴãw.
5Bá kãw lãw nɩ fʋ na wone a tuo,
lɛn daar za fʋ na kʋ̀rɛ ʋ ʋ dɩrɛ a,
ɛcɛ a zɛbr daar a,
ʋ pine nɩ zɛbr-kur-pãgala.
6Taa yiire a fʋ bá bɛrɛ fʋ̃ʋ wa be a zɛbr zie a ɩ,
ɛ́ mɩ̀ cãà tɛr a ʋ tɩɛrʋ
fʋ̃ʋ wa páw a zɛbr na-bome a.
A yã-wulbɛ yele
7Yã-wule za mɩ́ yel'a k'aa ʋ yã n'a vɩɛl,
ɛcɛ bɛ mɩnɛ a, a bɛ tɔnɛ n'a bɛ mɩ́ bɔbr.
8Gùre fʋ tʋɔra a yã-wule ƴãw.
De niwn sowri fʋ tʋɔra nyɛ̃,
a ʋ bʋ̃-bɔbra n'ɩ bʋnʋ.
Bʋ̃ʋ n'ʋ vɛ̃,
a ʋ bʋ̃-bɔbra lowr'a ʋ na ƴɛ̀r tu n.
A mɩnɛ kãw, ʋ bɔbr'a
k'ʋʋ de bom fʋ na só a,
9yere à ŋá kʋ̀rɛ fʋ: «A sɔr-vla n'ʋ fʋ lo»,
al pùorí ʋ àr zãá k'ʋʋ nyɛ̃
a ʋlɩ bom nɛ na na ta b a.
10Ta bɔbr yã nɩr
a ɩb na bɛ ɩ cãà a fʋ zie a zie ɩ.
Sɔwlɩ a lɛ fʋ na tɩɛrɛ kɛ́ fʋ ɩ a,
a bɛlɩ dem na nyuur'ɩ fʋ a zie.
11Taa sowre pɔw a lɛ ʋ na tɩɛrɛ
a ʋ yẽtaa ƴãw a ɩ,
taa sowre dɛ̃bɩ̃ɛ sob a zɛbr ƴãw ɛ,
taa sowre yɛ-yɛrɛ bʋ̃-daara ƴãw ɛ.
Taa sowre nyuur sob a lɛ ʋ na tɩɛrɛ
a vla bɛ na maalɩ fʋ a, tɩɛrʋ tɛrʋ ƴãw ɛ,
nɩr na bɛ zɔrɛ nɩbaalʋ a, a su-baalʋ ƴãw ɛ.
Taa sowre ƴã-tuo sob
a lɛ ʋ na tɩɛrɛ ton ƴãw a ɩ,
tõ-tõ-bie na dier yũon sã-ya a,
a ʋ tome baarʋ ƴãw ɛ,
tõ-tõ-bie na ɩrɛ salala a, tõ-kpɛ̃ɛ ƴãw ɛ.
Taa bɔbr yã kãw za a nɩbɛ bɛ ŋa zie ɩ.
12Nɩ̃ɛ cere kʋralɛ tɩ nyɛrɛ nɩr
na tu a Sore pùor a,
nɩr fʋ na bãw k'ʋʋ tuur'ɩ a nɛ-ƴãwnɩ
ɛ́ tɩɛrɛ mɛ̃ a fʋ̃ʋ a.
Fʋ̃ʋ wa tɔl gù a,
ʋ na lãw nɩ fʋ nɩ a fʋ kpɩɛrʋ pʋɔ.
13Mɩ́ tu a lɛ a fʋ socir
na mɩ́ tɩɛrɩ a yele bin a,
bʋ̃ʋ n'ʋ vɛ̃, yã-wule bɛ ka be tu fʋ zuo ʋ ɛ.
14A mɩnɛ kãw, a nɩsaal tɩ̀ɛrʋ mɩ́ ɩ na k'ʋ bãwnɩ
a yel vla za zuo zi-gùrbɛ ayopõi
bɛ na ƴãw zi-kɛra zu, bɛ piwre a zie a.
15Ɛcɛ zuo a za,
zɛlɛ a Naaŋmɩn-na-do-saa-bɛ-pɩɛl-a,
k'ʋʋ ɩ a fʋ sɔ́r tuur a yel-mɩŋa.
A yã-bãwfʋ na ɩ sɩza a, nɩ a yã-bãwfʋ na ɩ ziri a
16Mɩ́ de niwn ŋmɛ nɔkpɛn
a ton ƴãw ɛ́ bãw tĩ ʋ,
mɩ́ tɩɛrɩ a bom ɛ́ bãw ɩ.
17A socir pʋɔ n'a a tɩɛrʋ nyɩwr be.
18A socir na tʋ̃ɔ́ na ɩ
bome anaar yi a ʋ pʋɔ: a vla nɩ a faa,
a nyɔ-vʋʋrʋ nɩ a kũu,
ɛcɛ a nʋɔr'ʋ mɩ́ yel a lɛ na n'a a kʋralɛ.
19Nɩr'ɩ ŋan, bãw a, wule nɩ-yaga,
ɛ́ a ʋl mɩŋa ƴãw ʋ bɛ tɛr pɛr ɛ.
20Kãw n'ɩ ŋan bãw ƴɛ̀rʋ,
ƴãw a nɩbɛ bɛ nɔnɛ ʋ towtow ɛ,
ʋ kʋ̃ tɛr bʋ̃-dɩra kãw za ɩ.
21Bʋ̃ʋ n'ʋ vɛ̃, a Sore bɛ tɛr'ɩ ʋ pʋ-pɩɛlʋ ɛ,
alɛ so ʋ bɛ tɛr a yã-bãwfʋ towtow ɛ.
22Kãw n'ɩ ŋan ɩ yã-bãwnɛ ʋl ʋ yõ tɔnɛ ƴãw,
ɛ́ ʋl yõ n'ʋ a ʋ yã bʋ̃-páwrɩ maalɛ.
23Ɛcɛ yã-bãwnɛ mɩ́ wule nɩ a ʋ nɩ-bʋʋrɛ,
ɛ́ bɛ mɩ́ bɛr tɩɛrʋ a ʋ yã bʋ̃-páwrɩ ƴãw.
24Maalʋ mɩ́ paal'ɩ a yã-bãwnɛ,
ɛ́ a bɛlɩ dem za na nyɛrɛ ʋ a,
yere k'ʋʋ wone nɩ nʋ̃ɔ̀.
25Nɩsaal nyɔ-vʋʋrʋ bibie tɛr'ɩ sɔ́rʋ,
ɛcɛ a Ɩsɩrayɛl bʋʋrɛ dem bɛ tɛr sɔ́rʋ ɛ.
26Sob nɛ na ɩ yã-bãwnɛ a ʋ nɩ-bʋʋrɛ sɔgɔ a,
a nɩbɛ na ƴãw nɩ a bɛ tɩɛrʋ a ʋ ƴãw,
ɛ́ a ʋ yúor na pore nɩ kʋralɛ.
A dɩrɛ zʋmnɛ nɩ
27Ɩ̃ bie e, a fʋ nyɔ-vʋʋrʋ daar a,
ɩ fʋ mɩŋa kaa,
nyɛ̃ a ʋlɩ bom nɛ na bɛ vɩɛl a fʋ zie a,
ɛ́ mɩ́ zawrɩ ʋ bɛr.
28Bʋ̃ʋ n'ʋ vɛ̃, a bome za bɛ dier a nɩbɛ za ɩ,
ɛ́ a nɩbɛ za bɛ nɔnɛ a bome za ɩ.
29Ta wone a nʋ̃ɔ̀ za bɛ sɛwr ɛ,
ta ŋmʋrɛ a dɩb ƴãw ɛ.
30Bʋ̃ʋ n'ʋ vɛ̃, a dɩ-zuo waar'ɩ nɩ bàalʋ,
ɛ́ a dɩ-gbogbo waar'ɩ pʋ-'wɔbɛ.
31Nɩ-yaga kpi n a dɩ-zuo kũu,
ɛcɛ sob nɛ na maal ɩrɛ a mɩ́ vʋʋrɩ na tɔl nidaa.
La Bible en Dagara © Alliance Biblique du Burkina Faso, 2013.