Bɛn Sɩɩra 32
32
A lɛ a na sɛw kɛ́ bɛ mɩ́ ɩrɛ a cuwr dɩb zie a
1Bɛlɛ wa kaa ír fʋ
kɛ́ fʋ ɩ cuw dɩb nɩ-kpɛ̃ɛ a,
ta wule kɛ́ fʋ̃ʋ n'ʋ ɛ,
ɩrɛ a fʋ taabɛ zie mɛ̃ a bɛ ƴen sob kãw a.
Kaa a bɛ zie bɛ zɩ̃, al pùorí, cen tɩ zɩ̃.
2Fʋ̃ʋ wa kaa a bɛ zie baar'a, cen a fʋ zɩma zie.
Nʋ̃ɔ̀, a ɩrɛ fʋ fʋ na nyɛ̃ nʋ̃ɔ̀ kpɩɛr bɛ a,
sàw a mʋʋrʋ bɛ na mʋʋrɛ fʋ
a yele na cɔbrɩ vla a ƴãw a.
3Fʋ̃ʋ wa n'ʋ kor zuo bɛ za a,
fʋ̃ʋ de a ƴɛ̀rʋ, bʋ̃ʋ n'ʋ vɛ̃,
fʋ̃ʋ n'ʋ a fɛr kɛ́ fʋ ƴɛ̀r.
Ɛcɛ yel a lɛ tɔr za fʋ na bãw a,
ɛ́ ta piw a yielu nɩ a bʋ̃-ŋmɩɛrɩ ɛ.
4A nɩbɛ wa bɛrɛ wone
a yielu nɩ a bʋ̃-ŋmɩɛrɩ a,
fʋ̃ʋ ta tɛr ƴɛ̀rʋ ɛ,
a fʋ yã-bãwfʋ wulu daar bɛ n'ɩ a lɛ ɩ.
5Yielu bɛ na yiele
ŋmɩɛr'ɩ bʋ̃-ŋmɩɛrɩ cuw dɩb zie a
ɩ na mɛ̃ kʋsɛ-bi-nyɩla na ƴãw
salm-zɩɛ nũ-tʋʋr zu a.
6A bʋ̃-ŋmɩɛra kɔkɔr
bɛ na bɛrɛ wone nyúur'ɩ divɛ̃ a,
ɩ na mɛ̃ bãwfʋ-bʋ̃-ƴãwna
na maal'ɩ kʋsɛ-bi-nyɩla
bɛ na bʋɔlɛ emerodɩ,
ʋʋ sawlɩ salm-zɩɛ nũ-tʋʋr bɔw pʋɔ a.
7Fʋ̃ʋ wa n'ɩ a bile a bɛ za pʋɔ a,
fʋ̃ʋ de a ƴɛ̀rʋ alɛ wa fɛrɛ a,
ɛcɛ a ta zuo gb'a ayi ɛ,
ɛ́ a ɩ bɛlɛ wa sowre fʋ a.
8Fʋ̃ʋ wa ƴɛ̀rɛ a,
fʋ̃ʋ ƴɛ̀r ŋmãa ŋmãa,
yel yel-yaga nɩ ƴɛ̀r-bie blãlɛ.
Wul kɛ́ fʋ wõ a na,
ɛ́ mɩ̀ mɩ́ tʋ̃ɔ́ ɩ a gbili.
9Fʋ̃ʋ wa be nɩ-bɛrɛ sɔgɔ a,
ta bɔbr kɛ́ fʋ wul kɛ́ nyɩ ɩ n been ɛ.
Be dɛb-nyamɛ na be a,
ta tɛr ƴɛ̀r-yaga ɩ.
10Mɛ̃ a lɛ a saa na mɩ́ de niwn nyɩwrɩ,
ɛ́ bãw tanɩ a,
lɛ n'a a nɩbɛ tɩɛr-vɩɛlɩ mɩ̀ mɩ́ de a nɩr
na bɛ ƴɛ̀rɛ a niwn.
11A tɛm wa ta a, ìr, ɛ́ ta cɛlɛ ɩ,
zɔ kul a fʋ yir, ɛ́ ta nɩɩnɛ a sɔ́r zu ɛ.
12Fʋ na tʋ̃ɔ́ na tɩ dɩ̃ɛnɛ a be,
ɩrɛ lɛ na pɛlɩ a fʋ pʋɔ a,
ɛcɛ taa ƴɛ̀rɛ mɛ̃ pɔ̀lʋ sob a ɩ,
wa maalɛ yel-bier ɛ.
13A nʋ̃ɔ̀ á ŋá ƴãw a,
puore a fʋ Íre barka,
ʋl na mɩ́ kʋ̀ b ʋ yel-maalɩ a ʋr a.
WULU NA ƁÃ TAA A ZIIR ANAAR SOB
32:14—42:14
A Naaŋmɩn zɔba
14Sob nɛ na zɔrɛ a Sore a
mɩ́ sàw na bɛ wul ʋ.
Bɛlɩ dem na mɩ́ cɔ̃w ìr bɔbr ʋ a,
ʋ mɩ́ ŋmɛlɩ na kaa bɛ.
15Sob nɛ na zanɛ a Wulu a,
ƴãw na ɓãá ʋ na,
ɛcɛ sob nɛ na bɛlɩ ɩ mɛ̃ ʋ tuur ʋ na a,
a Wulu na ɩ n bɛra a ʋ zie.
16Bɛlɩ dem na zɔrɛ a Sore a
mɩ́ bãw nɩ a ʋlɩ bom nɛ ʋ na bɔbr a,
a bɛ ɩ-vɩɛlɩ mɩ́ nyɩwrɛ na mɛ̃ a cãà a.
17A yel-bier sob bɛ mɩ́ sàw bɛ na yel ʋ ɛ,
ɛ́ mɩ́ wõ a Wulu tu n lɛ ʋ na bɔbr a.
18Nɩr na ɩ tɩɛrʋ sob a
bɛ yiire a tɩɛrʋ towtow ɛ,
ɛcɛ a sãan nɩ a pɔ̀lʋ sob bɛ zɔrɛ bom za ɩ.
19Taa ɩrɛ bom ɛ́ bɛ tɩɛrɩ ɛ,
ɛ́ fʋ kʋ̃ mɩ́ yel kɛ́ fʋ̃ʋ tɩ bãw kɛ́ lɛ ɩ.
20Ta tu sɔ́r na bɛ vɩɛl a ɩ,
fʋ nãà mab'a ŋmɛ gbɛ́r kʋsɛbɛ ƴãw.
21Ta bɛr yã cere sɔ́r na man taa a zu ɛ.
22Gùre fʋ tʋɔra a fʋ bibiir ƴãw.
23Gùre fʋ tʋɔra yel za fʋ na ɩrɛ a pʋɔ,
a Sore nɛ-ƴãwnɩ tub mɩ̀ n'ɩ a lɛ.
24Sob nɛ na ƴãw a ʋ tɩɛrʋ a Wulu ƴãw a
sàwr'ɩ a nɛ-ƴãwnɩ.
Sob nɛ na ƴãw a ʋ tɩɛrʋ a Sore ƴãw a,
bɛ nyɛrɛ faa kãw za ɩ.
La Bible en Dagara © Alliance Biblique du Burkina Faso, 2013.